Medıasııa – úshinshi, janjalǵa múddeli emes taraptyń qatysýymen daýlardy sheshýdiń balama túri. Medıasııa ınstıtýty Qazaqstanda belsendi damyp, tájirıbede jıi qoldanylýda. "Senim" medıasııa ortalyǵy aıasynda halyqtyń áleýmettik osal toptary úshin aqysyz oqytý bastalady. Trenıngti sertıfıkattalǵan kásibı medıatorlar júrgizedi", deıdi Kásipodaqtar federasııasy oqý ortalyǵynyń jetekshisi Nurlan Dosymov.
"Senim" medıasııa ortalyǵynyń negizgi maqsattarynyń biri – azamattar men uıymdardyń quqyqtary men zańdy múddelerin áleýmettik qorǵaý, konstrýktıvti dıalogty damytýǵa jaǵdaı týǵyzý, janjal jaǵdaılaryn kásibı medıasııa, psıhologııalyq, quqyqtyq, áleýmettik, aqparattyq jáne basqa da kómek arqyly sheshý. Kásibı medıator Ásel Moldaǵalıevanyń aıtýynsha, elorda turǵyndary kóbine medıatorlarǵa eńbek daýlary, neke kezinde birlesip satyp alynǵan múlikti bólý, balanyń turǵylyqty jerin anyqtaý jáne alıment alý máselelerimen júginedi.
"Múlik, alıment, ajyrasý máseleleri boıynsha ótinishterdiń 46%-y medıasııa jolymen sheshildi", dep atap ótti Á.Moldaǵalıeva.
Bul rette Qazaqstan halqy Assambleıasy tóraǵasynyń orynbasary, medıator Sherzod Pýlatovtyń aıtýynsha, janjaldardyń aldyn alýda medıasııa ınstıtýtynyń róli óte zor.
"Medıasııany azamattyq, eńbek, otbasylyq jáne basqa da quqyqtyq qatynastardaǵy daýlarda, sondaı-aq shaǵyn jáne orta aýyrlyqtaǵy qylmystyq isterde qoldanýǵa bolady. Azamattardyń da, zańdy tulǵalardyń da medıasııany belsendi qoldanýy arqyly sot júıesine júktemeni edáýir azaıtýǵa, osylaısha iri isterdi sheshý sapasyn arttyrýǵa bolady. Halyqaralyq statıstıkaǵa sáıkes, barlyq daýlardyń 30-40%-y medıasııa tártibimen ótedi. Olardyń 85%-ynda oń nátıjelerge qol jetkiziledi", dedi Sh.Pýlatov.
