Aýyl jamaǵaty ortalyq kóshege dana Abaıdyń qara sózderin tolyqtaı jazyp, ilip qoıǵan. Kóshege sánmen qosa mán berip turǵan kemeńgerdiń qanatty sózderi jazylǵan taqtaıshalar A.Qunanbaıulynyń 175 jyldyǵyna bizdiń tartýymyz deıdi qaramurttyqtar.
"Elbasymyz jáne Prezıdentimiz qoǵamdy rýhanı jańǵyrýǵa shaqyryp keledi. Rýhanı jańǵyrýdy ár adam ózinen bastaý kerek. Al uly Abaıdyń shyǵarmashylyǵy adamzattyń sanasyna serpin berip, oıatatyn myqty kúsh dep bilemin. Sol sebepten bolashaq jastarǵa azyq bolsyn dep aqynnyń ulaǵatty sózderin kóshege ilip qoıýdy jón sanadyq. Bizdiń aýyldyń bir ereksheligi, kóp jaǵdaıda ortadan birigip, ortaq nárseni jasaýǵa umytylyp turamyz. Bul taqtaıshalar da turǵyndar kómegimen jasaldy. Bul bizde úrdiske aınalǵan, – deıdi aýyl ákimi Mamýrjan Najıev.
"Abaıdy oqyp ósken jas, búgingi kúnin emes keleshegin oılaıtyn tulǵalyq qyryn ashady. Babamyzdyń danalyq sózderi biz sııaqty jastarǵa úlken oı salyp, myqty tárbıe quralyna da aınalyp otyr deıdi", - aýyl jastary.
Kósheniń tazalyǵyna ǵana emes júrektiń de tazalyǵyna mán berip berip otyrǵan aýyl osylaısha Abaıdyń qara sózderinen nár alyp otyr. Mundaǵy halyqtyń 99 paıyzy ózbek ulty bolsa da qazaqtyń bas aqynyn kókke kóterip otyr. Bul uly Abaıdy oqýǵa, tanyp-bilýge ult pen tildiń, shekaranyń qajeti joq ekenin ańǵartsa kerek.
