Áli esimde, Shámshi aǵamen alǵashqy tanystyǵym Qazaq radıosynyń qara shańyraǵynda bastaldy. Sonaý 64-65-jyldary bas redaktorymyz kompozıtor Mansur Saǵatov bar, Nurǵalı Núsipjanov ekeýmiz mýzykalyq redaksııada qyzmet etemiz. Birde «Shámshi kele jatyr» dep eleń ete qaldyq. Dálizge shyǵyp, taǵat tappaı kútip júrmiz. Qasyna jas aqyn Tólegen Aıbergenovti erte kelgen eken. Jalyndap turǵan jas aqyn tanymal kompozıtordyń janynan jarasym tapqandaı. Júzinen jylylyq esken Shámshi aǵamyzdy kórgende kishipeıil, qarapaıymdylyǵy basym jannyń janynan tabylǵanymyzǵa qýanyshymyzdy jasyrmadyq. Bul Nurǵalı ekeýmizdiń endi-endi tanyla bastaǵan kezimiz. Shámshi aǵa «Ekeýińe arnap án alyp keldim», dedi. Shámshi ánin oryndaý, árıne ekiniń-birine buıyra bermeıtin baqyt qoı. Maǵan «Aqerke-Aqjaıyq» ánin usynyp, pıanınomen áýenin tyńdatyp kórdi. Sózi – T.Aıbergenovtiki. Minezime de, daýysyma da saı eken, oryndaımyn dep ýáde ettim. Al Nurǵalı ekeýmiz «Arys jaǵasynda» ánin oryndaıtyn boldyq. Kóp uzamaı qos daýysta jazylǵan án Qazaq radıosynyń «Jańa ánder» aıdarymen tyńdarmanǵa jol tartty. Tabıǵaty ózgeshe osynaý erekshe áýen tyńdarmanyn elitip, radıo qorjyny hattardan kórinbeı qaldy. Ol kezde radıo quramynda myqty degen aqyndar, kompozıtorlar bar. Kórkemdik keńes jumys isteıtin. Biz osy eki ándi keńes talqysyna usyndyq. Túrli pikirler aıtyldy. Alaıda Shámshi ánderi vals yrǵaqty keledi degen pikirden keıin taspaǵa túsken án keıinge qalyp qoıdy. Án Nurǵalı ekeýmizge unap-aq tur. Sodan táýekelge bel býyp, bas redaktordyń maquldaýynsyz radıonyń konserttik baǵdarlamasyna qosyp jiberdik. Án efırden áýelep ketti. Ekeýimiz basshylyqtan eskertý alǵanymyzdy keıinnen umytyp ta kettik. «Arys jaǵasynda» ánin suraǵan tyńdarmannyń haty tolastamaı, lek-legimen kelip jatty. Osylaısha talaı jannyń kókiregine uıalap, súıip tyńdaıtyn ánine aınalǵan Shámshi ánderi, onyń ishinde «Arys jaǵasynda» ómirsheńdigimen qundy ekenin ýaqyt ózi dáleldep berdi.
Eskendir HASANǴALIEV,
Qazaqstannyń halyq ártisi,
Memlekettik syılyqtyń laýreaty,
ánshi-kompozıtor
