Aımaqtar • 30 Shilde, 2020

Tatarstan dárigerleri Jambyl medısınasyn joǵary baǵalady

92 ret kórsetildi

Jýyrda tájirıbe almasý maqsatynda Áýlıeata óńirine kelgen Tatarstan dárigerleri Jambyl oblysynyń ákimi Berdibek Saparbaevpen kezdesti. Kezdesý barysynda Tatarstan dárigerleri Jambyl oblysynyń densaýlyq saqtaý júıesiniń damý deńgeıine joǵary baǵa berdi. О́z kezeginde Berdibek Saparbaev bilikti mamandarǵa shaqyrýdy qabyl alǵany úshin alǵys bildirdi. Sonymen qatar, álemdegi kúrdeli epıdemııalyq ahýal jaǵdaıynda baýyrlas kórshi memleketterdiń qoldaýy asa mańyzdy ekenin atap ótti, - dep jazady Egemen.kz

"Sizderdiń respýblıkalaryńyzdyń basshylyǵymen burynnan kele jatqan dostyq baılanysymyz bar. Men bir kezderi basshylyq etken Shyǵys Qazaqstan oblysynyń Semeı qalasynda tatar etnosynyń ókilderi kóptep ornalasqan. Ol jaqta jyl saıyn sabantoı merekesi ótkizilip, álemniń túkpir-túkpirinen tatar ultynyń ókilderi shaqyrylady. Birde oǵan Tatarstannyń burynǵy prezıdenti Mıntımer Shaımıev te qatysqan bolatyn. Sizderdiń respýblıkalaryńyzdyń qazirgi basshylyǵymen de seriktestik, sonymen birge dostyq qarym-qatynas saqtap qalǵanymyzǵa qýanyshtymyn", dedi Berdibek Saparbaev. Sondaı-aq, ákim búginde Reseı Federasııasy, ásirese Tatarstan koronavırýsqa qarsy kúreste joǵary nátıjelerge qol jetkize bilgenin, bul eń áýeli dárigerlerdiń eren eńbeginiń jemisi ekenin atap ótti.

"Biz buǵan deıin Qazaqstanda bolǵan emespiz. Nur-Sultan, Almaty, Shymkent, Qaraǵandy sııaqty qalalar týraly estigenbiz. Shynyn aıtý kerek, Jambyl oblysy medısınasynyń deńgeıi aýyldyq kórsetkishpen birdeı dep oılaǵanbyz. Biraq biz qatelesippiz. Sizderdiń dárigerlerińiz koronavırýspen aýyratyn naýqastardy emdeýde qoldanatyn medısınalyq kómek úlgileri, emdeý hattamalary, tipti aýyldyq jerdegi medısınalyq kómek kórsetý modelderińiz is júzinde Reseıdegiden esh aıyrmashylyǵy joq. Sizderden de úırenetin nársemizdiń bar ekenin moıyndaımyz. О́kinishke qaraı, búginde álemniń birde-bir elinde koronavırýsty emdeýdiń naqty hattamasy joq. Sondyqtan bizdiń kezdesýimiz tájirıbe, pikir almasýǵa negizdelgen. Biz qazaqstandyq mamandarmen birge koronavırýspen kúreske úlesqosamyz dep úmittenemiz", deıdi top jetekshisi, Tatarstan Respýblıkasy Ortalyq okrýgi basshysynyń koronavırýstyq ınfeksııasy bar naýqastarǵa reanımasııalyq kómek kórsetý jónindegi orynbasary Aleksandr Vanıýshın. О́z sózinde Berdibek Saparbaev búginde óńirde jaǵdaıdyń turaqtanǵanyn jetkizdi. «Oblysta koronavırýspen aýyratyndardyń sany 3391 adamdy quraıdy. Qazirgi kezde olardyń jartysyna jýyǵy emdelip shyqty. Infeksııalyq jáne provızorlyq stasıonarlar ashylyp, aýrýhanalar men dárihanalardy dári-dármekpen qamtamasyz etý máselesi sheshildi. Degenmen, medısınalyq jabdyqtarmen qamtýda másele bar. Ásirese ókpeni jasandy jeldetý apparattarynyń jetispeýshiligi baıqalady. Bul máseleni sheshýge biz kásipkerlerdi, iri kompanııalardy tarttyq. Tamyz aıynda barlyq medısınalyq mekemelerdi ókpeni jasandy jeldetý apparattarymen tolyq qamtamasyz ete alamyz dep oılaımyn. Jaqyn arada oblystyń barlyq aýdandary úshin 10 kompıýterlik tomograf satyp alý josparlanyp otyr. Kadr tapshylyǵy máselesin sheshý úshin zeınet demalysyndaǵy dárigerler men medısınalyq joǵary oqý oryndarynyń túlekterin de jumysqa shaqyrttyq. Bul jumysqa shamamen 300-ge jýyq adam tartyldy», dedi Berdibek Saparbaev. Sonymen qatar, ol óńirdegi jáne jalpy respýblıkadaǵy jaǵdaıdyń turaqtanǵanyna qaramastan, áli ony jaqsy dep baǵalaýǵa bolmaıtynyn aıtty. Sondyqtan Qazaqstan Prezıdentiniń karantındi taǵy eki aptaǵa uzartý, sodan keıin baryp birtindep shekteý sharalaryn jeńildetý týraly sheshiminiń durys ekenin atap ótti.

Kezdesý sońynda ózderiniń Qazaqstanǵa kelýine múmkindik jasaǵany úshin Qazaqstan Úkimetine jáne Jambyl oblysynyń basshylyǵyna rızashylyqtaryn bildirdi. Sondaı-aq, jambyldyq dárigerlerdi Tatarstanǵa issaparmen kelýge shaqyrdy.

 

Jambyl oblysy

Sońǵy jańalyqtar

Tashkent tragedııasy

Sport • Keshe

Uqsas jańalyqtar