18 qazanda Astanadaǵy Táýelsizdik saraıynda «Nur Otan» partııasynyń kezekten tys XV sezi ótkeni belgili. Partııanyń alqaly resmı basqosýynda Qazaqstan Respýblıkasynyń Prezıdenti Nursultan Nazarbaev baǵdarlamalyq sıpatta sóz sóılegen bolatyn. Elbasynyń sózi qazaqstandyqtar tarapynan qyzý qoldaý taýyp otyr.
«Egemen Qazaqstan» gazetiniń óńirlerdegi menshikti tilshilerine sezd delegattarymen jedel sóılesip, el Prezıdenti – partııa Tóraǵasy sózinen alǵan áserlerin, oıǵa túıgen tujyrymdaryn jazyp alý tyǵyz tapsyrylǵan edi. Elimizdiń ár shalǵaıynan kelip túsken materıaldar 2-bette «Elbasynyń sózinen kókeıge ne túıdińiz?» degen ortaq taqyryppen jarııalanyp otyr.
18 qazanda Astanadaǵy Táýelsizdik saraıynda «Nur Otan» partııasynyń kezekten tys XV sezi ótkeni belgili. Partııanyń alqaly resmı basqosýynda Qazaqstan Respýblıkasynyń Prezıdenti Nursultan Nazarbaev baǵdarlamalyq sıpatta sóz sóılegen bolatyn. Elbasynyń sózi qazaqstandyqtar tarapynan qyzý qoldaý taýyp otyr.
«Egemen Qazaqstan» gazetiniń óńirlerdegi menshikti tilshilerine sezd delegattarymen jedel sóılesip, el Prezıdenti – partııa Tóraǵasy sózinen alǵan áserlerin, oıǵa túıgen tujyrymdaryn jazyp alý tyǵyz tapsyrylǵan edi. Elimizdiń ár shalǵaıynan kelip túsken materıaldar 2-bette «Elbasynyń sózinen kókeıge ne túıdińiz?» degen ortaq taqyryppen jarııalanyp otyr.
Abzal MUHIMOV,
«Nur Otan» partııasy Qyzylorda oblystyq
fılıaly tóraǵasynyń orynbasary:
AZATTYQTYŃ BAQ QUSY QOLYMYZDA
«Nur Otan» partııasynyń sezinde Elbasy Nursultan Nazarbaev «Eń bastysy – halqymyzdyń rýhy qaıta órledi», dedi. Memleket basshysynyń osynaý sózi ózimdi erekshe tebirendirgenin jasyrǵym kelmeıdi. Al halqymyzdyń ór rýhy qaıta kóterilip, órlegenin neden kórýge bolady?
Eń birinshi – talaı urpaqqa uly arman bolǵan Azattyqqa qolymyz jetti. Táýelsizdik jolynda talaı erdiń basy jerde qaldy, qany jerge tamdy. Ah uryp teńdik surap, «endi, mine, jettik pe?!» degende saǵymdaı sýsyp qolymyzdan shyǵyp kete bergen atańnan aınalaıyn Azattyqtyń baq qusy bizdiń qolymyzǵa qondy. Halyq rýhyn eresen zor bıikke kótergen osy bir ǵana Egemendik uǵymy edi. Apyl-tapyl qadam basyp, táı-táı júrgen Táýelsizdigimizdiń alǵashqy jyldarynda bizdi el bolady degenge sengender neken-saıaq edi. «Halqy qyryq quraý, ekonomıkasy ábden turalaǵan, eshqandaı óndirisi joq Qazaqstan qaıtip el bolsyn?» degen mysyqtileýli adamdardyń bolǵanyn da jasyra almaımyz. Degenmen, Elbasynyń syndarly saıasatynyń, myqty strategııasynyń arqasynda úlken jetistikterge jete bastadyq. Osylaısha, biz álemdegi eń ozyq damýshy memleketterdiń qataryna qosyldyq. Bul – pafos emes! Naqty nátıje. Sebebi, álem búgingi Qazaqstandy etek-jeńin jınap, bar-kúsh jigerin halqynyń ál-qýatyn arttyryp, memlekettiligin baıandy etý jolynda aıanbaı ter tógip jatqan el retinde biledi. Osyndaı tarıhı istiń basynda Nursultan Ábishulyndaı er turǵanyn kóredi.
Ejelden qazaqtyń jeri baıtaq edi. Biraq kórshi memlekettermen jasalǵan shekara joq bolatyn. Egemendiktiń eń uly jetistigi biz shekaramyzdy belgilep aldyq. Bylaısha aıtqanda, endi qazaqtyń jerinde Qudaıdan basqa eshkimniń haqysy joq. Túsingen adam úshin osydan artyq baqyttyń da bolmaýy kerek. Ult rýhynyń órleýine osyndaı kemel kelisimderdiń de áser etkeni jasyryn emes.
«Altaý ala bolsa, aýyzdaǵy ketedi. Tórteý túgel bolsa, tóbedegi keledi» degen danalyq sózdi árkim-aq biler. Deıturǵanmen, onyń mánin qazaqtan artyq eshkim túsinbeıtin sııaqty. Nege? О́ıtkeni, qazaq Qazaqstandaǵy memleket quraýshy ult retinde ózge etnostardyń barlyǵyn qushaǵyna alyp, eshqaısysynyń mańdaıynan shertpeı, tatýlyqtyń uıytqysy bolyp otyr. 140 ult pen ulystan quralǵan memleket túgili, bir úıdiń kóziniń aǵy men qarasyndaı bolyp otyrǵan eki balasynyń arasynda arazdyq týyp jatatyn kezder bolady. Bul turǵyda bizdiń el óz jolyn, soqpaǵyn tapty. Búgingi beıbit ómir, beıqam tirshilik, berekeli kezeń sonyń belgisi. Ásili, qazaq aıtatyn «qoı ústine boztorǵaı jumyrtqalaǵan zaman» osy shyǵar.
Memlekettiliktiń negizgi kórinisiniń biri – onyń tili. Jetpis jylǵy keri saıasattyń kesirinen qazaq tiline talaı qııanat jasaldy. Desek te, Táýelsizdikpen birge týǵan tilimiz de teńdigin aldy. Keshegi «Nur Otan» partııasynyń sezinde Elbasy ana tilimizge qatysty el kókeıindegi sózdi aıtty. Qazaq ultynyń sany 70 paıyzdan asatyn óńirlerdiń ana tilimizde is-qujattaryn ázirleýi kerektigin alǵa tartty. Bul – barsha qazaqstandyqtardyń kóńilinen shyqty degen oıdamyn. О́ıtkeni, qazaq tili – bárimizdi biriktiretin basty faktor.
Ekonomıkamyzdyń órkendeýiniń arqasynda alys-shalǵaı jatqan eldi mekenderde mektepter salynyp, kitaphanalar ashylyp, jańa sport alańdary paıdalanýǵa berilip, densaýlyq saqtaý oryndary halyq ıeligine kóptep ótip, aýyzsý tartylyp, joly jóndelip, turmysy túzeldi. Keshegi toqyraý jyldarynda bar álemnen qol úzip qalǵan aımaqtardyń boıyna qan tarady. Zamanaýı tehnıkamen jabdyqtalǵan oqý oshaqtarynda balalar bilim alyp jatyr. Internettiń ıgiligin kórip otyr. Bul da eldiń rýhyn kóterip, ómir saltyna jańasha lep qosyp jatqany ótirik emes. Sonymen qatar, qazaq jeriniń ústinen «Batys Qytaı – Batys Eýropa» kúre jolynyń salynyp jatqany da elge úlken qýanysh syılap otyr. Eń birinshi – bul aımaqtar arasyndaǵy qarym-qatynasty jaqsartady. Ekinshi – alys-jaqyn shetelderge baratyn jolaýshylardyń jolyn qysqartady. Úshinshi – qarapaıym halyqtyń ózi osy joldyń boıynda shaǵyn bıznesin ashyp, sharýasyn retteıdi. Munyń syrtynda, «Beıneý – Bozoı –Shymkent» gaz qubyrynyń qurylysy da bizdiń ómirimizge eleýli ózgeris ákelmek. Aldaǵy ýaqytta shet qonyp, qıyr jaılaǵan aýyldyń ózine gaz baryp, tabıǵı otynnyń paıdasyn kórmek. Jurt ot jaǵyp, kúl shyǵarýdan birjolata qutylatyn boldy. Azýyn aıǵa bilegen Eýropanyń ózinde talaı memleket qarjy qyspaǵyna ushyrap, ári-sári kúı keship jatqanynan habardarmyz. Al Azattyqtyń jalyna keshe ǵana jarmasqan Qazaqstan eshqandaı daǵdarysqa qaramaı, halqynyń kúnkórisin jaqsartyp, ómir saltyn ózgertip jatyr. Biz – daǵdarystyń ózinen paıdaly shyǵýǵa bolatynyn dáleldegen elmiz. Saıyp kelgende, halqymyzdyń ór rýhy basylǵan joq. Esesine órlep keledi.
Jazyp alǵan
Erjan BAITILES,
«Egemen Qazaqstan».
QYZYLORDA.
Amangeldi MEKTEPBAEV,
«Nur Otan» partııasy Aqtóbe oblystyq
fılıalynyń qyzmetkeri:
AShYQTYQ – ALǴA BASÝShYLYQ KEPILI
Partııanyń bul sezi «Nur Otannyń» elimizdegi tuǵyry berik irgeli saıası kúsh ekenin taǵy bir ańǵartty. Sezde «Nur Otan» partııasynyń «Nur Otan». Nurly bolashaq jolynda» atty Saıası doktrınasynyń qabyldanýy el ómirindegi asa aıryqsha atap ótýge turarlyq oqıǵa boldy. Doktrına Elbasynyń «Qazaqstan-2050» Strategııasymen ózektes órilip, ony júzege asyrýdyń naqty joldary aıqyndalǵan partııanyń basty qujaty dep baǵalady delegattar.
Elbasy N.Nazarbaev sezde sóılegen sózinde Qazaqstandy álemde damyǵan ozyq otyz eldiń qatarynan kórinetindeı is-qımyl strategııasy jasalǵanyna, buǵan qol jetkizetindeı irgeli ister atqarylyp jatqanyna toqtaldy.
Shyny kerek, partııanyń aldyna qoıǵan mindetteri de aýqymdy bola tústi. Ol Saıası doktrınada naqty kórinis tapqan. «Nur Otan» partııasy qashanda elimizdegi ıgi isterge uıytqy bolyp, baǵaly bastamalar kóterip kele jatqanyn halyq kórip otyr. Onyń bul baǵyttaǵy qadamdary udaıy jurtshylyqtyń kóz aldynda. Halyqtyń muńyn muńdap, joǵyn joqtap kele jatqan saıası kúsh retinde de óz bıiginen kórinýde. Partııa qandaı da bir bastama kóterse de eldikti eńselendirýge, birlik pen tatýlyqty turaqtandyrýǵa, qarapaıym halyqtyń ál-aýqatyn arttyrýǵa basymdyq berýde.
«Nur Otan» partııasy qashanda ashyqtyq qaǵıdatyn ustanýda. Sondyqtan da udaıy halyqtyń qoldaýyna ıe bolyp júr. Elbasy aıtqandaı, «Nur Otannyń» elden jasyratyn eshteńesi joq. Ol kúni keshegi partııanyń Saıası doktrınasyn talqylaý kezinde aıqyn kórindi. Sezd jumysynda da syndarly pikirler, salıqaly oılar aıtylýy da sondyqtan. Partııa eldik isterdiń barlyǵyna atsalysyp, ózindik baǵdar-baǵytyn aıqyndap úlgerdi. Ol naqty nátıjeniń, ilkimdi isterdiń alǵy shebinen kórinip keledi. «Nur Otan» eshqashan aldyna bulyńǵyr mindetter qoıǵan emes, bos ýádeler bergen emes. О́zekti máselelerdi de aınalyp ótpeı, olardy sheshýdiń sátti qadamdaryn jasaı alatynyn áldeqashan dáleldep úlgerdi.
Saıası naýqandarda «Nur Otannyń» halyqtyń qoldaýyna ıe bolýynyń ózi partııa ustanyp otyrǵan saıası baǵyttyń baıandylyǵynyń nátıjesi deý kerek. Partııanyń oblystyq fılıaly qoǵamdyq qabyldaýyna adamdar kóp keledi. Bul da partııanyń árbir qazaqstandyqqa qoljetimdiliginiń, ashyqtyǵynyń mysaly der edim. Elbasy N.Nazarbaev sezde sóılegen sózinde «Nur Otan» qashanda azamattyq qoǵamnyń kóshbasshysy bolýy qajettigin, adamdardyń naqty problemalaryn sheshýshi, olarǵa kómektesýshi jáne arqa súıeýshi barlyq ÚEU-lardyń jolbasshysy bolýy tıis ekenin atap ótkeni belgili. Munyń ózi partııalyq jumystyń ashyqtyǵyn, móldirligin qamtamasyz etýmen tikeleı baılanysty bolmaq. Al sezde bul másele ashyq ta jan-jaqty aıtyldy. Halyqtyń barlyq máselelerden habardar bolýy ǵana alańdaýshylyqtyń aldyn alady.
Mine, partııa jumysyndaǵy ashyqtyq pen móldirlik onyń barlyq býyndarynda ornyǵýy eldiń bolashaǵyna baǵyttalǵan bastamalardy júzege asyrýǵa yqpal etip otyrǵanyn ekonomıkalyq-áleýmettik damý áleýetimizden aıqyn ańǵarýǵa bolady. Iri jobalardy júzege asyrýdaǵy partııalyq baqylaý beketterin, qoǵamdyq qabyldaýlardy, partııa músheligine laıyqty adamdardyń ótýin uıymdastyrý, adamdardyń, sonyń ishinde az qamtylǵandarǵa qoldaý kórsetý, sybaılas jemqorlyqpen kúrestiń nátıjeliligin arttyrý sııaqty sharýalardyń jarııalylyǵyn qamtamasyz etýge mańyz berý qajettigi kún tártibinen túspek emes. Halyq pen bıliktiń arasyndaǵy altyn kópir bola otyryp, partııa keleńsizdiktiń kez kelgen dereginiń jolyn kesýge baǵyttalǵan qadamdarǵa baratyny da áńgime ózegine aınaldy. Jalpy ashyqtyq pen móldirlik partııa shańyraq kótergennen bastap óz jumysynda basshylyqqa alǵan ustanymdar ekeni sózsiz.
Endi «Qazaqstan-2050» Strategııasynda belgilengen ómirsheń isterdi júzege asyrý barysynda bul baǵyttyń jetildirile túsetinine senim mol. Bul týraly partııanyń HV sezinde keńinen áńgime bolýy da sondyqtan. Árbir iste ashyqtyq bolmaıynsha, halyqpen aqyldasa otyryp, ózekti máselelerdi ortaq oılasyp sheshpeıinshe, elimiz alǵa qoıǵan mindetter údesinen kóriný qıyn. Sol sebepti de partııa ózderi qolǵa alǵan ıgi bastamalardy júzege asyrýdy jáne ózekti problemalardy sheshýdi halyqtyń nazarynda ustaıtyn dástúrdi jalǵastyratyn bolady. Munyń ózi partııanyń halyqtan jasyratyn syry joq ekenin taǵy bir márte dáleldeı túsedi. Partııa qashan da halyqpen birge, elmen etene bola túspek. Sezde kóterilgen máseleler osyndaı oı túıýge negiz jasaıdy.
Jazyp alǵan
Satybaldy SÁÝIRBAI,
«Egemen Qazaqstan».
Aqtóbe oblysy.
Sezd fotokúndeligi
Rımma BEKTURǴANOVA,
«Nur Otan» partııasy Qostanaı oblystyq
fılıaly tóraǵasynyń birinshi orynbasary,
pedagogıka ǵylymdarynyń doktory:
ÁR QAZAQSTANDYQQA KО́P NÁRSE BAILANYSTY
Halqymyzda «kemedeginiń jany bir» degen sóz bar. Osy danalyqtyń búgin dúnıejúzindegi memlekettermen baılanysta damıtyny elimizge de qatysy bolyp otyr. Jahandaný úderisimen HHI ǵasyrdyń tabaldyryǵyn attaǵan jumyr jer qazir ár adamnyń alaqanynda turǵandaı seziledi. Jerdiń qaı núktesinde bolyp jatqan oqıǵalardy sol sátinde kórip, bilip otyrmyz. Aqparattyq jyldamdyqpen ýaqyttyń ıiriminde ketip bara jatqandaımyz. Munyń Táýelsiz Qazaqstannyń damýyna ozyq ta, keri de áseri bary sózsiz. Taıaý Shyǵysta myltyq daýsynyń basylmaýy, álemdegi ekologııalyq zardaptar, jer betindegi adamzat qatarynyń kóbeıýine baılanysty azyq-túlik tapshylyǵynyń kúsheıýi, aýyz sýdyń azaıýy, taǵy basqa da ótkir turǵan jahandyq máseleler Qazaqstandy da sergek bolýǵa shaqyrady. Muny «Nur Otan» partııasynyń kezekten tys HV sezindegi Prezıdent Nursultan Nazarbaevtyń sózinen túsingendeı boldyq. «Meniń ishki túısigim men tájirıbem álemniń taıaý bolashaqtaǵy damý kezeńi asa kúrdeli bolatynyn ańdatady. Osyndaı jaǵdaıda barlyq qazaqstandyqtar óz Otanymyzdaǵy turaqtylyq pen damý baǵdaryn boljaýǵa bolatyndyǵynyń baǵasyn bilýge tıis!», dedi Nursultan Ábishuly.
Elimizdiń bolashaǵy turaqtylyq pen ekonomıkanyń damýyna baılanysty ekenin Elbasy árqashan aıtyp otyrady. Ony ár qazaqstandyq túısinedi. Al sol turaqtylyq pen damýdy eshkim bizge aspannan tastamasy anyq. Ony jasaıtyn ózimiz – qazaqstandyqtar. Nursultan Ábishuly osy máselelerdi partııaǵa salmaq sala aıtty. О́te oryndy. О́ıtkeni, «Nur Otan» qarapaıym halyqqa tonnyń ishki baýyndaı jaqyn partııa, sondyqtan biz ony jergilikti jerdegi ár adamǵa túsindirýimiz qajet.
Turaqtylyqtyń kepili – Qazaqstandy óz Otanym dep, onyń otyn ottap, sýyn sýlap turyp jatqan san ult ókilderiniń dástúri men tilin, dinin saqtaýy, ony pash etýi der edim. Jaqynda ǵana búkil musylman álemi Qurban aıt meıramyn merekeledi. Ony Qazaqstandaǵy musylman jurty da atap ótti. Al basqa din ókilderi olardy quttyqtap jatty. Sondaı-aq, ózge din ókilderiniń dinı merekelerine de musylman qaýymy osylaı qurmetpen qaraıdy. Qazir memleket quraýshy halyqtyń ana tili, memlekettik til – qazaq tilin úırenýge nıet qoıǵan ózge ult ókilderi, onyń ishinde jastar kóptep sanalady. Olardyń arasynda jyl saıyn túrli baıqaýlar bolyp jatady. Qyrkúıek aıynda Qostanaıda VII halyqaralyq nemis mádenıetiniń festıvali bolyp ótti. Bes kún boıy nemisi, qazaǵy, orysy, tatary, taǵy basqa da ulttar ókilderi bar rýhanı baılyq keshkendeı boldy. Dostardyń dos qushaqtary aıqasty. Mine, tatýlyq, turaqtylyq kepili osylar bolmaq. Rýhanı tolysý, ulttyq qundylyqtardy áspetteý, dástúr jalǵastyǵyn baǵalaý – osynyń barlyǵy da kez kelgen materıaldyq baılyqtan joǵary turady.
Elimiz ekonomıkalyq qarqyndy damyp keledi. Kóptegen damyǵan elderdi shaıqaltqan daǵdarysqa qaramastan, bizde buryn bolmaǵan jetistikterge qol jetkizildi. Alaıda, jahandyq turlaýsyz naryqtyń qubylýy ekonomıkalyq damý turaqtylyǵynyń qazyǵyn qatty qaǵý kerektigin eskertip qoıady. Ol úshin Elbasymyz baǵdarlaǵan ınnovasııalyq jáne ozyq tehnologııalarǵa júginýimiz qajet. Jer júzinde azyq-túlik pen aýyz sý tapshylyǵynyń kúsheıýi qaýipti ózimizden alys ustaýǵa ıtermelep otyrýdy talap etedi. Jerasty baılyqtarymyzdy uqsatý, óńdeý kásiporyndarynyń kóbeıýine, syrtqa shıkizat emes ónim shyǵarýǵa kóp kóńil bólýdi qolǵa aldyq. Ol úshin jergilikti jerlerdegi jaqsy isterdiń eshqaısysyna usaq-túıek dep qaramaý kerek. Nurotandyqtar sonyń barlyǵyn adamdarǵa únemi aıtyp túsindirip, úıretip otyrady. Bıyl bizdiń qostanaılyq ǵalymdarymyz jasap shyǵarǵan kartoptyń jergilikti sorttary syrttan aqshany ýystap shashyp ákelgen sorttarǵa qaraǵanda ónimdi 3-4 ese kóp bergen. Osyny usaq, kúndelikti tirliktiń kóz úırengen kórinisi dep qalaı aıtasyz?
Eńbek adamyna degen kózqarasty qaıta jańǵyrtý kerektigin de men turaqtylyq pen damýdyń kepiline qosar edim. Abaı atamyz aıtqandaı, barlyq jaman qasıettiń túp-tórkini jalqaýlyqta jatyr. Eńbektiń tóbel torysyna aınalǵan jandardan eshqashan jaman minez shyqpaıdy, olardyń ishki rýhy myqty bolady. Eńbekqor adam óz eńbegine jáne ózine senedi. Qoǵamnyń bir keseline aınalyp turǵan sybaılastyq, jemqorlyq olarǵa tán emes. «Oqý ınemen qudyq qazǵandaı» degen emes pe halqymyz? Qazir sybaılastyqtyń bilim júıesine sińisip bara jatqany júrekti muzdatady. О́ıtkeni, bilim salasy degende kóz aldymyzǵa jas urpaq keledi. Sezde sóılegen sózinde Nursultan Nazarbaev jastarǵa eńbek etińder, oqyńdar degen aǵalyq sózin aıtty. Osynyń barlyǵyn mıllıonǵa jýyq múshesi bar «Nur Otan» partııasy jergilikti jerlerde túsindiretin, qadaǵalaıtyn bolady. Sebebi, partııa ýaqytpen tynystap, arbany tek alǵa súıreıdi.
Jazyp alǵan
Názıra JÁRIMBETOVA,
«Egemen Qazaqstan».
QOSTANAI.
Roza ABILOVA,
«Bolashaq» áleýmettik-azamattyq bazısi
qoǵamdyq birlestiginiń tóraıymy:
ELBASY SО́ZIN EL SANASYNA SIŃIRÝ – PARYZYMYZ
«Nur Otan» partııasynyń HV sezine qatysyp, onda Elbasynyń aıtqandaryn óz qulaǵymmen estip, rýhanı ári patrıottyq kúsh alyp aýylǵa oraldym. Sanama ábden sińirgenim, Elbasynyń tegin kelgen dúnıeniń ońaı jumsalatyny, juǵymynyń máz bolmaıtyny, sondyqtan eńbektiń kózin taýyp, erinbeı eńbektenip, sol eńbegińniń óteýine qýana bilý boldy. Tipti, bári eńbektiń arqasynda keletinin qarapaıym da jatyq tilmen uǵyndyra otyryp, alǵash 20 sharshy metr páter alǵanynda qalaı qýanǵany týraly aıtqany qulaǵymnan keter emes. Sondyqtan aýyldardy aralap, osynaý ulaǵatty halyqtyń sanasyna sińirgen ústine sińire túsip, jastardyń patrıottyq sezimderin alaýlatyp, «Yrys aldy – yntymaq» degen danalyqty halyqtyń kókeıine toqyta túsýdi paryz sanaımyn. Elbasy sezde jastarǵa senim arta otyryp, bolashaqtyń tizgini sol jastardyń qolynda ekendigin basa aıtyp qana qoımaı, baq-dáýletten qaıda baratynyn suraǵanda yntymaǵy jarasqan elge baratyndyǵyn aıtqanyn da bizge ádemi jetkize bildi ǵoı.
Biz jastarmen, jasóspirimdermen, jaǵdaıy tómen otbasy múshelerimen, áıeldermen etene aralasyp jumys isteımiz. Solardyń patrıottyq sezimderin oıatyp, óskeleń ómirge degen úmitterin úkilep, eń bastysy – bolashaqqa degen senimderin arttyrýǵa qajettiliktiń bárin sanama sińirip, ádemi áserge bólenip keldim. Ákem ázerbaıjan, anam orys bolsa da qazaqy danalyqtarǵa júregimniń túkpirinen oryn bergendigimnen bolar, «Táýekel túbi jelqaıyq, ótesiń de ketesiń, ýaıym túbi tuńǵıyq, batasyń da ketesiń» degen sózdi Elbasynyń Astana qalasyn salǵanymen baılanystyrǵym keledi. Zeńgir kókke shanshylǵan ǵımarattardyń sáni men saltanaty da bizdi beıjaı qaldyrǵan joq.
Qoryta aıtqanda, elimizdegi osyndaı jaqsylyqtyń barlyǵy birliktiń arqasy dep baǵalap, óz kezegimizde osy eldiń patrıoty bolý basty paryzymyz ekendigin áste esten shyǵarmaǵanymyz abzal.
Jazyp alǵan
Nurbol ÁLDIBAEV,
«Egemen Qazaqstan».
Almaty oblysy.
Jaqsygúl MAHANBETOVA,
«Mańǵystaý oblystyq Azamattyq alıansy»
zańdy tulǵalar birlestiginiń prezıdenti:
MURATQA JAQSY OI, JARQYN BASTAMALAR JETKIZEDI
Astana qalasynda kezekten tys ótken sezge aımaqta belsendi áreket etýshi qoǵamdyq uıymdar ókilderi de qatysýǵa múmkindik aldy. «Nur Otan» partııasynyń kóshbasshysy Nursultan Ábishuly Nazarbaev elimizdiń damýyna úles qosyp otyrǵan qoǵamdyq uıymdardyń belsendi qyzmetin joǵary baǵalady, óz sózinde partııaǵa úkimettik emes uıymdarmen tyǵyz qarym-qatynasta jumystanýdy tapsyrdy.
Aımaqtardan kelgen qoǵamdyq uıym ókilderi sezdiń jumysyna joǵary baǵa berdi. Sonymen qatar, aldaǵy ýaqytta atqaratyn josparlarymen de bólisti. Shyndyǵynda, Elbasy bergen tapsyrmalardyń bári de júzege asyrýǵa bolatyn, qoldan keletin ister.
Qazaqstan álemdegi asa damyǵan 30 eldiń qataryna kirý mejesin belgiledi. Osy mejege jetý úshin sezd qabyldaǵan Doktrınaǵa súıene otyryp, serpindi baǵdarlamalar jasaqtap, ony júzege asyrýdy qolǵa alýymyz qajet. Sol sezden qaıtyp kele jatqanda-aq qoǵamdyq uıymdar ne isteý qajet ekendigin aıqyndadym. Bul, birinshiden, jaýapkershiligi joǵary azamattyq qoǵam qalyptastyrýǵa baǵyttalǵan baǵdarlamalardy jasaqtaý jáne olardy júzege asyrý joldaryn qarastyrý, iske kirisý. Ekinshiden, jergilikti jerlerde sheshim qabyldaý kezeńderinde qoǵamnyń, belsendi azamattardyń qatysýyn jáne atsalysýyn qamtamasyz etý múmkindikterin paıdalana otyryp, jaýapkershilikti bólisý mádenıetin qalyptastyrý. Úshinshiden, árbir qoǵam óziniń múddeli toptarynyń máselelerin sheshýge qoǵamdy, bıznesti jáne bılikti, azamattardy jumyldyrý arqyly qol jetkizýdi uıymdastyrý. Halyq bılikke emes, bılik halyqqa qyzmet etýi búgingi zaman qajettiligi ekenin sezde Elbasy atap aıtqan bolatyn.
Táýelsiz Qazaqstannyń jarqyn bolashaǵy – bizdiń ómirimizdiń negizgi maqsaty, búgingi jasap júrgen irili-usaqty jumystarymyzdyń toǵysar arnasy men baǵdary. Azattyǵymyzdy aıalap, memleketimizdi órkendetip, keler urpaqty álemdegi damyǵan elderdiń qatarynda ómir súrýge bir kisideı jumyla júrip jetkizýge tıispiz. Ol qatarǵa ený úshin birlik, tártippen birge bardy baǵalaı bilý, tabıǵatty qorǵaý, ysyrapshylyqqa jol bermeý, ulttyq erekshelikterimizdi qasterleı bilý jáne ozyq óner-bilim qajet. Osy jaqsy murattar jolynan birge tabylaıyq degim keledi barsha baýyrlarǵa.
Jazyp alǵan
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
__________________________
Sýretterdi túsirgen
Erlan OMAROV,
«Egemen Qazaqstan».
