Bıznesti qoldaý mańyzdy

Is-sharaǵa partııa fılıaldary men óńirlerde is-saparda júrgen fraksııa depýtattary, kásipkerler, memlekettik organdar men BAQ ókilderi qatysty. Shara barysynda Májilis depýtaty Azat Perýashev eldegi pandemııamen kúreste qabyldanǵan sharalardyń jeke kásipkerlerge áserin aıta kele, engizilgen karantınge qatysty pikirimen bólisti. «Qazirgi tańda elde tótenshe jaǵdaıdy engizý, karantın tártibin uzartý týraly sheshimniń ózin-ózi aqtaǵanyn kórip otyrmyz. Birneshe apta buryn ǵana álemdegi jaǵdaıdan qaraǵanda bizdegi ahýal qıyn dep qorqa bastaǵan edik. Karantındi uzartý týraly sheshimdi qoldadyq. Bul sheshim durys boldy. Prezıdent te osyny tapsyrǵanyn bilesizder. Iаǵnı kásiporynnyń jumysyn shektep qana qoımaı, ony rettep otyrý kerek», dedi ol.

Densaýlyq saqtaý mınıstrliginiń málimetine sáıkes elimiz indettiń sha­ryqtaý sheginen ótti. A.Perýashev aýrý juqtyrýdyń azaıyp bara jat­qan­yn sońǵy esepterden bilip otyrǵa­ny­myzben, indet áli de azamattardyń ómi­rine qaýip tóndirip turǵanyn aıtty. Jaǵdaıdyń sál de bolsa turaqtalǵanyn aıtqan ol arqany keńge salatyn kez emes degen pikirde. «Pre­zı­dent jappaı tyıymnan góri kásip­oryndardyń jumysyn retteýdi tap­syrǵan bolatyn. Alaıda memlekettik organdar men jaýapty adamdardyń tarapynan bul tapsyrma basqa sıpat alyp, bıznes kóptegen kedergimen betpe-bet keldi. Ondaı shekteýlerdiń keıde negizi bolmaı shyǵady», dedi ol.

Onlaın is-shara barysynda pandemııa kezinde bızneske memleket tarapynan kórsetiletin kómektiń qanshalyqty tıimdi ekeni kóterildi. Qatysýshylar kásipkerlerge nesıe jeńildigi sekildi arnaıy qoldaý, «Ata­meken» kásipkerler palatasymen birlesken jumys, jergilikti kásip­ker­ler kezdesetin qıyndaqtar jaıly aıtty. Sóz alǵan jeke kásipkerler óz bıznesiniń qazirgi kúıin baıandady. Sarapshylar memleket kórsetip jatqan qoldaý týraly aqparattyń tur­ǵyndarǵa jetpeýi, kásipkerlerge jetkilikti túsindirilmeýi sekildi máse­lelerdiń baryn jasyrmady. Jı­nalǵan top salanyń turaqty damýy el ekonomıkasyna tikeleı áser etetinin alǵa tartyp, qıyn kezeńde bıznes ókilderine barynsha kómek kórsetilýi kerek ekenin qoldady.