Shýchınsk qalasynyń soltústik bóliginde osy attas kóldiń jaǵasynda ornalasqan ǵylymı ortalyqtyń qyzmetimen tanysý barysynda senator Eýropadan, Sibirden, Soltústik Amerıkadan, Qıyr Shyǵystan, Japonııadan, Qytaıdan, Koreıadan, Orta Azııadan ósimdikterdiń 600-den astam túri usynylǵan ıntrodýsentter toptamalarynyń áralýandyǵyna nazar aýdardy.
Dendrologııalyq parktiń qyzmeti men negizgi mindetteri týraly Baqytjan Jumaǵulovqa Á.N.Bókeıhannyń atyndaǵy QazQSǴZI Bas dırektory Álimjan Rahymjanov pen seleksııa bóliminiń meńgerýshisi Iаna Krekova aıtyp berdi
Instıtýt orman florasyn saqtaýmen jáne kóbeıtýmen, orman ekpelerin adam ómirinde paıdalanýdyń jańa múmkindikterin qamtamasyz etýmen aınalysady. Ǵalymdardyń zertteýleri ekologııalyq apat aımaqtaryn, agroormanmelıoratıvtik jáne kógaldandyrý ekpelerin qosa alǵanda, Qazaqstannyń orman qoryn zertteýge baǵyttalǵan.
Ǵalymdardyń aıtýynsha, dendrologııalyq saıabaqta usynylǵan ósimdikterdiń eń qundy qorlary ǵylymı zertteýler, ekspozısııalar qurý jáne bıoalýantúrlilikti saqtaý alańy ǵana emes, sonymen qatar orman sharýashylyǵynda, kógaldandyrýda jáne basqa da salalarda qoldanylatyn tehnıkalyq, taǵamdyq, dárilik jáne sándik ósimdikterdiń assortımentin baıytýdyń mańyzdy kózi bolyp esepteledi.
Senator sapar barysynda orman sharýashylyǵy jáne agroormanmelıorasııa salasynda zertteýler júrgizý; orman sharýashylyǵyn júrgizýdiń ǵylymı negizderin ázirleý; ǵylymı kadrlar daıarlaý; ınnovasııalyq tehnologııalardy ǵylymı qamtamasyz etý jáne olardy óndiriske engizý sııaqty baǵyttarda mamandanatyn «Ulttyq agrarlyq ǵylymı-bilim berý ortalyǵy» KeAQ quramyna kiretin ǵylymı-zertteý ınstıtýtynyń qyzmetine qatysty máselelerdi talqylady.
Senator kezdesýde elorda aınalasyn jáne elimizdiń iri qalalaryn kógaldandyrý, orman ǵylymyn damytý, ǴZI nysandarynyń ınfraqurylymyn jańǵyrtý, Qazaqstanda týyndaıtyn ekologııalyq problemalardy sheshýdegi ǵalymdardyń róli máselelerin kóterdi.
