Bilim • 14 Tamyz, 2020

Oqýshylarǵa qajet gadjetter úlestiriledi

45 ret kórsetildi

Qamqorlyqty qajet etetin bilim alýshylarǵa kómek kórsetýdi kózdeıtin «Oqýshyny qolda» respýblıkalyq qaıyrymdylyq aksııasy bastaldy. Bul týraly Prezıdent janyndaǵy Ortalyq kommýnıkasııalar qyzmetinde ótken brıfıngte aıtyldy.

Is-sharada sóz alǵan Balalardyń quqyqtaryn qorǵaý komıtetiniń tór­aǵasy Esenǵazy Nurtóleýuly atalǵan aksııa Bilim jáne ǵylym mınıstrliginiń «Atameken» ulttyq kásip­kerler palatasy janyndaǵy «Meniń atamekenim» qoǵamdyq bir­les­­tigimen birlesip qolǵa alynǵanyn jetkizdi.

«Bul aksııa mesenattar, volonter­ler­diń kómegimen qoldaý men demeýge asa muqtaj oqýshylardy qashyq­tan oqýǵa qajetti tehnıkalyq qu­ral­darmen, sondaı-aq joǵary jyl­dam­dyqtaǵy ınternetpen qam­ta­masyz etýge baǵyttalǵan. Biz barlyq qazaqstandyqtardy, kásiporyndar men uıymdardy, kompanııalardy aksııaǵa belsene qatysýǵa, bala­lar­dyń qashyqtan qıyndyqsyz oqýy­na kómektesýge shaqyramyz. Mı­nıstrlikte eń aldymen kómekke asa muq­taj bilim alýshylardyń tizimi jasaldy, olardyń qataryna birinshi jetim balalar jáne jaǵdaıy tómen otbasylardaǵy oqýshylar engizildi. Sonymen qatar aksııa aıasynda ótinim berý úshin arnaıy «qoldau.edu.kz» saıty ashyldy», dedi E.Nurtóleýuly. Komıtet basshysynyń baıandaýyna qaraǵanda, tizim boıynsha tehnıkalardy taratýda ataýly áleýmettik kómek alyp otyrǵan, kópbalaly otbasydan shyqqan, ata-anasy múgedek jáne jalǵyzilikti ata-anasy bar balalarǵa da basymdyq beriledi. О́tinim berýshiler men kómek qolyn sozǵysy keletin qaıyrymdy jandar týyndaǵan suraqtary bolsa, Balalardyń quqyq­taryn qorǵaý komıtetiniń telegram chaty jáne komıtettiń basqa da áleýmettik jelilerdegi paraqshalary, oqýshynyń óz mektebi arqyly mamandarmen baılanysyp jaýap ala alady.

Al «Meniń atamekenim» qoǵamdyq birlestiginiń atqarýshy dırektory Lázzat Altynbekqyzy aksııany júzege asyrýda qoldanylatyn saıtty atalǵan birlestiktiń tegin jasaǵanyn aıtty. «Biz qoldau.edu.kz saıtyn múmkindiginshe jeńil qoldanýǵa yńǵaılap jasadyq. Onda bir batyrmadan soń ekinshisin basýdyń nemese alǵashqy sanattan kelesisine ótip otyrýdyń qajeti joq. Barlyǵy bir bette anyq kórinip tur. Portalda qazirdiń ózinde mınıstrlik rastap bergen jeke kompıýteri joq 20 myńnan asa oqýshynyń tizimi bar», dedi L.Altynbekqyzy.

Arnaıy tizim engizilgen saıtta kómekke muqtaj bilim alýshylar «jetim balalar, ata-ananyń qam­qorlyǵynsyz qalǵan balalar jáne áleýmettik az qamtylǵan otbasy­lardyń balalary» dep úsh sanatqa jiktelgen. Budan bólek aýyl balalaryna arnap 4-sanat ta qosylypty. Ata-analar bilim alýshynyń jeke sáıkestendirý nómirindegi sońǵy 3 sıfrdy terip, balasynyń engizilgen-engizilmegenin anyqtaı alady.

«Eger balańyzdy tizimnen tappasa­ńyz, ýaıymdamańyz. Bul – bar bolǵany birinshi kezeń. Kómekke asa muqtaj bilim alýshylardy tehnıkamen qamtamasyz etip bolǵannan keıin ekinshi kezeńdi bastaımyz. Osy aýqymdy isti jedel júrgizý – siz ben bizdiń qolymyzda. Kásipkerler qaýymy, sonymen birge jeke tulǵalar da saıtymyz arqyly tólemdi ońaı ári tez jasaı alady», dedi «Meniń atamekenim» qoǵamdyq birlestiginiń atqarýshy dırektory.

Sońǵy jańalyqtar

Qazaqstanda taǵy 69 adam indet juqtyrdy

Koronavırýs • Búgin, 09:00

Uqsas jańalyqtar