Joǵarǵy Sot tóraǵasy Qaırat Mámı beıne baılanys arqyly oblystyq jáne oǵan teńestirilgen sottardyń tóraǵalarymen jáne sýdıalarymen, sýdıa ádebi jónindegi óńirlik komıssııalardyń jetekshilerimen, oblys ortalyqtary men qala mańynda ornalasqan aýdandyq sottardyń tóraǵalarymen jumys keńesin ótkizdi. Bul týraly BNews. kz habarlady.
Beıne baılanysta sot tóreligin júzege asyrýdyń qazirgi jaǵdaıy týraly másele qozǵalyp, bıylǵy 9 aıdaǵy atqarylǵan jumystarǵa qysqasha sholý jasaldy. Respýblıka boıynsha sot aktileriniń 9,5 paıyzyna shaǵym túsip, árbir ekinshi sot sheshiminiń kúshi joıylǵan. Al osy merzimde aýdandyq sottardyń 1796 adamǵa qatysty úkimi de qate dep tanyldy. Bul kórsetkishti byltyrǵymen salystyrsaq, 2 paıyzǵa joǵary bolyp otyr. Sondaı-aq jergilikti sottardyń 6 myńǵa jýyq sheshimderiniń kúshi joıylǵan. Munan ózge, qadaǵalaý jáne kassasııalyq satydaǵy sottar Almaty qalasy sottarynyń 45 sheshimin, Astana qalasy sottarynyń 18 sheshimin jáne Shyǵys Qazaqstan oblysy sottarynyń 16 sheshimin qalpyna keltiripti. Jalpy, bıyl 39 sýdıa tártiptik jaýapkershilikke tartylyp, onyń 8-i jumystan shyǵarylǵan jáne 2 sýdıa sottalǵan.
«Bıyl eki myńǵa jýyq adam sýdıalar qateliginiń qurbany boldy. Sot bıligi bedeliniń tómendeýi men sýdıalarǵa degen senimsizdiktiń basty sebebi osynda. Osynyń nátıjesinde biz qoǵammen túsinise almaı júrmiz»,- dedi sóz oraıynda Joǵarǵy sot tóraǵasy Q. Mámı.
Jıyn qorytyndysynda Joǵarǵy sot tóraǵasy oblystyq jáne oǵan teńestirilgen sottardyń tóraǵalarynyń barlyǵyna eńbek tártibin saqtaý máselesin jeke baqylaýǵa alýǵa tapsyrma berdi. Sonymen birge, óńirlik jetekshilerge sybaılas jemqorlyq kórinisteriniń aldyn alý jumystaryn jandandyrýdy tapsyrdy.
Ámirhan Almaǵanbetov.
