"Qurylǵanyna úsh jyl tolmaǵan jas otbasylar depozıt ashyp, birden turǵyn úı qunynyń 50%-yn sala alady, sonda ıpoteka tómendetilgen mólsherlememen resimdeledi. Bizde negizinen 8,5%, al jas otbasylar úshin arnaıy 6% belgiledik. Suranys óte joǵary, bir aıda 1,5 myńǵa jýyq depozıt ashyldy», — dep habarlady L. Ibragımova.
Onyń aıtýynsha, qazir jas otbasynyń jasyn 3 jastan 5 jasqa deıin arttyrý máselesi qarastyrylyp jatyr.
«Qazir kóptegen otbasylar: “Nege 3 jyl? 5 jyl da jas otbasy úshin uzaq ýaqyt emes. Bizdi de qoldańyzdar” dep jazyp jatyr. Biz bul usynystardy qarastyramyz. Sondyqtan biz úshin Otbasy bank transformasııasy tek qaǵaz júzinde ǵana emes, is júzinde oryndalǵany óte mańyzdy. Biz barlyq otbasylar úshin mamandyqqa, áleýmettik mártebege qaramastan, teń qoljetimdi bolǵanyn qalaımyz», — dedi ol.
Tabysy tómen árbir otbasy tómen mólsherlememen ıpoteka alýǵa úmitker bolýy qajet.
«Osy qaǵıdalardy engizemiz, biz jyl sońyna deıin Indýstrııa jáne ınfraqurylymdyq damý mınıstrligimen birge, Úkimettiń qoldaýymen zańnamalyq bastamalardyń úlken toptamasyn iske asyryp, qoǵamǵa túsindiretin bolamyz, sodan keıin tolyq daıyn bolǵanda jáne Otbasy bankiniń atalǵan joǵary statýsyna saı bolǵan sátte biz qaıta ataý prosesin qolǵa alamyz», — dep atap ótti L. Ibragımova.
Jyljymaıtyn múlik naryǵyna keler bolsaq, bul qoǵamda kóp talqylanyp jatqan ózekti másele.
«Karantınnen keıin biz barlyq ıpotekaǵa degen qyzyǵýshylyqtyń artqanyn baıqadyq. Maýsym aıynda biz 5 myńnan astam qaryz berdik. Bul naýryz, sáýir jáne mamyrdan bastap keıinge qaldyrylǵan suranys. Shilde aıynda da suranys asa joǵary boldy. Biz sondaı-aq “Baqytty otbasy”, “Áskerı baspana” baǵdarlamalaryn iske asyryp jatyrmyz, “5-10-20” ótinimderin qaraýdy tolyqtaı tamyz aıynan bastaımyz. Aıta keterligi, elıtalyq turǵyn úı naryǵynda baǵanyń tómendeýi baıqalady, óıtkeni óte úlken qymbat páterlerge degen suranys tómen. Meniń oıymsha, qaıtalama turǵyn úı naryǵynda baǵa tómendeýi múmkin, óıtkeni onda bári satý jyldamdyǵyna baılanysty, ıaǵnı, eger siz qymbat baǵaǵa satqyńyz kelse, onda siz uzaq ýaqyt júrip qalasyz», — dep túsindirdi L. Ibragımova.
Onyń aıtýynsha, búgingi tańda Qazaqstanda jyljymaıtyn múlik baǵasynyń ósýine yqpal etetin eshqandaı faktorlar joq. Sonymen qatar uzaq merzimdi perspektıvada suranys joǵary bolady, óıtkeni jastar sany ósýde.
