2020 jyldyń 1 tamyzynan bastap Nur-Sultan qalasynda josparly medısınalyq kómek kórsetý qaıta jandandy. Birinshi kezekte, aýrýhanaǵa jatqyzýdy respýblıkalyq deńgeıdegi mamandandyrylǵan klınıkalar, kóp beıindi aýrýhanalar, qalalyq aýrýhanalar (COVID-19-men kúres jónindegi is-sharalarǵa qatyspaıtyn qalǵan stasıonarlardy kezeń-kezeńimen qosa otyryp) jolǵa qoıa bastady. Aıta ketý kerek, olardyń ishinde jeke klınıkalardyń sany da jetkilikti. Nur-Sultan qalasy boıynsha josparly medısınalyq kómek qyzmetterin jetkizýshilerdiń tolyq tizimimen Qordyń saıtynda (https://fms.kz/ru/content/pg). tanysýǵa bolady. Tizim únemi jańartylyp otyrady.
"Koronavırýsqa qarsy is-sharalarǵa qatyspaıtyn medısınalyq uıymdar jumysyn qaıta bastaýǵa múmkindik aldy. Josparly medısınalyq kómek kórsetý boıynsha qurylǵan jospar epıdemıologııalyq jaǵdaıǵa baılanysty ózgerip otyrady", – dep atap ótti "Áleýmettik medısınalyq saqtandyrý qory" KEAQ Nur-Sultan qalasy boıynsha fılıaly dırektorynyń orynbasary Aınagúl Dáýletshına.
Bárimizge belgili, karantındik shekteýlerge baılanysty kóptegen josparly medısınalyq qyzmetter ýaqytsha toqtatylǵan bolatyn. Endi bul sala qaıta jandanǵan kezde josparly medısınalyq kómekti alýshylar sany aıtarlyqtaı ósedi dep kútilýde. Qajetti sanıtarlyq-epıdemıologııalyq sharalardy jasaǵannan keıin medısınalyq uıymdarǵa stasıonarlardy ashýǵa ruqsat beriledi.
