Aımaqtar • 30 Shilde, 2020

Elordalyq dárigerler tirek-qımyl apparaty buzylǵan balalarǵa ota jasaýda

23 ret kórsetildi

Balalar ortopedteri týa bitken aqaýlary men jambas býynynyń patologııalyq shyǵýy bar jasóspirimderdi emdeýdiń eń kúrdeli jáne tıimdi ádisterin qoldanýda, dep habarlaıdy Nur-Sultan ákimdiginiń resmı saıty.

№2 kópsalaly qalalyq balalar aýrýhanasynyń ortopedııa jáne ońaltý bóliminiń meńgerýshisi Agabek Chıkınaevtyń aıtýynsha, buǵan deıin jambas býyndarynyń shyǵýy men dısplazııasy bar balalardy aıaǵyna turǵyzý úshin olardyń 18 jasqa tolǵanyn kútýge týra keletin. Qazir dárigerler arnaıy daıyndyqtan ótkennen keıin biregeı operasııa Qazaqstanda da jasalýda.

"Bul ota – Ganc ádisi boıynsha jambas músheleriniń osteotomııasy. Sent-Lýıstik (AQSh) professor D. Kuldzhanova kómegimen aýrýdan arylýǵa múmkindik beretin kúrdeli jáne tıimdi emdeý ádisteriniń birin ıgerdik. Áseri óte jaqsy: aǵza erte qalpyna keledi, asqyný yqtımaldyǵy óte tómen. Serebraldy sal aýrýy, patologııalyq býyn shyǵýy, patologııalyq býyn shyǵýymen kúrdelengen julynnyń týa bitken aqaýlary bar balalar úshin bul operasııa óte tıimdi", – deıdi A.Chıkınaev.

Onyń aıtýynsha, otaǵa arnalǵan quraldar Nıjnıı Novgorod zaýytynan tapsyryspen alynǵan.

"Jambas otalaryna arnalǵan jıyntyq – Qazaqstandaǵy shaǵyn tilik arqyly jambas býynyna ota jasaýǵa múmkindik beretin jalǵyz qural. Eger buryn ota úsh-tórt saǵattan kóp ýaqyt alsa, qazir eki saǵatqa deıin. Bul óte jaqsy nátıje. Qazaqstannyń barlyq aımaqtarynan balalar kómek alýda. Buryn bul jasta biz ota jasamaı, balanyń óskenin kútetinbiz. Olar aqsaý, omyrtqanyń qısaıýynan zardap shekti. Endi biz tıimdi kómek kórsete alamyz", – dep túsindirdi dáriger.

Otandyq dárigerler emdeıtin taǵy bir aýrý – qol-aıaqtyń býyndary men baılamdarynyń týa bitken aqaýlary. Bul aýrýmen aýyratyn balalar kóp emes, biraq ár aımaqta kezdesedi. Bir ǵana №2 balalar aýrýhanasynda osyndaı 32 bala tirkelgen.

"Biregeı operasııa bar, ol qoldy búgilgen kúıden qalpyna keltirýge múmkindik beredi. Bıyl mundaı ota 11 naýqasqa jasaldy. Bala tamaqtana alady, jýynyp, kompıýter qoldana alady. Bir sózben tolyqqandy ómir saltyn ustanyp, qamqorshylarǵa táýeldi bolmaıdy", – deıdi dáriger.

Sońǵy jańalyqtar

Uqsas jańalyqtar