Ejelden topyraǵy qoıyndas, mal-jany aralas Syr boıy men qazynaly Qaraǵandynyń úzilmegen baýyrlastyq úrdisi óskeleń zaman talabyna saı qaıta jańǵyryp, nyǵaıyp kele jatýyna jarqyn mysaldar jetkilikti.
Ejelden topyraǵy qoıyndas, mal-jany aralas Syr boıy men qazynaly Qaraǵandynyń úzilmegen baýyrlastyq úrdisi óskeleń zaman talabyna saı qaıta jańǵyryp, nyǵaıyp kele jatýyna jarqyn mysaldar jetkilikti.
Táýelsizdik jyldarynda jańasha sıpatta jalǵasýshy ózara óńiraralyq mádenı, ekonomıkalyq yntymaqtastyq kórshiles aımaqtar ómiriniń damý ekpinine sony serpin estirip te otyr. О́ndiristi ólke mádenıeti men óneriniń Qyzylordadaǵy kúnderi sonyń naqty bir kórinisine aınalyp, elimizdiń erteńin eńseleter jasampaz ister izin tereńdetýge tyń jol saldy. Sondaı-aq, shahardyń qurylǵanyna 195 jyl tolýy merekesimen tuspa-tus kelip ótken bul mereıli shara Syrdy Arqanyń án men jyr samalyna bólep qoımaı, nıettes seriktestikke yntalandyrǵan san salaly sharýashylyqtyń keń tynysyn alǵa jaıdy.
Elbasynyń tapsyrmasy boıynsha atqarylýdaǵy memlekettik jáne salalyq baǵdarlamalardyń mańyzdy bóligi qos oblystyń úlesine de tıse, sonyń ishinde «Qumkól», «Qaraqoıyn» munaı aıdaý qubyrlary, Jezqazǵan – Beıneý temir jolynyń Sekseýilmen túıisetin qurylysy maqsaty ortaq, múddesi bir qoıyn-qoınaýy baılyqqa toly aımaqtar ıgiligin birlesip eseleýge serpilis berýde.
«Saryarqa – saıran elim» atty taqyryp aıasynda án men kúıge kúmbirlegen kúnder jas jaǵynan da, joly jaǵynan da úlken qalany ásem áýenge terbetti. Qaraǵandylyqtardyń mádenıet jáne óner merekesi Ábdilda Tájibaev atyndaǵy ámbebap ǵylymı kitaphanada «Saryarqa – dalalyq órkenıettiń altyn besigi» kórmesiniń kórsetilýimen bastalyp, Nartaı Bekejanov atyndaǵy drama teatry ǵımaratynda arnaıy ázirlengen Arqanyń injý-marjany tógilgen saz keshimen jalǵasty. Erteden de «Arǵyndar «ahaý» dese, ketedi uzap, kisideı byltyr ketip, bıyl kelgen» deıtin ázil sózderi bar jergilikti jurtty Meıirhan Adambekov, Jaqsygeldi Kemalov, Serjan Musaıyn syndy sańlaq ónerpazdar shyrqaǵan týǵan topyraqtarynyń aspandaǵan, myń buralǵan ánderi qulaq quryshyn qandyrdy.
Qazaqta sulý Syr eline arnalǵan ásem áýender az ba! Aqyn Serik Aqsuńqarulynyń sózine shyǵarylǵan tanymal sazger Esjan Ámirovtiń qasıetti darııa sýyndaı tolqyp syńǵyrlaǵan «Qydyr qonǵan – Qyzylordam» áni solardyń qatarynan oryn alǵandaı qyzylordalyqtarǵa tamasha tartý boldy.
Memleket basshysy bilimin tereńdetken Qaraǵandy memlekettik tehnıkalyq jáne Qorqyt ata atyndaǵy Qyzylorda ýnıversıtetteri arasynda oqytý júıesin, ǵylymı baılanystardy jetildirý boıynsha kelisimshart jasaldy. Elimizge belgili ınjener kadrlary qanat qaqqan Ortalyq Qazaqstandaǵy bedeldi oqý ordasynyń rektory, UǴA akademıgi Arystan Ǵazalıev munaı men gaz salasy mamandaryn daıarlaý bólimi ashylýyna oraı osy qazyna mol óńir talapker jastaryna jol ashyqtyǵyn aıtyp, qýantty.
Qaraǵandylyqtar delegasııasynyń bir qaýym shoǵyrly tobyn bastap kelgen oblys ákimi Baýyrjan Ábdishev qarsy alýshy óńir basshysy Qyrymbek Kósherbaevpen birge Syrdarııa arnasyn bógep, kúrish alqaptaryna sý tartý qurylysyn baryp kórdi. Sondaı-aq, Nazarbaev zııatkerlik mektebinde bolyp, oqýshylarǵa ınteraktıvti taqta tartý etti. О́ńiraralyq mádenı baılanystar men ekonomıkalyq yntymaqtastyqty nyǵaıtýǵa arnalǵan memorandýmǵa qol qoıylý rásiminde Baýyrjan Túıteuly Elbasynyń aımaqtardyń áriptestiktiń barlyq deńgeıin kóterý tapsyrmasyna sáıkes jańǵyrtylǵan bul shara damý qadamyn qaryshtatýǵa yqpaly zor bolmaqtyǵyn ataı kelip, óndiris oshaǵy retinde oblystyń kórshilik kómek-qoldaýdy kúsheıtýi mereıli mindet sanalady dedi. О́z kezeginde Qyrymbek Eleýuly munyń óte mańyzdy jáne tálimdi tájirıbe ekenin aıtyp, ekijaqty yntymaqtastyq arta beretindigine, ekonomıkalyq áleýeti myqty ólkeniń soǵan shynaıy yntasy men múddelestigine rızalyq bildirdi.
Aıqyn NESIPBAI,
«Egemen Qazaqstan».
Qyzylorda – Qaraǵandy.
