Aımaqtar • 30 Shilde, 2020

Jambylda sıfrlandyrý jumystary álsiz ári júıesiz júrgizilýde

20 ret kórsetildi

Taraz qalasynda aǵymdaǵy jyly 1 tamyzdan bastap qoǵamdyq kólikterge tólem jasaýdyń elektrondy júıesi iske qosylý kerek bolatyn. Alaıda, oǵan kedergi keltirip otyrǵan máseleler bolǵandyqtan bul bastama keıinge shegerildi. Atalǵan máseleni Taraz qalasynyń ákimi Aıtqazy Qarabalaev karantınge baılanysty tehnıkany jetkizýde qıyndyqtar týyndaǵanymen túsindirdi, - dep jazady Egemen.kz

Qala ákiminiń aıtýynsha, qajetti jabdyqtar tamyz aıynyń basynda Qytaıdan jetkiziledi eken. Sondaı-aq, elektrondy kartalar josparlanǵan merzimnen sál keshirek Reseı memleketinen ákelinedi. Paıda bolǵan máselelerge baılanysty Aıtqazy Qarabalaev Jambyl oblysynyń ákimi Berdibek Saparbaevtan elektrondy bıletter júıesin engizýdi 15 tamyzǵa aýystyrýdy surady. Qala ákimi óz sózinde "Tulparcard" veb-saıty men mobıldi qosymshasy jasalyp jatqandyǵyn da aıtyp ótti.

Alaıda Berdibek Saparbaev Taraz qalasynyń ákimdigi de, oblystyq jolaýshylar kóligi jáne avtomobıl joldary basqarmasy da qolma-qol aqshasyz tólem júıesin engizýge tıisti deńgeıde kóńil bólmegenin aıtty. Áýel bastan ózge óńirlerdiń tájirıbesin zerdelep, barlyq qatelikterdi eskerýi kerek ekenin eskertti. Sondaı-aq, ol Taraz qalasynyń ákimine qala turǵyndary arasynda aqparattandyrý jumystaryn júrgizip, júıeniń qalaı jumys isteıtinin túsindirýdi tapsyrdy "Tulparcard" elektrondy kartasy balalarymyzdy qorǵaýǵa tamasha múmkindik beredi. Qosymsha fýnksııalardy qosý kerek. Siz bul kartalardy mektepke kirý úshin paıdalanyp, ashanada túski as úshin tólem jasaı alasyz. Al, mobıldi qosymsha ata-analarǵa balalaryn baqylaýǵa múmkindik berýi kerek. Osy fýnksııalardyń bári júıe iske qosylǵanǵa deıin elektrondyq kartaǵa jáne mobıldi qosymshaǵa enýi tıis", dedi Berdibek Saparbaev.

Basqosý barysynda óńirdegi sıfrlyq tehnologııalardy damytý máseleleri de talqylandy. Investorlarǵa qyzmet kórsetý, jobalyq basqarý jáne sıfrlandyrý ortalyǵynyń basshysy Damır Egizbaev "Sıfrly Qazaqstan" Memlekettik baǵdarlamasyna sáıkes "Aqyldy qala" tujyrymdamasynyń júzege asý barysy týraly baıandady. Sıfrlyq tehnologııalardy damytýda qurylys, áleýmettik sala, ekologııa, qaýipsizdik, kólik, turǵyn úı-kommýnaldyq sharýashylyq, bıznes jáne týrızm salalarynda tómen kórsetkishter baıqalatyny aıtyldy. Bul oraıda Berdibek Saparbaev tıisti basshylarǵa "Aqyldy qala" tujyrymdamasyn júzege asyrý jumystaryn júıeleýdi júktedi. Sonymen qatar, ákim óńirde sıfrlandyrý jumystary álsiz jáne júıesiz júrgizilýde ekenin aıtyp, sala jumysyn synǵa aldy. "Investorlarǵa qyzmet kórsetý, jobalyq basqarý jáne sıfrlandyrý ortalyǵy men basqarmalardyń ózara kelisim men úılesimdi jumysy kórinbeıdi. Biz ómirimizdi jaqsartýdyń kóptegen múmkindikterdi jiberip alamyz. Prezıdent Qasym-Jomart Toqaev sıfrlandyrý tek bir salany jetildirýge ǵana emes, ekonomıka men qoǵamdyq ómirdegi eleýli ózgeristerge de baǵyttalǵanyn árdaıym aıtyp keledi. Tirshiliktiń barlyq salalaryna ozyq jáne zamanaýı tehnologııalardy engizý basym mindet bolyp qalýy tıis", dedi Berdibek Saparbaev.

 

Jambyl oblysy

Sońǵy jańalyqtar

Uqsas jańalyqtar