Qazaq qashannan on saýsaǵynan óner tamǵan ismer jandarǵa kende emes. Al sol ismer jandar men qolóner sheberlerin oqyrmandaryna tanystyryp, ulttyq ónerdi dáripteý maqsatynda S.Báıishev atyndaǵy oblystyq ámbebap-ǵylymı kitaphanasy biraz jumystar atqarǵanyn aıtý paryz. Oǵan dálel, tiginshilik óner arqyly adamnyń boıyna shabyt berip, kóńilge shattyq uıalatyp, qazaq qyz-kelinshekterin ulttyq kıim-keshekterimen júzderin jarqyn etip júrgen Aqtóbe óńiriniń jas tiginshisi, qolóner sheberi Trýmova Aınur Maratqyzymen «Tiginshilik – qol men qııaldyń eńbegi» taqyrybynda onlaın sheberlik sabaǵyn ótkizdi.
Jalpy, tigin ónerkásibi – álem ekonomıkasynyń aldyndaǵy úlesi men salmaǵy joǵary kásip desek te bolady. Jas tiginshi Aınur Maratqyzy S.Báıishev atyndaǵy oblystyq ámbebap-ǵylymı kitaphanasynyń oqyrmandaryna tigin kásibine qalaı qadam basyp, súıikti isimen qaı ýaqyttan beri aınalysyp kele jatqany týraly oı bólisip, qazaqtyń ulttyq kıimderiniń biri kájekeıdiń qarsy ilgegin qalaı tigý qajet ekenin túsindirip qana qoımaı, ony tigý tásilimen bólisti.
Tiginshilik, qolóner sheberligimen aınalysý búgingi zamannyń eń tabysty bıznesiniń biri. Jas tiginshi Aınur Maratqyzy óziniń súıikti isimen aınalysyp, tiginshilik ónerdi kásip etip keledi. Kókiregi, arqasy jabyq, qazaqtyń qyz-kelinshekterine arnalǵan qoljetimdi kóılekter tigedi. Qymbat tastarmen áshekeılep, qazaq qyzynyń sulýlyǵyn ádemi kóılekterimen odan ári kórkeıtip, nárlendirip keledi. Qazirgi tańda salt-dástúrimiz ben ónerimizdi dáriptep, ulttyq naqyshtaǵy kıimderimizdi maqtan etip, «júzigi altyn bolǵansha, júzi jarqyn bolsyn», dep oı túıetin qazaq qyzdarynyń kóbeıgeni qýantady.
Nazerke QULJANOVA,
S.Báıishev atyndaǵy oblystyq ámbebap-ǵylymı kitaphananyń kitaphanashysy
AQTО́BE
