Maýsym aıynda elimizdegi ekinshi deńgeıli bankterdiń jalpy aktıvteriniń kólemi 28,59 trln teńgege jetip, maýsym aıymen salystyrǵanda 1,5 paıyzǵa ulǵaıdy. Al byltyrǵy shilde aıymen salystyrǵanda kórsetkish 12,8 paıyzǵa kóbeıdi. Eń iri on banktiń aktıvi bir jylda 13,4 paıyzǵa artyp otyr.
Ranking.kz habarlaǵandaı, jyldyq ósim kórsetkishi boıynsha Sberbank top bastap tur. Onyń aktıvi bir jylda 33,7 paıyzǵa ulǵaıyp, 2,65 trln teńgege jetti. Sońǵy aıdaǵy ósim boıynsha da atalǵan qarjy ınstıtýty kósh bastap turǵanyn aıta ketý kerek. Jalpy, respýblıkadaǵy ekinshi deńgeıli bankterdiń aktıv kólemi boıynsha Sberbank Halyq bankten keıingi ekinshi orynda tur.
Jyldyq ósim kórsetkishi boıynsha ekinshi oryn Kaspi Bank-ke tıesili: +29,9 paıyz. Aktıv kólemi 2,48 trln teńge. Odan keıingi oryndarǵa «Turǵynúıqurylysjınaqbanki» (+28,5 paıyz), Sıtıbank (+16,9 paıyz) jáne Jysan Bank (+16,5 paıyz) jaıǵasty.
Aılyq ósimge keler bolsaq, aktıvi 44,9 mlrd teńgege ulǵaıǵan SentrKredıt aldyńǵy orynda tur. Atalǵan banktiń aktıvi bir jylda 1,2 trln teńgeni quraǵanyn atap ótken jón. Jalpy, respýblıka boıynsha ekinshi deńgeıli bankterdiń arasynda SentrKredıttiń aktıv portfeliniń úlesi 8 paıyzǵa jýyqtaıdy.
Nesıe portfeli boıynsha da ekinshi deńgeıli bankterdiń jyldyq dınamıkasynda birshama ósim bar. Bul kórsetkish 9,9 paıyzǵa ulǵaıyp, 14,99 trln teńgeni qurady. Alaıda shilde aıynyń kórsetkishi boıynsha nesıe portfeli 0,5 paıyzǵa tómendegeni baıqalady.
Bir jyl ishinde aktıvteri eń kóp 5 banktiń ishinde nesıeleý kólemi boıynsha Sıtıbankten basqalarynyń bári ósimge qol jetkizdi. Degenmen, koronavırýs daǵdarysyna baılanysty maýsym, shilde aılarynda eń iri bes banktiń úsheýi ǵana nesıe portfelin ulǵaıtypty. Sberbanktiń nesıe portfeli 1,5 paıyzǵa, Kaspi Bank-tiń kórsetkishi 0,4 paıyzǵa, «Turǵynúı qurylysjınaqbankiniń» bergen nesıeleri 3,5 paıyzǵa joǵarylady.
Jalpy, ekinshi deńgeıli qarjy ınstıtýttary úshin nesıe berýdegi eń tıimdi segment – tutynýshylyq nesıeler. Bankterdiń nesıe portfeli tómendegenine qaramastan, tutynýshylyq nesıe kólemi bir aıda 1,1 paıyzǵa, al jyldyq kórsetkish 13,7 paıyzǵa óskeni baıqalady.
Ranking.kz-tiń sholýyna súıensek, tutynýshylyq kredıtti eń uzaq ýaqytqa beretinderdiń tizimin de Sberbank bastap tur – 60 aı. Odan keıingi oryndardaǵy Kaspi Bank – 48 aıǵa, Jysan Bank – 36 aıǵa beretini aıtylǵan. Ekinshi deńgeıli qarjy ınstıtýttary usynǵan eń joǵarǵy nesıeniń ortasha kórsetkishi 5 mln teńge ekenin aıta ketý kerek.
Tólem merzimi 90 kúnnen asyp ketken «nashar» nesıelerdiń úlesi shilde aıynda 72 mlrd teńgege azaıyp, 1,3 mlrd teńge boldy. Bul jalpy sektordaǵy aktıvterdiń 9 paıyzyna teń qarajat. «Nashar» nesıelerdiń kólemi boıynsha da Sberbank, «Turǵynúıqurylysjınaqbanki» jáne SentrKredıt tizimniń basynda tur.
Bir jyl ishinde ekinshi deńgeıli qarjy ınstıtýttarynyń ıpotekalyq nesıeleriniń úlesi 27,8 paıyzǵa, ıaǵnı 413 mlrd teńgege ulǵaıdy. Osylaısha ıpotekalyq nesıeniń jalpy nesıedegi úlesi 14 paıyzǵa jýyqtaǵanyn atap ótken jón.
