Parlament Májilisiniń halyqaralyq ister, qorǵanys jáne qaýipsizdik komıtetinde jumys tobynyń músheleri «Qazaqstan Respýblıkasy men Qytaı Halyq Respýblıkasy arasyndaǵy sottalǵan adamdardy berý týraly shartty ratıfıkasııalaý týraly» zań jobasyn qarady. Bul týraly Parlament Májilisiniń baspasóz qyzmeti habarlady.
Otyrysta Májilis depýtaty, jumys tobynyń jetekshisi Qýanysh Sultanov 2011 jylǵy 22 aqpanda Beıjiń qalasynda jasalǵan osy sharttyń mańyzyn atap ótti. Atalǵan sharttyń iske asyrylýy týraly Bas prokýratýra halyqaralyq yntymaqtastyq departamenti sharttyq-quqyqtyq jumys basqarmasynyń bastyǵy Aıbek Nurahmetov qysqasha málimdeme jasady. «Bizde Qytaı tarapymen ustap berý jáne qylmystyq ister boıynsha quqyqtyq kómek kórsetý týraly halyqaralyq sharttar bar. Bul shart eki memleket arasyndaǵy sottalǵan adamdardy olar jazalaryn odan ári óz Otanynda óteý úshin aýystyrý múmkindigimen baılanysty máselelerdi retteıdi. Osyndaı sharttar Ázirbaıjan, Túrkimenstan, Ýkraına, Ispanııa jáne Túrkııa elderimen jasalǵan. «Qazaqstan Respýblıkasynyń halyqaralyq sharttar týraly» zańynyń 11 babyna sáıkes, osy shart ratıfıkasııalaýǵa jatady. Sebebi, adam jáne azamattyń quqyqtary men bostandyqtaryna qatysty bolyp otyr»,-dedi sóz oraıynda A. Nurahmetov.
Jıynǵa qatysqan depýtattar Ýálıhan Bıshimbaev, Serikbaı Nurǵısaev jáne Nurǵalı Áshim joǵaryda atalǵan shartqa qatysty baıandamashyǵa suraq qoıdy. Ol boıynsha qylmyskerlerdi tranzıtteý isi men olardy kimder alyp júretini, eki memlekettiń qylmystyq zańnamasynda bul tóńirektegi qolǵa alynatyn jumystar rettelgen be degen másele qozǵaldy. Al habarlamashy barlyq isterdiń zań sheńberinde atqarylatynyn jetkizdi.
Otyrysty qorytyndylaǵan jumys tobynyń jetekshisi Q. Sultanov Qazaqstan men Qytaı arasyndaǵy yntymaqtastyq baılanystyń joǵary deńgeıde ekenin málimdep, sharttyń mańyzyna taǵy bir márte toqtalyp ótti.
Atalǵan zań jobasyn aldaǵy ýaqytta Májilistiń jalpy otyrysynda qaraý máselesi qarastyrylýda.
Ámirhan Almaǵanbetov.
