Saıasat • 11 Tamyz, 2020

Jemqorlar alleıasy kerek pe?

15 ret kórsetildi

Qostanaı oblysyndaǵy sybaılas jemqorlyqqa qarsy is-qımyl departamenti alǵashqy alty aılyq jumysyn qorytyndylady. Departament basshysy Qýanysh Bekbasovtyń aıtýynsha, bıýdjet qarjysyna bórideı tıip, talan-taraj etýge epti sheneýnikter qatary azaıa­r emes. Jegenin jelkesinen shyǵaryp, topyrlatyp túrmege toǵytyp jatqanymen, jemqorlyqtyń joıylatyn túri joq. Qolyna qazyna qazanynyń tutqasy tıgende saıtan azǵyryp, qarjynyń qyzýyna arbalǵan bázbir sheneýnikter etke úımelegen shybyndaı birinen soń biri ustalyp jatyr.

Infografıkany jasaǵan Amangeldi Qııas, EQ

– Basty mindet «para ber­meý jáne para almaý» prın­sıpterine negizdelgen qoǵamdyq sanany qalyp­tastyrý. Sondyqtan biz kúshti jáne belsendi azamattyq qoǵamǵa senim artamyz, – deıdi departament basshysy.

Kókeıde qala ortaly­ǵyn­daǵy el eń kóp júretin jerge «Jemqorlar alleıasyn» ashyp qoısa qalaı bolar eken?» degen oı qylań etti. Bálkim, munyń sybaılas jemqorlyqqa qarsy qoǵamdyq sananyń qalyptasýyna septigi tıip qa­lar. Ár jemqordyń jeti atasyn túgendep, aty-jó­­nin jazyp, úlken por­tre­tin tańbalap ilip, «Pá­len­baı laýa­zymda otyryp, mem­­leket­tiń pálenbaı qar­jy­syn jymqyrǵany úshin pálenshe jylǵa sottaldy!» dep qara sııa­men battıtyp ja­­zyp qoısa... Jemqorlyqqa qarsy kúrestiń kópke oı salar tıimdi tásili osy bolyp qalar, múmkin.

Aımaqta sybaılas jem­qorlyqqa qarsy qyrýar sha­­rýa atqarylǵanyn joq­qa shyǵarýǵa bolmaıdy. «Sıfr­ly Qazaqstan» baǵdar­lamasy arqyly memlekettik qyzmet kórsetý júıesiniń ba­sym bóligi avtomattandy­ryldy. Búginde oblysta mem­lekettik qyzmettiń 12%-y qaǵaz tú­rinde, 88%-y elektrondy túrde kórsetiledi. Qa­zir mem­lekettik qyzmet kórsetý barysynda sheneýnik pen azamat burynǵydaı júzbe-júz kezdespeıtindikten, para berý­shiniń de, para alýshy­nyń da joly kesildi. Biraq jemqorlyq COVID-19 sııaq­ty mýtasııaǵa beıim. Bir jaǵy­nan kesip tastasań, ekinshi jaǵy­nan ósip shyǵady.

Departament basshysynyń aıtýynsha, oblysta sońǵy jarty jyldyń ishinde ǵana sybaılas jemqorlyqqa qa­tys­ty 86 qylmys tirkelip otyr. Onyń 59-y aýyr jáne asa aýyr qylmystar sanatyna jatady. Qazir 77 qylmysqa qa­tysty tergeý aıaqtalyp, sot qaraýyna jiberilgen.

– Bıyl sybaılas jem­qor­lyqqa qarsy kúres qyz­meti anyqtaǵan asa aýyr qyl­mystyń biri – oblystyq bi­lim basqarmasy qarjy bó­limi basshysynyń orynba­sary Shuǵaevqa qatysty is. Ol bir kommersııalyq meke­meniń bilim salasyna 370 mln teńgege kompıýter satyp alý konkýrsyn utyp alýy­na araǵaıyndyq jasap, kásipkerdi 30 mln teńge para berýge ıtermelegen. Atalǵan qylmystyq is taıaý kúnderi sotqa jiberiledi, – dedi Q.Bekbasov.

Sybaılys jemqorlyqqa qarsy qyzmet mamandary aımaqta júzege asyrylyp jatqan memlekettik baǵdar­lamalardy baqylaý barysynda 31 qylmysty anyqtap, shaǵyn jáne orta bıznestiń sharýasyna zańsyz aralasqysy kelgen 16 sheneýnikke tos­qaýyl qoıǵan. Sondaı-aq jú­ıeli jemqorlyqqa qatysty 6 qylmys áshkerelendi.

Aımaqta alty aı ishinde 45 laýazymdy tulǵa zań aldynda jaýapqa tartylyp otyr. Olardyń ishinde áleýmettik mańyzdy salalarda jaýapty qyzmet atqarǵan túrli laýazym ıeleri bar. Mysaly, oblystyq kóliktik baqylaý ınspeksııasynyń basshysy J.Arapbaev, Qostanaı qa­lalyq TKSh bóliminiń bas­tyǵy A.Tarasov, Qostanaı qalasy qurylys bóliminiń bastyǵy Q.Nuralın sııaqty sheneýnikter jeń ushynan jalǵasyp, qazyna qarjysyna qol suqqany úshin 3 jyl 6 aıǵa bas bostandyǵynan aıyrylsa, 10 myń teńge para alǵan aqparattandyrý jáne bilim sapasyn baǵalaý ortalyǵynyń dırektory A.Pavlıchenko 100 myń teńgeniń aıyppulyn arqalap otyr.

Qalalyq qurylys bóli­miniń bastyǵy Nuralın isti bolǵan soń, biryńǵaı tártiptik komıssııa oǵan tikeleı basshy­lyq etetin qala ákiminiń oryn­ba­sary A.Fınktiń de máse­le­sin qarap, qyzmetinen bosatty.

Jaza berseń, jemqorlar tizimi jalǵasa beredi. Máselen, jaqynda kendi Qashar kentiniń ákimi bıýdjet qarjysyn jym­qyrǵan degen kúdikpen us­talyp, sotqa deıingi tergeý isi júrip jatyr. Sybaılas jem­qorlyqqa qarsy kúres qyz­metiniń málimeti boıynsha, ákim mekeme tirkeýinde tur­ǵan qyzmettik avtokólikti jóndeýden ótkizdim dep jal­ǵan qujat jasap, 1 464 000 teńge bıýdjet qarjysyn jym­qyrǵan.

Departament deregi bo­ıyn­sha jyl basynan beri sybaılas jemqorlyq saldarynan qazynaǵa 457 mln teńge zııan keltirilgen. Onyń 414 mln teńgesi qaıta óndirilip alynǵan. Sondaı-aq jalpy quny 10 mln teńge bolatyn múlikke tyıym salynyp otyr. Qýanysh Bekbasov aımaqta sybaılas jemqorlyq qylmysy jıi kezdesetin salalardy da atap ótti. Olardyń qatarynda bilim berý, densaýlyq saqtaý, turmystyq-kommýnaldyq sharýashylyq, qurylys jáne aýyl sharýashylyǵy salalary bar.

 

Qostanaı oblysy

 

Sońǵy jańalyqtar

Epızootıkalyq jaǵdaı turaqtanýda

Aımaqtar • Búgin, 10:45

Qazaqstanda taǵy 69 adam indet juqtyrdy

Koronavırýs • Búgin, 09:00

Uqsas jańalyqtar