Bilim • 13 Tamyz, 2020

Jańa oqý jylynda olqylyqtarǵa oryn berilmeıdi

223 ret kórsetildi

Jaman tumaý jaılaǵan kezde bilim salasynyń jumysy týraly el ishinde árqıly topshylaýlar aıtyla bastaǵan. Qısynǵa keletini de, kelmeıtini de bar. Máseleniń mánisi taıaýda oblys ákimi Ermek Marjyqpaevtyń qatysýymen ótken  brıfıngten belgili boldy, - dep habarlaıdy Egemen.kz

Jańa oqý jylynda 132 myńnan astam oqýshy bilim oshaǵynyń tabaldyryǵyn attamaq. Shamamen 15 myńy birinshi synyp oqýshylary. Epıdemıologııalyq jaǵdaıdy eskere otyryp, 555 mekteptiń ishinde shalǵaıda ornalasqan, ári oqýshy sany az 248 mektep jańa oqý jylyn shtattyq rejımde bastaıdy. Qalǵan 307 mektep qashyqtyqtan oqytady.

–Budan bólek, qashyqtyqtan oqytatyn mektepterde ata-analardyń ótinishi boıynsha 15 oqýshyǵa deıin bilim alatyn kezekshi synyptar jumys isteıdi. Oblys mektepterinde osyndaı 3 myń kezekshi synyp bolýy múmkin dep josparlanýda. Kezekshi synyptarda 45 myńǵa jýyq oqýshy bilim almaq. Eń basty másele, ár oqýshyǵa bilim berý úshin qajetti jaǵdaı jasaý. Qashyqtyqtan oqytý kezeńinde kompıýterlik tehnıkasy joq oqýshylarǵa mektep kompıýterleri ýaqytsha paıdalanýǵa beriletin bolady, – dedi Ermek Marjyqpaev.

Oblys ákiminiń aıtýynsha, búginde mektepterde 16 myńǵa taıaý kompıýterlik tehnıka bar. Onyń 1,5 myńy ústimizdegi jyly satylyp alyndy. Jańa oqý jyly bastalǵanǵa deıin taǵy 300 kompıýter satyp alý josparlanýda. Osy rette, oblys ákimi birinshi kezekte áleýmettik  az qamtamasyz etilgen otbasylardyń balalaryn qamtý qajettigin ekpin túsire aıtyp ótti. Osy oraıda, Úkimet rezervi qarajatyna 23 myń kompıýterlik tehnıka satyp alynbaqshy. Sondaı-aq, kompıýterlik tehnıkasy joq ustazdarǵa bilim qyzmetkerleriniń salalyq kásipodaǵy esebinen noýtbýkter satyp alynyp, paıdalanýǵa beriledi.

Oblystyń jalpy bilim beretin barlyq mektepteri keń jolaqty jyldamdyqty ınternetke qosylǵan. 300 mekteptegi ınternettiń jyldamdyǵy sekýndyna 4-ten 8 Mbıt-ti quraıdy. 252 mektepte ınternettiń jyldamdyǵy sekýndyna 8 Mbıt-ten joǵary. Qazirgi tańda «Qazaqtelekom» aksıonerlik qoǵamymen birlesip, taǵy 35 mektepte ınternet jyldamdyǵyn sekýndyna 8 Mbıt-ke arttyrý boıynsha jumystar júrgizilýde. Ol 1 qyrkúıekke deıin aıaqtalýy tıis.

132 myń oqýshynyń 94 prosentiniń ınternetke úı jaǵdaıynda qosylýǵa múmkindigi bar. Al, 7800 oqýshynyń úıinde ınternet joq. Osy máseleni sheshý úshin oqýshylarǵa qashyqtyqtan oqytý kezinde paıdalanýǵa uıaly baılanys operatorlarynyń mobıldi ınterneti bar Wi-Fi roýterler, flesh-kartalar beriledi. Sonymen qatar, Sıfrlyq damý, ınnovasııalar jáne aeroǵarysh ónerkásibi mınıstrligi mobıldi operator ókilderimen oqýshylar men pedagogtar úshin aıyna 990 teńgeniń «Bilim» jeńildetilgen tarıfyn iske qosý boıynsha kelissózder júrgizýde. Atalǵan tarıftik jospar oqýshylar men ustazdarǵa uıaly telefon arqyly bir-birine sheksiz qońyraý shalýǵa, Bilim jáne ǵylym mınıstrligimen bekitilgen bilim ınternet resýrstaryna tegin kirýge múmkindik beredi.

–Shtattyq rejımde oqytylatyn bastaýysh synyptar men shaǵyn jınaqty mektepter dezınfeksııalyq quraldarmen qamtamasyz etiledi. Sondaı-aq, jańa oqý jylyna daıyndyq retinde mektepterdiń jappaı oqý qorynyń qarjysy esebinen áleýmettik az qamtylǵan otbasylardyń balalaryna oqý quraldaryn, kıim-keshek, aıaq kıim satyp alýǵa kómek kórsetilýde. Ústimizdegi jyly oblystaǵy áleýmettik jaǵdaıy tómen  otbasylaryndaǵy 17 myń balany qoldaý maqsatyna  300 mıllıon teńge baǵyttalady, – degen oblys ákimi. 

Oblysta epıdemıologııalyq jaǵdaıǵa qaramastan, mektepterdiń qurylysy toqtaǵan joq. Búginde oblysta úsh aýysymmen oqytatyn 12 mektep bar. 1 qyrkúıekke deıin Selınograd aýdanynda 1500 orynǵa arnalǵan eki jańa mektepti paıdalanýǵa berý josparlanyp otyr. Jyl sońyna deıin atalǵan aýdanda 420 oryndyq taǵy eki mektep oqýshylarǵa esigin ashpaqshy. Kókshetaý qalasynda da birqatar mektepterdiń janynan salynyp jatqan qosymsha oqý ǵımarattarynyń qurylysy bıyl aıaqtalady. Osynyń barlyǵy mektepterdegi úsh aýysymmen oqytý máselesin sheshýge múmkindik beredi.

Sonymen qatar, eki mektepti qaıta jańartý jumystary aıaqtalady. Bıyl jańa mektepterdiń salynýymen qatar, mektep ǵımaratyna kúrdeli jóndeý jumystary da qarqyndy júrgizilýde. Máselen, «Jumyspen qamtýdyń jol kartasy» jáne «Aýyl – el besigi» baǵdarlamasy aıasynda oblystaǵy 114 mektep jóndeýden ótkizilýde. 

Taǵy bir másele, mektepke deıingi mekemelerde kezekshi toptar jumys isteýde. Búginde  89 mektepke deıingi mekemede 244 kezekshi top ashylǵan. Qosymsha bilim berý uıymdary da ázirshe qashyqtyqtan jumys isteýdi jalǵastyrady. Alaıda, ata-ananyń ótinishi boıynsha dástúrli rejımde oqytýǵa ruqsat etiledi. Tek, toptaǵy bala sany beseýden aspaýy tıis. Oblys ákimi qashyqtyqtan oqytý kezinde balalarǵa jáne ata-analarǵa arnaıy bilim berý uıymdarynda onlaın keńester beriletinin aıtty. Jalpy, oblysta jańa oqý jylyna daıyndyq jumystary odan ári jalǵasýda. 

 

Aqmola oblysy

   

Sońǵy jańalyqtar

Epızootıkalyq jaǵdaı turaqtanýda

Aımaqtar • Búgin, 10:45

Qazaqstanda taǵy 69 adam indet juqtyrdy

Koronavırýs • Búgin, 09:00

Uqsas jańalyqtar