Aımaqtar • 30 Shilde, 2020

Bilim jáne ǵylym mınıstrligi men Maıkrosoft-Qazaqstan mámilege keldi

346 ret kórsetildi

Qazaqstan Respýblıkasy Bilim jáne ǵylym mınıstrligi men Maıkrosoft-Qazaqstan oqý prosesiniń sapasyn jaqsartý jáne sıfrlandyrý arqyly qazaqstandyq bilim men ǵylymnyń básekege qabilettiligin arttyrý úshin bilim berýdi sıfrlyq túrlendirý salasyndaǵy yntymaqtastyqty damytý múmkindigin qarastyrýǵa nıet bildirdi, - dep jazady Egemen.kz

Osy maqsatta taraptar О́zara túsinistik týraly memorandýmǵa (О́TM) qol qoıdy. Nıetterge sáıkes, bilim berýdi sıfrlyq túrlendirý salasyndaǵy áleýetti yntymaqtastyq kelesi baǵyttardy qamtıdy:

– Bilim berýdi sıfrlyq túrlendirý salasyndaǵy yntymaqtastyqty keńeıtý jáne damytý;

– Qazaqstan Respýblıkasy bilim berý júıesiniń pedagogtary men oqýshylarynyń sıfrlyq saýattylyǵyn, sıfrlyq daǵdylary men quzyrettiligin arttyrý;

– Inklıýzıvti bilim berýdi damytý salasyndaǵy yntymaqtastyqty keńeıtý;

– Bilim berý sıfrlyq baǵdarlamalary men baǵdarlamalyq-tehnıkalyq sheshimderdi ilgeriletýge baǵyttalǵan birlesken jobalardy ázirleý jáne ótkizý;

– Tájirıbe almasý jáne Microsoft korporasııasynyń bilim berýdi túrlendirýdegi úzdik álemdik tájirıbelerin usyný

"Sıfrlyq tehnologııasyz zamanaýı bilim berý múmkin emes. Mektepterde 1-synyptan bastap balalar sıfrlyq tehnologııalardy oqı bastaıdy, sál keıinirek algorıtmder men baǵdarlamalaý bastalady. Osylaı barlyq deńgeılerde. Tipti ýnıversıtetterdegi pánaralyq baǵyttar kompıýterlik ǵylymdardy zertteıdi. Memorandýmǵa qol qoıý – Microsoft kompanııasymen "sıfrlyq bilim berýdi" qurý baǵytyndaǵy jumystyń jalǵasy bolyp tabylady", deıdi Qazaqstan Respýblıkasynyń bilim jáne ǵylym vıse-mınıstri Bıǵarı Rústem.

Memorandým aıasynda Microsoft "Microsoft Education Transformation Framework" ádisnamasy negizinde bilim berýdi túrlendirýde úzdik tájirıbelerdi usynady.

"Microsoft Digital Literacy" oqý josparyn jáne "Microsoft Innovative Educator" ("Innovasııalyq pedagog") halyqaralyq baǵdarlamasyn usyný arqyly pedagogtar men oqýshylar arasynda sıfrlyq saýattylyqty arttyrýǵa qoldaý kórsetedi.

"Sıfrlyq tehnologııalar oqytýdy áldeqaıda qyzyqty, tıimdi jáne ınklıýzıvti ete alady, stýdentterge bolashaq mamandyqtary úshin qajetti daǵdylar men bilim beredi jáne muǵalimderge balalardy oqytýda ınnovasııalyq tásilderdi engizý úshin qajetti quraldardy usynady. Microsoft bilim berý sheshimderi ár oqýshyǵa kóptegen jetistikterge jetýge múmkindik beredi. Bizdiń birlesken josparlarymyz Qazaqstan Respýblıkasynda bilim berýdi sıfrlyq túrlendirý prosesin jedeldetedi dep úmittenemiz", - dep atap ótti Maıkrosoft-Qazaqstan dırektory Tıbor Koleıak.

 

 

ALMATY

Sońǵy jańalyqtar

Tashkent tragedııasy

Sport • Keshe

Uqsas jańalyqtar