Áleýmettik dámhana qyzmetkerlerimen kezdesti

Kómek aıasynda Senat Tóraǵasy Máý­len Áshimbaev elordamyzdaǵy «áleý­mettik» dámhanaǵa arnaıy baryp, me­kemeniń ujymymen kezdesti. Bul jerde erekshe qajettiligi bar jáne áleýmettik qorǵalmaǵan sanattaǵy azamattar jumys isteıdi.

Sońǵy jyldary elimizde «áleýmettik kásipkerlik» salasy jańasha qarqynmen damyp keledi. Beıresmı málimetke súıensek, qazirgi tańda Qazaqstanda 200-ge jýyq áleýmettik bıznes nysany halyqqa túrli qyzmet kórsetedi. Alaı­da bul sala ázirge zańnamalyq tur­ǵydan rettelmegen. О́z sózinde Máý­len Áshimbaev aldaǵy ýaqytta osy ba­ǵyt­taǵy jumystar qolǵa alynatynyn aıtty.

– Memleket basshysy jyl basynda áleýmettik kásipkerlermen arnaıy kezdesken bolatyn. Sol kezde Emın As­kerovtiń jáne basqa da kásipkerlerdiń barlyq usynystaryna qoldaý bildirdi. Aldaǵy ýaqytta biz Qazaqstanda osyndaı dámhanalar men kásiporyndar kóp­tep ashylýy úshin kásiptiń bul túrin zańnamalyq turǵydan retteýge qajetti kómek kórsetemiz. Qazir áleýmettik ká­sip­kerler óz kúshterimen eńbek etip júr. Biraq olardy qoldaý úshin tıisti zań­dar qabyldaý kerek. Biz osy baǵytta da jumys isteıtin bolamyz, – dedi Senat Tóraǵasy.

Sonymen qatar ol osy kúnderi kóp­tegen qazaqstandyqtardyń muqtaj jan­darǵa belsendi túrde qoldaý kórsetip jatqanyna nazar aýdardy.

– Qurban aıt qaıyrymdylyq pen meıirimdilikti dáripteıtin meıram. Sondyqtan bul kúnderi bir-biri­miz­ge jaqsylyq jasaýdyń mańyzy zor. Ásirese búgingideı pandemııa jaǵdaı­yn­da muqtaj jandarǵa qoldaý kórsetýdiń jáne olarǵa kómek qolyn sozýdyń máni erekshe. Sondyqtan qazirgi tańda aza­mat­tarymyzdyń ultyna, dinine qaramaı, ózara qaıyrymdylyq jasap, kómektesip jatqanyn aıryqsha atap ótken jón. Ásirese volonterler belsendilik tanytýda. Bul qoǵamnyń birtutastyǵyn kórsetedi, – dedi Máýlen Áshimbaev.

Senat Tóraǵasy dámhana qyz­met­kerlerin Qurban aıt merekesimen qut­tyq­tap, olardyń árqaısysyna qurban­dyqtyń eti salynǵan azyq-túlik qorjy­ny men estelik syılyqtar tartý etti. Sondaı-aq Senat Tóraǵasy áleý­met­tik dámhananyń basshysy Emın As­kerovke erekshe qajettiligi bar jandardy jumyspen qamtyǵany úshin alǵys bildirdi.

– Jalpy, mundaı qoldaýǵa múmkindigi shekteýli jandar erekshe muqtaj ekeni belgili. Alaıda biz olarǵa tek kómek berip qana qoımaı, qoǵamǵa beıimdelýine jaǵdaı jasaýymyz kerek. Olardyń jumysqa qabilettileri adal eńbekpen aqsha tabýyna, bir-birimen aralasýyna, ortaǵa úırenip, otbasyn qurýǵa jáne ózin ózi damytýǵa múmkindik týǵyzýy qa­jet. Osy turǵydan kelgende Emın Aske­rov úlken jumys atqaryp otyr, – dedi Senat Tóraǵasy.

Aıta keteıik, atalǵan dámhana karantın kezinde de jumysyn jalǵastyryp jatyr. Tapsyrysty tutynýshylarǵa jet­kizip berý isi uıymdastyrylǵan jáne kelgen qonaqtarǵa tek ashyq aspan as­tyn­da qyzmet kórsetiledi. Barlyq saq­tyq sharalary men sanıtarlyq talaptar qatań saqtalǵanyn da atap ótken jón.

Emın Askerov birneshe áleýmettik ká­siporyn ashyp, elimizde osy baǵyttyń jandanýyna úlken úles qosyp kele jatqan kásipkerlerdiń biri. Ol ashqan kásip­oryndarda múmkindigi shekteýli jandar, úısiz júrgender, buryn sottal­ǵandar jáne túrli táýeldilikke shal­dyq­qandar jumys isteıdi. Olar óz qabi­letterin tigin sehynda, jıhaz fabrıkasynda, avtokólik jýý ornynda jáne dámhanada paıdaǵa jaratýda.

Aıt kúnderi senatorlar basqa da túrli qaıyrymdylyq sharalaryna belsene qatysýda. Atap aıtqanda, Senat tarapynan Qazaqstan musylmandary dinı basqarmasy men «Zeket» qory uıym­das­tyrǵan qurbandyq shalý rásimin onlaın-formatta ótkizý bastamasyna qoldaý kórsetildi. Soǵan baılanysty Pala­tanyń birqatar depýtaty men apparat qyzmetkerleri qurban2020.kz saıtynyń qyzmetine júginip, qurbandyq shalýǵa nıet etti.

Bıyl kóp salaǵa pandemııanyń keri áseri tıgeni belgili. Sonyń ishinde dinı meıramdardy atap ótý formaty da ózgeriske ushyrap jatyr. Alaı­da bul keleńsizdik azamattardyń qaıy­rym­dy­lyqpen aınalysýyna eshqandaı tos­qaýyl bola almaıdy. Sondyqtan bıyl da jyl­daǵy dástúr boıynsha qur­ban­dyq­tyń eti muqtaj jandarǵa taratylýda.

Senatorlardyń bastamasymen ettiń bir bóligi indetpen kúresip, halyqtyń densaýlyǵy úshin aıanbaı eńbek etip júrgen medısınalyq qyzmetkerlerdiń otbasylaryna da beriletin boldy. Qazirgideı kúrdeli kezeńde olardy qoldaý úshin Senat apparatynyń qyz­met­kerleri elordalyq dárigerler Sma­ǵu­lovtar otbasyna baryp, aıtpen qut­tyq­tady jáne balalaryna jańa oqý jylynda qashyqtan oqýǵa qajetti kompıýter syılady.