Baqytqa toly balalyq shaǵyn qansha qıǵysy kelmeı jatsa da, kózin áreń ashyp, jan-jaǵyna alaq-julaq qaraıdy. Manaǵy keń, jyly ári keremet úı mezette lashyqqa aınalyp ketkendeı. Jarq-jurq etken naızaǵaı men nóserlep jaýǵan jańbyr olardyń panalaǵan baspanasyn ushyryp áketetindeı...
Las eden, qýystaı bólmeniń bir buryshynda araqqa sylqııa toıyp, búrisken ákesi men anasy. Olardan sál alshaqtaý jerde ábden tozyǵy shyǵyp, jyrtylǵan kórpe ústinde, jartylaı jalańash naızaǵaı daýysynan shoshyp shyryldap jylaǵan eki jasar Omar atty inisi. Úıde syldyraǵan bos bótelke men kógergen nannan basqa, júrek jalǵar eshteńe de joq edi.
Aısha osy kóriniske ábden eti úırengendeı, aqyryn ornynan turyp, inisiniń qasyna bardy. Baýyryn jubatqandaı bolyp, mańdaıynan súıip, ústine qalyńyraq ákesiniń jaman jeıdesin qabattap japty. Omardyń qasyna jantaıa jatyp, jartylaı synǵan terezeniń bir buryshynan nóserli dalaǵa kóz qyryn salady.
«О́mirge ne úshin keldim?», «Men kimge kerekpin?» degen suraqtar men ata-anaǵa degen renish Aıshany tez eseıtip jibergendeı. Birese osyndaı taǵdyryna ókpelep, birese áke-sheshesiniń bar ekendigine, aman ekendigine, qastarynda ekendigine shúkirshilik etedi. Inisi Omarmen óziniń eseıgen shaqtaryn, bilim alyp, jumys istep, baqytty ǵumyr keshetindikterin oılaı óz-ózin jubatyp jatyp, kózi ilinedi. Kúni búginge deıin ony jylytyp, kúsh berip kele jatqan da osy, asqaq armandary men úzilmes úmitteri bolatyn.
Uıqyǵa ketken sátten bastap, Aısha tátti qııaldarynyń qushaǵyna enip, qanat bite ushyp júrgendeı kúıge keneletin.
Bul – búginde óz búldirshinderiniń bolashaǵyna qolyn bir silteı qaraıtyn otbasylarda ósip kele jatqan kirshiksiz sábılerdiń bir kúndik tirshiligi edi.
Saǵynysh IBRAGIM,
stýdent
