Onyń aıtýynsha, 2020 jyldyń qańtar-maýsym aılary aralyǵyndaǵy qor men kompanııalar tobynyń operasııalyq kirisi 215 mlrd teńgeni qurady. Al bul jospardaǵy mejeden 79 mlrd teńgege kóp.
«Samuryq-Qazyna» Ulttyq ál-aýqat qory» AQ kompanııa tobynyń 2020 jyldyń I jartyjyldyǵyndaǵy taza kirisi 212 mlrd teńge bolyp otyr. Negizgi jospar boıynsha 150 mlrd teńge kóleminde shyǵyn kútilgen. 2020 jyldyń sońyna deıin kompanııanyń taza kirisi josparda 167 mlrd teńge dep kórsetilgenine qaramastan, kiris 421 mlrd teńge deńgeıinde bolady dep kútilýde.
Ernar Janádildiń sózine qaraǵanda, naryqtaǵy daǵdarystyq tendensııalar toptyń qarjylyq nátıjelerine aıtarlyqtaı áser etken. Degenmen qordyń portfeldi kompanııalary Covid-19 pandemııasy saldarynan jańartylǵan josparly kórsetkishti oryndap jatyr jáne qarjylyq turaqtylyqty saqtaý boıynsha is-sharalardy jalǵastyryp jatyr.
«2019 jyldyń qorytyndysy boıynsha Qor 206 mlrd teńge kóleminde taza paıda aldy. Dıvıdendterdi tóleýshi retinde Qor barlyq kiristi memleketke jiberedi. 2019 jyly KAP aksııalarynan qosymsha ornalastyrýdan túsken 49 mlrd teńgeni Ulttyq qorǵa baǵyttady. Sonymen qatar 2019 jyldyń qorytyndysy boıynsha Qor Úkimetke 120 mlrd teńge kóleminde dıvıdendter jiberedi. Qordyń jalǵyz aksıoneri Úkimettiń tapsyrmasyna sáıkes qalǵan qarajat Túrkistan jáne Nur-Sultan qalalaryndaǵy áleýmettik nysandardy qarjylandyrýǵa jumsalady», deıdi Ernar Janádil.
Onlaın-brıfıng barysynda qor portfeldik kompanııalardyń qarjy resýrstaryn basqarý máselesindegi tásildi qaıta qarap, naryqtaǵy jaǵdaıǵa baılanysty shyǵystardy qysqartqany máim boldy.
«Syrtqy ortadaǵy úlken ózgeristerdi eskere otyryp, kompanııanyń jańartylǵan damý josparyna sáıkes top shyǵyndardy 429 mlrd teńgege qysqartty. Toptyń kompanııalary óndiristegi shyǵyndar men kompanııalardyń strategııalyq maqsattaryn eskere otyryp, shyǵyndardy ońtaılandyrý boıynsha sharalar qabyldady», dedi Ernar Janádil.
2020 jyldyń 6 aıynda qor toby boıynsha debıtorlyq bereshek 60 mlrd teńgege tómendep, 661 mlrd teńgeni qurady.
Ernar Janádil oń qarjylyq kórsetkishter munaıdyń ortasha baǵasynyń ósýine, teńgeniń dollarǵa qatysty baǵamynyń nyǵaıýyna, sondaı-aq kompanııalar toby qyzmetiniń nátıjelerine baılanysty ekenin jetkizdi.
Birinshi jartyjyldyqta makroekonomıkalyq ahýaldyń nasharlaýyna qaramastan, qordyń jalpy boryshy 3,9%-ǵa azdap ulǵaıǵan. Bul rette toptyń syrtqy boryshy jyl basyndaǵy kórsetkishpen salystyrǵanda tómendedi. Ernar Janádil jalpy qaryzdyń 8,8 trln teńgeden 9,2 trln teńgege deıin ulǵaıýyn teńgeniń álsireýimen baılanysty-
rady.
Sóz sońynda Ernar Janádil Toptyń qarjylyq turaqtylyǵyn nyǵaıtý jónindegi is-sharalardyń jalǵasatynyn habarlady.
