Sondaı-aq, olar Shymkent qalasy ákimdiginde Murat Áıtenovtiń tapsyrmasymen qurylǵan koronavırýsqa qarsy kúres boıynsha arnaıy sıtıýasııalyq shtabtyń jumysymen tanysty. Qala basshysy onda juqpaly dertpen kúreste ákimdik tarapynan atqarǵan jumystar jaıly aıtyp, bolashaqqa jasalǵan josparlarymen bólisti. Al Ajar Ǵınaıat kúzgi jáne qysqy maýsymdyq ınfeksııalyq aýrýlardyń órshýine jol bermeý, karantındik shekteýlerdiń alynýy kezindegi jumystardy júıeleý jóninde sóz qozǵady.
"Eger, kúzde indettiń ekinshi tolqyny bastalar bolsa qaladaǵy barlyq medısınalyq mekemelerdiń rezervinde tósek-oryndar men 2 aılyq dárilik zattar qory bar. Odan ózge, epıdemıolog dárigerlerdiń biliktiligin arttyrý maqsatynda arnaıy semınarlar uıymdastyrylyp, daıyndyq jumystary júrgizilip jatyr", - dedi qalalyq densaýlyq saqtaý basqarmasy basshysynyń m.a Tımırhan Varzılov.
Sonymen qatar, Ajar Ǵınııat dárigerlermen onlaın baılanysyp, pikirlerin tyńdap, juqpaly indetpen kúreste erlik tanytqan áriptesterine alǵys aıtty.
"Shymkent qalasynda ınfeksııanyń taralý deńgeıi tómendegenin kórdim. Bul indet tek elimizge ǵana emes, álemge tóngen qaýip boldy. Osy tusta aıanbaı eńbek etip jatqan barshańyzǵa mınıstrlik atynan alǵysymdy bildiremin" - dep atqarylyp jatqan jumystarǵa oń baǵasyn berdi.
Shymkentte 14 tamyzdaǵy jaǵdaı boıynsha COVID-19 ınfeksııasyn juqtyrǵandar sany – 5134, onyń ishinde 4285 naýqas indetinen jazylǵan. Provızorlyq ortalyqtarda 2810 tósek-oryn bar bolsa, búginde onyń 84 paıyzy bos. 211 mobıldi top 22 376 naýqastyń úıine baryp alǵashqy medısınalyq kómek kórsetti.
