«Másele mereıtoıda emes – tuǵyrly tulǵanyń týyndylarynan tereń tálim alýda. Abaıdyń rýhyna taǵzym etý – onyń qaǵıdatyn ustaný, amanatyna adal bolý. Sonda ǵana jas urpaqtyń sanasyna qasterli qundylyqtardy sińiremiz. Biz uly oıshyldyń ónegeli ómiri men taǵylymy týraly aıtýdan jalyqpaımyz. Ásirese qazirgi Qazaqstan qoǵamyn Abaıdyń rýhanı ustanymyna saı damytý asa mańyzdy. Men bul jóninde «Abaı jáne HHI ǵasyrdaǵy Qazaqstan» atty maqalamda keńinen aıttym», - dedi Prezıdent.
Qasym-Jomart Kemeluly bıylǵy jyl halyqaralyq «Abaı jylyna» aınalǵanyn eskere otyryp, aqynnyń baǵa jetpes murasyn uǵyndyrý jáne dáripteý – azamattyq paryzymyz ekenin basa aıtty. Prezıdenttiń aıtýynsha, Abaı – álemdik deńgeıdegi kemeńger tulǵa. Abaıtanýdyń tuǵyrnamalyq negizi de osy bolýy tıis.
«Qazir aqynnyń eńbekterin halyqaralyq ǵylymı aınalymǵa engizý úshin naqty jáne maqsatty jumystar qolǵa alynýda. Onyń shyǵarmalary álemniń on tiline aýdarylyp, baspaǵa ázirlendi. Bul kitaptar júzden astam eldiń kitaphanalary men mádenı ortalyqtaryna jiberiledi. Birqatar sheteldik aýdarmashylarǵa, Abaıdyń shyǵarmashylyq murasyn zertteýshiler men nasıhattaýshylarǵa meniń Jarlyǵymmen memlekettik nagrada berildi», - dedi Memleket basshysy.
