Múgedektigi bar jandarǵa arnaıy áleýmettik qyzmet kórsetýdi jaqsartý máselesi Prezıdent Qasym-Jomart Toqaevtyń saılaýaldy baǵdarlamasynda negizgi mindetterdiń biri retinde belgilengen bolatyn. Erekshe muqtajdyǵy bar azamattarǵa barlyq qajetti jaǵdaıdy jasaý týraly másele Memleket basshysynyń «Syndarly qoǵamdyq dıalog – Qazaqstan turaqtylyǵy men órkendeýiniń negizi» atty halyqqa Joldaýynda da aıryqsha aıtylǵan edi.
Bul ortalyq psıhonevrologııalyq patologııasy bar múgedek balalarǵa mindetti qyzmet túrlerin kórsetedi. Munda 3 jastan 18 jasqa deıingi kemtar balalarǵa arnaıy áleýmettik kómek kórsetýdiń keshendi sharalary tolyq qamtylǵan. Ortalyq basshysy Anargúl Ospanova ózi jetekshilik etetin kommýnaldyq memlekettik mekemesiniń jaı-japsaryn baıandap berdi. Qazir ortalyqta 123 bala bar, olar alty jalpy topqa bólingen. 3 pallıatıvtik bólimshe men reabılıtasııalyq topta dimkás jasóspirimderge barlyq qajetti qyzmet túrleri kórsetilip jatyr.
Depýtattar ortalyq jumysymen tanysa kele mundaı mekemelerde qajetti kómektiń barlyq spektri qamtylýy tıis ekenin atap ótti. Elimizde júrgizilip jatqan ınstıtýsıonaldy reformalarǵa baılanysty tıimdi, zamanaýı jáne sapaly memlekettik qyzmetterdi qamtıtyn osy zamanǵy memlekettik mehanızmderdi qurýdyń mańyzdylyǵyna toqtaldy.
Múgedektigi bar jandardyń quqyǵy men ómir súrý sapasyn jaqsartý týraly 2025 jylǵa deıingi kezeńge arnalǵan jańa Ulttyq jospar qabyldanǵany belgili. Osy Ulttyq jospar áleýmettik qorǵaý, bilim berý, densaýlyq saqtaý, áleýmettik sala qyzmetkerleriniń biliktiligin arttyrýdyń keshendi sharalaryn qamtıdy.
Almaty qalasyndaǵy osy ortalyq «Úzdik medısınalyq-áleýmettik mekeme» nomınasııasynda jeńimpaz atanǵan.
