Elimizdiń Joǵarǵy Sot Tóraǵasy bolyp qaıta taǵaıyndalǵan Qaırat Mámı joǵary sot organynyń alqa tóraǵalarymen, sýdıalarymen jáne apparat basshylyǵymen alǵashqy jumys keńesin ótkizdi.
Elimizdiń Joǵarǵy Sot Tóraǵasy bolyp qaıta taǵaıyndalǵan Qaırat Mámı joǵary sot organynyń alqa tóraǵalarymen, sýdıalarymen jáne apparat basshylyǵymen alǵashqy jumys keńesin ótkizdi.
Osyǵan oraı kún tártibinde birneshe mańyzdy másele belgilendi, dep bizge habarlaǵan Joǵarǵy Sottyń baspasóz qyzmeti, birinshi kezekte Joǵarǵy Sottyń Tóraǵasy sot júıesiniń qazirgi jaı-kúıine jáne Memleket basshysy birneshe ret aıtqan, kezek kúttirmeı sheshimin talap etetin problemalarǵa nazar aýdarǵan.
Máselen, uıymdastyrýshylyq jáne fýnksıonaldy sharalardyń tutas keshenin shuǵyl ázirlep, júzege asyrý qajet, olardyń basty maqsaty – sot júıesiniń ımıdjin kóterý, azamattardyń sottarǵa degen joǵalǵan senimin qaıtarý, qoǵamnyń úmitine sáıkes sot tóreliginiń tıimdiligin túbegeıli kóterý, – dep atap ótken Q.Mámı. Konstıtýsııalyq normalarǵa sáıkes sýdıanyń mártebesin túbegeıli nyǵaıtý, artyq ákimshilendirýden bas tartý jáne sot tóreligin júzege asyrý prosesine qandaı da bir bolsyn qolsuǵýshylyqty boldyrmaý kerektigin alǵa tartty. Osyǵan oraı Joǵarǵy Sottyń qadaǵalaýshy alqalarynyń tóraǵalaryna aldaryna qoıylǵan mindetterdi iske asyrýǵa baǵyttalǵan baǵdarlamalyq usynystardy daıyndaý boıynsha naqty nusqaýlar berildi.
Keńeste qaralǵan basqa da mańyzdy másele Qazaqstan sýdıalarynyń VI sezine daıyndyq barysy boldy. Q.Mámı bul baǵyttaǵy jumysty jandandyrýdy tapsyrdy: shuǵyl arnaıy komıssııany qurý, aldaǵy forýmnyń tujyrymdamasyn anyqtaý, sezde talqylaýǵa jatatyn basty baǵyttardyń sheńberin naqtylaý jáne aldaǵy naqty mindetterdi belgileý.
Kadr saıasaty týraly aıta kele, Joǵarǵy Sottyń Tóraǵasy túrli oryn aýystyrýlar men qaıta taǵaıyndaýlar týraly áńgimelerdi birden joqqa shyǵardy. Q.Mámı apparattyń barlyq qyzmetkerleri fýnksıonaldyq mindetterine sáıkes óz laýazymdarynda qaldyrylatyndyǵyna sendirdi. Uıymdastyrý-shtat qurylymyn odan ári jetildirýge qatysty bul prosess, Joǵarǵy Sot Tóraǵasynyń aıtýynsha, qajettiliktiń týyndaýyna baılanysty júzege asyrylatyn bolady.
Aleksandr TASBOLATOV,
«Egemen Qazaqstan».
