1430.kz saıtyna qoldaǵy taldaý nátıjelerin júkteı otyryp, beıne jáne aýdıo baılanys rejiminde keńester ala alasyz. Bul úshin áýeli saıtqa esimińizdi, telefon nómirińizdi kórsete otyryp, tirkeýden ótý qajet. Sodan soń oń jaq joǵarǵy buryshta tirkelgen pasıenttiń aty shyǵady, sony basý kerek. «Faıldar» qoıyndysyna ótip, oń jaqta «Faıldy júkteýdi» tańdańyz, munda siz taldama nátıjelerin qosa alasyz. Sondaı-aq dárigerge jazylý úshin saıttyń basty betine ótý qajet, izdeý jolaǵyna (sol jaqta) dárigerdiń aty-jónin, konsýltasııa ýaqytyn jazyp, qabyldaýǵa jazyla alasyz. Al «Máseleniń sıpattamasy» bólimine sizdi ne mazalaıtynyn qysqasha jazýǵa bolady. Odan keıin «Tóleý» bólimin tańdaısyz.
Basty bette dárigerlerdiń aty-jóni, olardyń profıli, jumys ótili, sondaı-aq onlaın qabyldaý ýaqyty kórsetilgen «Dárigerler» bólimi bar.
Saıttyń basty betindegi tegter boıynsha qajetti mamandy tabýǵa bolady. Mysaly, «tuqym qýalaıtyn aýrýlar» belgisin tańdaǵanda, genetık dáriger týraly málimetter, tájirıbesi men keńes berý quny kórsetilgen profıli ashylady.
Naýqas qabyldaýǵa jazylǵannan keıin dáriger jazba týraly habarlama alady, pasıenttiń taldamalarymen jáne onyń medısınalyq kartasy bar jazbamen aldyn-ala tanysyp, zertteıdi. Osydan keıin, belgilengen ýaqytta dáriger beınekeńes júrgizedi. Qajet bolǵan jaǵdaıda ol kúndizgi qabyldaýǵa jaza alady.
Sondaı-aq 1430 nómiri bar baılanys ortalyǵy jáne 1430 mobıldi qosymshasy jumys isteıdi. Qosymshada siz dárigerge onlaın-qabyldaýǵa jazyla alasyz, taldamalar men medısınalyq qorytyndylardy qosa júktep, keńesterdi baqylaı alasyz. 1430.kz mobıldi qosymshasy Android platformasynda qoljetimdi. Ony Play Market-te izdeý jolaǵyna «1430.kz» dep engizip júkteýge bolady. Aıta ketý kerek, karantın kezinde tájirıbeli dárigerler 1430.kz saıtynda tegin beınekeńester berdi. Qazirgi ýaqytta portalda Qazaqstannyń birqatar qalalarynan onlaın-qabyldaýlar júrgizetin 826 bilikti dáriger tirkelgen.
