Sońǵy úsh kúnde Almatyda ótip jatqan bokstan álem chempıonaty ekvatordan asty. Sonymen, 13 kúnnen turatyn jahandyq jarys marafonynyń 8 kúni artta qaldy. Munda senbi-jeksenbi kúnderi 1/16 fınaldyq shaıqastar bolyp ótip, dúısenbi kúni 1/8 fınaldyq urystar bastalyp ketti. Bul – endi bir qyrdyń astynan ótken soń medaldardyń aýyly da kóz ushynan kórinedi degen sóz.
Sońǵy úsh kúnde Almatyda ótip jatqan bokstan álem chempıonaty ekvatordan asty. Sonymen, 13 kúnnen turatyn jahandyq jarys marafonynyń 8 kúni artta qaldy. Munda senbi-jeksenbi kúnderi 1/16 fınaldyq shaıqastar bolyp ótip, dúısenbi kúni 1/8 fınaldyq urystar bastalyp ketti. Bul – endi bir qyrdyń astynan ótken soń medaldardyń aýyly da kóz ushynan kórinedi degen sóz.
Endi osy úsh kúnniń kórsetkishterine sholý jasap óteıik.
19 qazan, senbi
Bul kúni bastalǵan ekinshi aınalymnyń, ıaǵnı 1/16 fınaldyń irikteý jekpe-jekterine 49, 64, 75 jáne 91 kıloǵa deıingi boksshylar qatysty. Al jarys kúniniń túndigin 49 kılo salmaqtaǵy bizdiń Birjan Jaqypov pen reseılik Belık Galanov ashty. Atalǵan eki boksshy bir-birine shyn máninde laıyqty qarsylastar edi. О́zinen 5 jas kishiligi bar qaısar jigitpen Birjan urys taktıkasyn óte saýatty qurdy. Ádette ol birinshi nómirmen oınamaıtyn. Oǵan kóbine shabýylǵa shyqqan básekelesiniń ashylyp qalǵan sátterinde soqqy berip otyrý úırenshikti qımyl edi. Muny kútpegen Belık júrisinen jańyldy. Birinshi raýndta osylaı basym túsken qazaqstandyq sol artyqshylyǵyn urys sońyna deıin saqtaı bildi.
Kelesi, 56 kıloǵa deıingi salmaqtaǵy Qaırat Erálıevtiń rýmyn Nıkolae Andreanamen jekpe-jegi buǵan qaraǵanda aýyrlaý ótti. Degenmen, bizdiń baǵlannyń jaqyn aıqasqa bara bermeı, qarsylasymen ara qashyqtyqty saqtaı otyryp, urys salýy onyń túptiń túbinde jeńiske jetýine basty tıek boldy. Ol rýmyndy alystan jasqaı ura júrip, upaı qoryn molaıta berdi. Munysyn tóreshiler de durys bezbenge salyp otyrypty. Qaırat 3:0 degen eseppen jeńisti sýyryp áketti. Bizdiń bul kúni rıngke kóterilgen quramadaǵy eń jasy kishi sańlaǵymyz 75 kıloǵa deıingi salmaqtaǵy Jánibek Álimhanuly keshki sessııada ázerbaıjandyq Soltan Mıgıtınovpen ushyrasty. Aıta ketý kerek, bul osy kúngi eń qyzýqandy aıqastardyń biri boldy. Qarsylasynyń alǵashqy nópir shabýylyna tótep bergen Jánibek ózine qolaıly dıstansııa taýyp aldy. Sol qashyqtyqtan Soltanǵa judyryq siltedi de otyrdy. Qulashtap uratyn shamada turǵan ol baqtalasyn soqqynyń astynda qaldyrdy. Biraq, jekpe-jektiń sońynda qarqynyn tómendetip aldy. Soǵan qaramastan, onyń basymdylyǵy aıqyn kórindi – 3:0.
Qalǵan salmaqtarda da osyndaı tartysty shaıqastar az bolǵan joq. Aıtalyq, Kýba ókili Iosvanı Veıtıanyń fılıppındik Mark Barrıgamen teketiresin sondaılardyń qataryna jatqyzǵan lázim. Soltústik Koreıa tarlany Chýng Rı AQSh atleti Leroı Devıdti utyp, muhıttyń arǵy jaǵynan kelgenderdiń azaıyp qalǵan qataryn burynǵydan da seldirete tústi. Pýertorıkalyq Entonı Chakon Rıvera men venesýelalyq Ronald Leon ashyq aıqastyń úlgisin kórsetti. Tóreshiler 2:1 degen eseppen bulardyń aldyńǵysyn utty dep eseptedi. 75 kıloǵa deıingiler arasynda reseılik Artem Chebotarev pen avstralııalyq Ross Veverdiń jekpe-jegi de erekshe toqtalýǵa turady. Munda orys boksshysynyń artyqshylyǵy sát saıyn baıqala berdi. Shamasy, qurlyq-memlekettiń bapkerleri óz shákirtteriniń jaıyn oılasa kerek, ekinshi raýndta ortaǵa oramal tastady. 91 kıloǵa deıingi salmaqta qazaqstandyqtarǵa jaqsy tanys Fılıpp Hrgovıchtiń shaıqasyna jurttyń báriniń nazary aýdy. Horvat jigiti muny anyq baıqady. Baıqady da baryn saldy. Ol qytaı atleti Gýanmıng Gýdy erkin jeńdi.
20 qazan, jeksenbi
Bul kúngi eń jarqyn shaıqastardyń birin Danııar Eleýsinov kórsetti. Ol Bagam araldarynan kelgen Karl Hıeld esimdi qarsylasyn erkin jeńdi. Sonymen birge, qazaqstandyq atlettiń kúshin kóp sarp etpeı, keıinge saqtap júrgeni de anyq baıqaldy. Budan keıin osy 69 kıloǵa deıingi salmaqta reseılik Aleksandr Bespýtın men mońǵol Tývshınbat Bıamba arasyndaǵy aıqas ymyrasyz kúreske tolylyǵymen erekshe este qaldy. Eki boksshy da aıanǵan joq. Olar urys bitkenge deıin qaıtpaı shaıqasty. Nátıjesinde tóreshiler pikirleri ekige jaryldy. Osy baǵa boıynsha 2:1 degen eseppen jeńiske jetken reseılik kelesi aınalymǵa ótti. Osyndaı aýyr aıqas venesýelalyq Gabrıel Maestre men vengr Imre Bashkaıdiń arasynda da oryn aldy. Jeńis jalaýy bulardyń alǵashqysyna buıyrdy. Al kýbalyq Arısnoıdıs Dıspaın óziniń týrnırdegi ekinshi kezdesýin de aıtarlyqtaı jarqylmen ótkize almady. Soǵan qaramastan, qazylar qaýymy ony aljırlik Ilıas Abbadımen teketireste basym boldy dep eseptedi.
81 kıloǵa deıingi salmaqta horvat Hrvoje Sep pen sırııalyq Alı Gossaýn arasyndaǵy talasta da osyndaı kelispeýshilik týyndady. Tóreshiler urys taǵdyryn sırııalyqtyń paıdasyna sheship bergenimen, qarsylasy buǵan kelispeıtin syńaı tanytty. Reseılik Bespýtınniń jeńisti jolyn onyń komandalasy Nıkıta Ivanov ta jalǵastyrdy. Ol túrik Avnı Iyldyrymdy talassyz utty. Onyń esesine, bul kúni birinshi orys boksshysy jarys jolynan shyǵyp qaldy. Ol – Dmıtrıı Polıanskıı ýkraınalyq attasy Dmıtro Chernıakqa jol berip qoıdy.
Bul kúni bizdiń jigitterden rıngke shyqqan úsh jigit te jeńis toıyn toılady. Osy qatardan joǵarydaǵy Danııardan basqa, 60 kılodaǵy Berik Ábdirahmanov pen 81 kılodaǵy Ádilbek Nııazymbetov te tabyldy. Ras, Beriktiń Danıelıto de la Rosamen aıqasy óte kúrdeli jaǵdaıda órbidi. Sol sebepti tóreshiler birjaqty bola almady. Al Ádilbektiń fın Vılle Hýkkenendi utqanyna eshbir kúmán bolǵan joq. Bizdiń baǵlan bul joly kúshin jartylaı ǵana paıdalanǵandaı áser qaldyrdy.
21 qazan, dúısenbi
Keshe úshinshi aınalymǵa 58 eldiń ókili jetkeni belgili boldy. Osy 1/8 fınaldyq aıqastardyń shymyldyǵyn ashqan Birjan Jaqypov ózbek Hasanboı Dýsmatovpen ustasty. Shaıqas basynan aıaǵyna deıin eki jaqtyń tolassyz shabýylymen órnekteldi. Buǵan bıylǵy aqpan aıynda Astanada ótken «Tórttik týrnırinde» ándijandyq boksshynyń shymkenttik sharbolatty sońǵy raýndta aıqyn basymdyqpen jeńip ketkeni de sebep bolǵan sııaqty. Buǵan qosa, Hasanboıdyń ústimizdegi jylǵy jazda Qazanda ótken Ýnıversıadada chempıon atanyp qaıtqany taǵy bar. Sodan bolar, eki boksshy da bir-birlerine ese jibergileri kelmedi. Degenmen, teketires barysynda Birjannyń birer adym bolsa da ilgeri turǵany baıqalyp qaldy. Sóıtip, ol qazaqstandyqtar úshin jeńisti joldyń basyn bastap berdi. Endi bizdiń boksshy 1/4 fınalda Pýerto-Rıko atleti Entonı Chakon Rıveramen bettesedi.
Bizge kelesi jeńisti 56 kıloǵa deıingi salmaqtaǵy Qaırat Erálıev áperdi. Ol munyń aldynda ózbektiń talantty boksshysy Shahrıer Isaqovty úlken tartys ústinde joldan taıdyrǵan qyrǵyz Omýrbek Malabekovpen qolǵap túıistirdi. Urystyń basynda qarsylastar bir-birin ańdyp baqty. Olar orta jáne alys qashyqtyqty ustandy. Mundaı taktıka qyrǵyz boksshysyna kóbirek qolaıly tıdi. Munyń ústine, Qaırat kútpegen jerden qabaǵyn jaryp alyp, jankúıerlerine biraz ýaıym jegizdi. Alaıda, ekinshi raýndtan bastap bizdiń oǵlannyń qımyly durystaldy. Endi ol osynyń aldyndaǵy aıqasyndaǵy taktıkasyna kóship, básekelesin alystan urǵan soqqylarymen tópeleýge kóshti. Nátıjesinde aýyp bara jatqan teńin jóndemge keltirip, jeńisti tartyp áketti. Alaıda, Qaırattyń kelesi qarsylasy óte qaýipti. Ol endi kýbalyq 2012 jylǵy London Olımpıadasynyń chempıony Robeısı Ramırespen shaıqasady.
Aldyńǵy aǵalarynyń jeńisti jolyn 75 kılo salmaqtaǵy Jánibek Álimhanuly keremet jalǵastyra bildi. Meksıkalyq Hýan Merkadomen judyryq siltesken ol úsh raýnd boıy qarsylasynan basym túsip otyrdy. Urys kezinde Jánibek qorǵanystyń da, shabýyldyń da tamasha tehnıkasyn kórsetti. Al úshinshi raýndta onyń ǵalamat soqqysynan qarsylasy ushyp tústi. Referı sol mezette meksıkalyqty dárigerge apardy. Densaýlyq saqshysy bolsa, boksshynyń budan ári shaıqasýyna ruqsat bermedi. Bul jeńis onyń kelesi aınalymda rýmyn boksshysy Bogdan Jýratonımen ushyrasatynyn anyqtap berdi.
Budan keıin 64 jáne 91 kıloǵa deıingi salmaqtardaǵy boksshylardyń keshki sessııadaǵy ónerlerin tamashaladyq. Bulardyń aldyńǵy leginde sharshy alańǵa shyqqan Mereı Aqshalov domınıkandyq Karlos Adamsty 3:0 esebimen tize búktirdi. Onyń kelesi kezeńdegi qarsylasy qyrǵyz Ermek Sakenov bolady. Oqyrmannyń esinde bolar, biz osydan buryn jazǵan esepterimizdiń birinde Mereıge tap osy jigittiń yqtımal qarsylas ekenin aıtyp qalyp edik, sol aıtqanymyz aıdaı keldi.
О́kinishke qaraı, 91 kılo salmaqtaǵy Anton Pınchýk ózbek Rýstam Týlıaganovpen kezdesýinde ınısıatıvany da, jeńisti de qarsylasyna berip qoıdy.
Qazir sapynan shyǵyn shyqpaǵan birde-bir qurama joq. Sonyń ishinde bir-birden boksshysynan aıyrylǵan Qazaqstan men Kýba alda tur. Al Reseı men О́zbekstannyń qatarynan úsh bylǵary qolǵap sheberi jarys jolynan shyǵyp qaldy. Komandalar osyndaı jaǵdaıda, erteń rıngke 52, 60, 69, 81 jáne 91-den aýyr salmaqtarda 1/8 fınaldyq aıqastardy aıaqtaıdy. Sosyn 23 qazan kúni shırek fınaldyq jekpe-jekterge kezek kelip, medaldar aýylyna aıaq basatyndar anyqtalady. Sodan sońǵy kúni boksshylar tynys alyp, 25 qazanda jartylaı fınaldyq urystardy ótkizedi. Chempıonat 26 qazanda márege jetedi.
«Egemen Qazaqstannyń» álem chempıonatyndaǵy kóshpeli redaksııasy.
––––––––––––––––––––
Sýretti túsirgen
Bersinbek Sársenov.
