Kúni keshe jol-kólik oqıǵasy oryn alyp, nátıjesinde eki jolaýshy zardap shekti jáne joldan tysqary jerde turǵan kólikterge zaqym keltirildi. Oqıǵa saǵat 21 shamasynda Jambyl men Partızan kósheleriniń qıylysynda bolǵan. VAZ-21099 avtokóliginiń júrgizýshisi qarama-qarsy baǵytta kele jatqan Nissan Qashqai kóligimen soqtyǵysýdan jaltaramyn dep rólge ıe bola almaı, trotýarǵa shyǵyp ketip, onyń ar jaǵynda toqtap turǵan qymbat sheteldik kólikterdi soqqan. Nátıjesinde VAZ kóliginiń 2 jolaýshysy dene jaraqattarymen aýrýhanaǵa jetkizilip, medısınalyq kómek aldy. Al toqtap turǵan Toyota Land Cruiser men Hyundai kólikterine mehanıkalyq zaqymdar keltirilgen. VAZ-dyń ózi de qatty zaqymdanǵan.
Bir qyzyǵy júrgizýshige berilgen medısınalyq anyqtama onyń araqtan saý bolǵanyn kórsetken. Qazir is prosessýaldyq sheshim qabyldaý úshin Petropavl qalasynyń mamandandyrylǵan ákimshilik sotyna tapsyrylǵan. Sap-saý júrgizýshiniń tar jerde jol tártibin buzǵandyǵynyń syry ázirge belgisiz.
Bir qyzyǵy dál sol qıylysta shamamen keshki saǵat 23-de "Audi" avtokóliginiń júrgizýshisi bir baǵytta kele jatqan Mitsubishi Galant kóligimen soǵylǵan. Buryn da osy jerde kóp apat bolatyndyqtan maýsym aıynda quqyq buzýshylyqtardy tirkeıtin "Mıraj" avtomattandyrylǵan júıesi ornatylǵan bolatyn. Biraq soǵan qaramaı bir aıdyń ishinde atalǵan ýchaskede jyldamdyqty asyrýdyń 60-tan astam faktisi tirkelgen. Jalpy, "jyl basynan beri oblysta 98 jol-kólik oqıǵasy oryn alyp, sonyń saldarynan 13 adam kóz jumyp, 129-i jaraqat aldy", - deıdi SQO Polısııa departamenti Jergilikti polısııa qyzmeti basqarmasy bastyǵynyń mindetin atqarýshy Grıgorıı Tysh.
PETROPAVL
