Abaı • 10 Tamyz, 2020

Abaı aıtqan «bes dushpannan» tolyq arylyp bolǵan joqpyz

1630 ret kórsetildi

QR Prezıdenti Qasym-Jomart Toqaev   «Abaı – rýhanı reformator» atty maqalasynda osylaı dedi. Onyń aıtýynsha, biz básekege qabiletti memleket bolý úshin Abaı murasyn esten shyǵarmaýymyz kerek. Prezıdent munyń sebebin ult retindegi jańarý ıdeıasy da Abaı kózqarasymen úndesip jatqandyǵymen túsindirdi.

«Kelesi jyly Qazaqstan Táýelsizdiginiń 30 jyldyǵyn atap ótemiz. Biraq kezinde uly oıshyldy qatty tolǵandyrǵan keıbir keleńsizdikter qoǵamda áli de kezdesedi. О́kinishke qaraı Abaı aıtqan «bes dushpannan» tolyq arylyp bolǵan joqpyz. Azamattarymyzdyń arasynda jalqaýlyq pen sózýarlyq jıi kezdesetini qynjyltady. Bular burynǵysha toı­qumarlyqtan tartynbaı, kúndelikti tynymsyz tirlikti dáripteýdiń ornyna, árbir qoǵamdyq oqıǵadan saıası astar izdeıdi de otyrady. Abaı halyqty toı toılaýǵa emes, eńbek etýge, rýhanı kemeldenýge shaqyrdy. Abaıdyń ulaǵaty áli kúnge deıin mańyzyn da, qundylyǵyn da joǵaltqan joq. Sondyqtan biz onyń tereń oılaryna, keleshektiń kelbetine úńilgen kóregendigine tańyrqaýdan jalyqqan emespiz», - degen Memleket basshysy Abaı iliminiń búgingi birqatar baǵyttarǵa oraılas keletin tustaryn atap ótti.

Prezıdent bul baǵytta eń aldymen, bilim ıgerý isin alǵa tartty.

«Biz búkil álemdi aqyl-oı men parasatty paıym arqyly ǵana moıyndata alamyz. Zaman talabyna saı bilim alý ıntellektýaldy ult qalyptastyrýǵa jol ashady», - dedi Prezıdent.

Ekinshi, tárbıe máselesi. Sondyqtan, óskeleń urpaqqa durys baǵyt bergen jón. Aqynnyń «Paıda oılama, ar oıla, talap qyl artyq bilýge» degen ósıetin árdaıym sanaǵa sińirý qajet.

Prezıdent qozǵaǵan úshinshi másele - jańa kásip ıgerý. Onyń aıtýynsha, aqyn ár qazaq óz isiniń sheberi bolsa dep armandady. Ásirese básekelestikke toly almaǵaıyp zamanda munyń máni zor. Abaı: «Mal kerek bolsa, qolóner úırenbek kerek. Mal jutaıdy, óner jutamaıdy» deıdi. Biz eńbekke, jańa óner ıgerýge degen kózqa­rasymyzdy túbe­geıli ózgertýge tıispiz. Baılyqtyń da, baqyttyń da kilti – óziń súıgen kásipte.

«Tórtinshi, yntymaq máselesi. Abaı árdaıym qoǵamnyń bereke-birligin arttyrýǵa den qoıdy. Ol «Birińdi, qazaq, biriń dos, kórmeseń istiń – bári bos» dep, eldi tatýlyqqa shaqyrady», - dedi Qasym-Jomart Kemeluly.

Sońǵy jańalyqtar

Qazaqstanda taǵy 69 adam indet juqtyrdy

Koronavırýs • Búgin, 09:00

Uqsas jańalyqtar