Dúısenbi kúni Volgograd qalasynda jolaýshylar mingen avtobýsta jarylys bolǵan edi. Keshe quqyq qorǵaý organdary alty adamnyń ómirin qıyp, qyryqtan astam adamdy jaradar etken terrorlyq árekettiń jaı-japsary jóninde resmı aqparat taratty.
Dúısenbi kúni Volgograd qalasynda jolaýshylar mingen avtobýsta jarylys bolǵan edi. Keshe quqyq qorǵaý organdary alty adamnyń ómirin qıyp, qyryqtan astam adamdy jaradar etken terrorlyq árekettiń jaı-japsary jóninde resmı aqparat taratty.
Aqparattarǵa qaraǵanda, terrorlyq áreketti 30 jastaǵy daǵystandyq jankeshti Naıda Asııalova jasaǵan. Quqyq qorǵaý organdary qyzmetkerleriniń pikirinshe, Asııalovaǵa jarylǵysh zatty onyń azamattyq nekedegi kúıeýi Dmıtrıı Sokolov daıyndap bergen. Kúsh qurylymdarynyń málimetteri boıynsha, Sokolov ótken jyldyń shildesinde Asııalovanyń yqpal etýimen Daǵystanǵa baryp, onda sodyrlar tobyna qosylǵan. Sondaı-aq, ol ózine Abdýl Djabbar degen atty alǵan kórinedi.
Prezıdenttik saılaýǵa qatysý nıetin bildirdi
Sırııa prezıdenti Bashar Asad Jenevada daıyndalyp jatqan Sırııa janjalyn beıbit retteý jónindegi konferensııany synǵa aldy. Bul týraly «Frans-press» aqparat agenttigi habarlady.
Bashar Asad «Ál-Maıadın» telearnasynda sóılegen sózinde «sheshimdi sırııalyqtar qabyldaýy qajet, ony sheteldik kúshterdiń tanýy tıisti emes» ekendigin aıtqan kórinedi. Sonymen qatar, ol 2014 jyly Sırııada ótetin prezıdenttik saılaýǵa qatysýǵa daıyn ekendigin málimdegen. Budan birer apta buryn AQSh-tyń memlekettik hatshysy Djon Kerrı Bashar Asadtyń prezıdenttikke qaıta saılanýy Sırııadaǵy azamattyq soǵysty uzartady, dep aıtqan bolatyn. Aıta keteıik, osy eldegi birqatar oppozısııa ókilderi qarashada Jenevada ótetin konferensııaǵa qatyspaıtyndaryn málimdedi.
Nıderlandy halyqaralyq sotqa júginbek
«Frans-press» aqparat agenttiginiń habarlaýynsha, Nıderlandy úkimeti Reseı bıliginiń is-qımylyna baılanysty Teńiz quqyǵy jónindegi halyqaralyq trıbýnalǵa resmı shaǵym joldaǵan.
Bul shaǵym reseılik shekara qyzmetiniń qyzmetkerleri gollandııalyq «Arktık Sandraız» kemesin «basyp» alǵanyna baılanysty joldanyp otyr. Nıderlandy syrtqy ister mınıstri Frans Tımmermanstyń túsindirýinshe, Nıderlandy úkimeti kemedegi jolaýshylar men keme ekıpajyn (barlyǵy 30 adam) bosatý úshin osyndaı qadamǵa baryp otyr. Reseılikterdiń is-áreketteri halyqaralyq quqyq talaptaryna sáıkes kelmeıdi. Al reseılik shekarashylar atalǵan kemeni qaraqshylyqpen aınalysty dep ustaǵan edi.
QYSQA QAIYRYP AITQANDA:
Keshe Orynbor qalasynda bolǵan tóbeles kezinde travmatıkalyq qarýdan atylǵan oqtan jasóspirim qaza boldy. Tóbeleske 20-25 jas aralyǵyndaǵy jastar qatysqan.
Brýneı sultany Hassanal Bolkıah sharıǵat zańyna negizdelgen eldiń jańa qylmystyq zańnamasy engiziletinin málimdedi. Zańnamada taspen urý jáne qoldy kesý de qarastyrylǵan. Qujat alty aıdan soń kúshine enedi.
82 jastaǵy Muhammed Salımdi óltirdi dep aıyp taǵylǵan ýkraınalyq aspırant Pavel Lapshın óziniń kinásin moıyndady. Sondaı-aq, ol Ýest-Mıdlends qalasyndaǵy meshit mańynda terrorlyq áreketter jasaýǵa ázirlengenin de moıyndaǵan.
Estonııadaǵy mýnısıpaldyq saılaýda sentrıstik baǵyt ustaıtyn partııa jeńiske jetti. Olar saılaýshylardyń 32 paıyz daýysyna ıe bolǵan.
Kaddafıdiń máıitin berýdi talap etti
Lıvııanyń burynǵy basshysy Mýammar Kaddafıdiń jesiri Safııa Farkash kúıeýiniń jáne sońǵy ret onymen birge bolǵan adamdardyń máıitterin týǵan-týystaryna berýdi talap etti. Onyń ashyq hatynyń mátini «Golos Rossıı» radıostansasynyń saıtynda jarııalandy.
«BUU Qaýipsizdik Keńesiniń, Eýropalyq odaqtyń músheleri, sondaı-aq osy qylmysqa qatysy barlar óltirilgen adamdardyń jerlengen ornyn taýyp, olardyń máıitterin týǵan-týystaryna berýdi talap etemin, – delingen ashyq hatta. – Olar laıyqty jerlenýi tıis». Safııa Farkash, sondaı-aq Afrıka odaǵynan kúıeýiniń ólimine jan-jaqty tekserý júrgizýdi de talap etip otyr. Mýammar Kaddafı óltirilgennen keıin onyń denesi qupııa jaǵdaıda jerlengen edi. Qazirgi kezde Safııa Farkash úsh balasymen Omanda turyp jatyr.
«Qosh bolyńyz, prezıdent myrza!»
Grýzııa prezıdenti Mıhaıl Saakashvılıdiń Tbılısıdegi rezıdensııasynda «Qosh bolyńyz, prezıdent myrza!» degen aksııa ótedi. «Novostı Grýzııa» agenttiginiń habarlaýynsha, bul is-shara 25 qazanǵa belgilengen, ony «Patrıottar» qozǵalysy uıymdastyrýda.
«Osy aksııa boıynsha biz Saakashvılıge eldi basqarý kezinde ishki jáne syrtqy saıasatta qol jetkizgen tabystary úshin alǵys aıtamyz», – deıdi atalǵan qozǵalystyń ókilderi. Olardyń aıtýynsha, prezıdent rezıdensııasyna kelemin deýshilerge esik ashyq. Grýzııada kezekti prezıdent saılaýy 27 qazanda ótedi. Ortalyq saılaý komıssııasy 23 kandıdatty tirkegen. Tirkelgen kandıdattardyń arasynan Georgıı Margvelashvılıdiń reıtıngi joǵary sııaqty.
Muǵalimin, synyptasyn atyp óltirdi
Nevada shtatynyń Sparks qalasyndaǵy orta mekteptiń oqýshysy muǵalimin jáne bir synyptasyn atyp óltirgen. Odan soń ózin atqan. «Reıter» agenttiginiń habarlaýynsha, oqıǵa erteńgilik sabaq bastalar aldynda bolǵan.
Oqıǵaǵa kýá bolǵandardyń aıtýyna qaraǵanda, aty-jóni atalmaǵan oqýshy aldymen oqýshylardyń birin, odan soń matematıka pániniń muǵalimin tapanshamen atyp salǵan kórinedi. Oqýshynyń ne sebepten osyndaı qylmysqa barǵany belgisiz qalyp otyr. Jyl basynan beri AQSh mektepterinde mundaı birneshe oqıǵa oryn alǵan edi.
Internet materıaldary negizinde ázirlendi.
