Abaı • 10 Tamyz, 2020

Murat Áıtenov shymkenttikterdi Abaı kúnimen quttyqtady

107 ret kórsetildi

Búgin uly oıshyl, qazaq jazba ádebıetiniń negizin qalaýshylardyń biri hakim Abaı Qunanbaıulynyń 175 jyldyǵy respýblıka kóleminde atap ótilýde. Osy aıtýly dataǵa oraı Shymkent qalasynyń ákimi Murat Áıtenov qala turǵyndaryn mereıli merekemen quttyqtady, - dep habarlaıdy Egemen.kz.

"Qurmetti Shymkent qalasynyń turǵyndary! Barshańyzdy elimizdegi jańa mereke — Abaı kúnimen shyn júrekten quttyqtaımyn! 
 
Prezıdent Qasym-Jomart Toqaevtyń sheshimimen 10 tamyz – Abaı kúni retinde belgilenip, memlekettik merekelerdiń tizimine engizildi. Bul — danyshpan aqynǵa degen qurmet, onyń rýhanı murasyn zerttep, taný men nasıhattaý jolyndaǵy mańyzdy qadam. 
 
Búginde kez kelgen ulttyń básekege qabilettiligi men damý deńgeıi onyń álem mádenıeti men órkenıetine qosqan úlesi jáne adamzatqa syılaǵan ardaqty tulǵalarymen ólshenedi. Mine, osy turǵydan alǵanda adamzat aqyl-oıynyń asqar shyńyna aınalǵan Abaı qazaq halqynyń ulttyq maqtanyshy.
 
Memleket basshysy óziniń «Abaı jáne HHI ǵasyrdaǵy Qazaqstan» atty maqalasynda «Abaı murasy – bizdiń ult bolyp birlesýimizge, el bolyp damýymyzǵa jol ashatyn qasterli qundylyq. Jalpy, ómirdiń qaı salasynda da Abaıdyń aqylyn alsaq, aıtqanyn istesek, el retinde eńselenemiz, memleket retinde muratqa jetemiz. Abaı armany – halyq armany. Halyq armany men amanatyn oryndaý jolynda aıanbaǵanymyz abzal. Abaıdyń ósıet-ónegesi HHI ǵasyrdaǵy jańa Qazaqstandy osyndaı bıikterge jeteleıdi» dep atap kórsetti. 
 
Rasynda hákim Abaıdyń óz zamanynda aıtqan oılary men tujyrymdary áli kúnge jeke adam úshin de, tutas qoǵam úshin de mańyzyn joımaı, ómirsheńdigin saqtap otyr. Onyń yntymaq pen birlik jaıly oılary búgingi qoǵamda turaqtylyq men tynyshtyqty saqtaýda asa mańyzdy ról atqarady. Kemeńger tulǵanyń «Birińdi qazaq biriń dos, kórmeseń istiń bári bos» degen keleli oıǵa negizdelgen tanymy ulttyq birligimizdiń irgetasy bola alady. 
 
Danyshpan aqyn jas urpaqtyń bilim alyp, ǵylymdy ıgerýine erekshe mán bergen. Muny onyń óleńderi men qara sózderinen anyq kóremiz. Bilim men ǵylym órkenıetke bastar alǵyshart ekendigin Abaı sol zamanda-aq jete túsingen, jan-tánimen tereń uǵynǵan. 
 
Adamı kapıtal damýdyń basty ólshemine aınalǵan HHI ǵasyrda da «Bolmasań da uqsap baq, bir ǵalymdy kórseńiz» degen ósıeti aıryqsha mańyzǵa ıe bolyp otyr. О́ıtkeni, osy bir aýyz sózi arqyly Abaı bizdi ómir boıy izdenip bilim alýǵa, kásibı biliktiligimizdi arttyrýǵa úndeıdi.
 
Aramyzda bilim men tulǵalyq damýdy ómirlik kredosyna aınaldyrǵan azamattar kóbeıgende ǵana bizdiń qoǵamnyń rýhanı-ıntellektýaldyq qýaty kemeline keledi.
 
Abaı shyǵarmashlyǵyndaǵy taǵy bir ózekti taqyryp — adal eńbek. Erinshektik pen beker mal shashpaqtyqty, ıaǵnı, «bes dushpannyń» qataryna qosqan aqyn adal eńbek etýdi «bes asyl istiń» birinen sanaıdy. Iаǵnı, Abaı tanymynda yrys-nesibe men berekeniń bastaýy ǵana emes, ózi jyrlaǵan kemel adam atanýdyń aınymas sharty. 
 
Uly oıshyldyń eńbek etýdi adam ómiriniń mánine balaıtyn osy ósıetin búgingi qoǵamdyq sananyń negizine aınaldyra bilsek, elimizdiń básekege qabilettiligi artyp, Qazaqstannyń qaryshtap damı túseri talassyz. 
 
Qadirmendi qaýym! 
 
Táýelsizdik jyldarynda Qazaqstan ekonomıkanyń damyp, halqymyzdyń áleýmettik jaǵdaıynyń jaqsarýyna ǵana emes, rýhanı-mádenı damýyna da aıryqsha nazar aýdaryp keledi. Elimizde ár jyldary «Mádenı mura», «Halyq tarıh tolqynynda» sekildi mańyzdy baǵdarlamalar qabyldanyp, aýqymdy ister atqaryldy. 
 
Al, Elbasy Nursultan Nazarbaevtyń bastamasymen qabyldanǵan «Rýhanı jańǵyrý» baǵdarlamasy halqymyzdy jańa rýhanı órege, jańa ulttyq sapaǵa kóterýdi kózdegen keleli bastama boldy. 
 
Prezıdent Qasym-Jomart Toqaevtyń Abaı Qunanbaıulynyń 175 jyldyǵyn keń kólemde atap ótý, Abaı kúnin belgileý arqyly onyń ádebı murasyn keńinen nasıhattaý jónindegi bastamasy — bizdiń qoǵamnyń rýhanı jańǵyrý, rýhanı kemeldený jolyndaǵy jańa kezeńi, naqty qadamy. 
 
Búkil qoǵam bolyp, el bolyp Abaıǵa oralý arqyly, Abaıdy taný arqyly biz ózimizdi tanımyz. Tulǵa retinde de, ult retinde de ózimizdi taný – bizdiń uly isterimizdiń, jarqyn bolashaǵymyzdyń bastaýy bolaryna senemiz. 
 
Olaı bolsa, árbirimiz Abaı shyǵarmashylyǵymen tanysyp, odan rýhanı qýat alýǵa, onyń ósıetterin ómirlik ustanymyzǵa aınaldyrýǵa umtylaıyq!", dedi qala ákimi Murat Áıtenov óz quttyqtaýynda.
 
Sońǵy jańalyqtar

Epızootıkalyq jaǵdaı turaqtanýda

Aımaqtar • Búgin, 10:45

Qazaqstanda taǵy 69 adam indet juqtyrdy

Koronavırýs • Búgin, 09:00

Uqsas jańalyqtar