Elorda mektepterinde jańa oqý jylyna daıyndyq jalǵasýda. Qazirgi ýaqytta oqý oryndary jańa oqýlyqtarmen qamtamasyz etilýde.
"Bul qoımada 1-11 synyptarǵa arnalǵan 19 baspanyń oqýlyqtary bar. Osy jerden barlyq mektepter kestege sáıkes oqýlyqtar alady. Búgingi tańda 35 mektep kitap aldy", - deıdi qalalyq bilim basqarmasy basshysynyń orynbasary Baǵlan Smataeva.
Bul rette sanıtarııa normalary qatań saqtalady. Eki apta ishinde elordaǵa shamamen 20 KamAZ-ben 750 tonna oqýlyq ákelingen. Oqýlyqtar mektepterge bólinýde. Oqý quralyn ýaqtyly jetkizýdi monıtorıng toby qadaǵalaıdy.
"Búgin qalalyq bilim basqarmasymen birlese otyryp, Qosshy aýylyndaǵy mektepke baryp, oqýlyqtardy 1-11 synyptarǵa tarattyq. Atap aıtqanda, oqýlyqtardyń № 54 mektep-lıseıge jiberilýin qadaǵaladyq. Biz bul úderisti tolyq baqylaımyz", – deıdi Nur-Sultan qalasy ákimdiginiń "Astana-adaldyq alańy" jobalyq keńsesiniń úılestirýshisi Sáýle Bısembaeva.
Qazaqstanda aldaǵy oqý jylyn elimizdiń barlyq mektepterindegi 1-11 synyptarda qashyqtan oqytý josparlanǵan. Osyǵan baılanysty bilim basqarmasyna jáne oqý oryndarynyń dırektorlaryna mektepterdiń qashyqtan oqytýǵa daıyndyǵyn qamtamasyz etý tapsyryldy.
