Alaıda keıbir aýdandardyń sharýashylyqtary altyn astyqqa oraq túsirýge asyqpaı, tehnologııalyq merzimdi qatań saqtap, orýǵa tek jaqyn kúnderde kirispekshi. Sonyń ishinde Aıyrtaý aýdanynyń dıhandary da bar. Aýdan ákimi Darhan Ámrınniń aıtýyna qaraǵanda: "Bıyl aýdan 370 myń gektar jerge astyq ekken. Barlyq tehnologııalyq talaptardy dıhandar oryndaýǵa tyrysty. Sonyń ishinde 10 myń tonna mıneraldyq tyńaıtqyshtar sebildi. Aramshópti qurtýda hımııalyq quraldar ýaqtyly qoldanyldy. Sonyń arqasynda astyq ta bitik shyqty. Astyq orýǵa jappaı kirisýdi 10-15 tamyz aralyǵynda josparlaǵan edik, alaıda búgingi kúnniń ózinde astyqtary pisip úlgergen 5-6 sharýashylyq úlken oraqqa kirisip ketti. Biz bıyl tehnıkalyq parkty jańartýǵa da úlken nazar aýdardyq. Sharýalar bıyl 2,4 mlrd teńgege 170 birlik túrli tehnıkalar satyp aldy", deıdi ol.
Sonymen birge bıyl aıyrtaýlyq dıhandar óz jumyskerleriniń eńbekaqysyn 30 paıyzǵa deıin arttyrýdy kózdep otyrǵan kórinedi. Bıylǵy astyqtyń shyǵymdylyǵy joǵary. Máselen, oraqqa kirisip ketken "Saýmalkól AGRO" JShS dıhandary búgingi kúnniń ózinde arpanyń gektarynan 22 sentnerden alyp jatqan kórinedi. Byltyrǵy shyǵymdylyq budan eki ese tómen bolǵan.
Elimizdiń eń basty baılyǵy – altyn astyq qyrmanǵa aman túsip, qoımadaǵy qorlarymyzdy toltyrsa eshkimniń murtyn balta shappaıdy. Qazir jalǵyz Qyzyljar óńiri ǵana emes, barsha qazaqstandyqtar osy tilekte ekeni anyq.
