Alakól aýdanynda aýyz sý júıesiniń qurylysy, emhana men mádenıet úıine kúrdeli jóndeý jumystary júrgizilýde, sonymen qatar jalpy somasy 4 mlrd 717 mln teńgeni quraıtyn taǵy 53 joba iske asyrylýda. «Jumyspen qamtýdyń jol kartasy» boıynsha munda 1200-ge jýyq jumys orny ashylǵan.
Kóksý aýdanynyń Balpyq bı aýylynda aýyz sý júıesiniń qurylysy júrip jatyr. Munda «Nurly jer» baǵdarlamasy boıynsha kóp páterli turǵyn úı salynýda, sonyń arqasynda jaqynda aýdan ortalyǵynan 60 otbasy qonys toıyn toılaıdy. Al Qaratal aýdanynda senator Úshtóbe qalasynyń ortalyq alańyn kúrdeli jóndeý barysymen tanysyp, qurylys-montajdaý jumystary júrgizilip jatqan basqa da áleýmettik nysandardy aralady.
Tekeli qalasynda Jumyspen qamtýdyń jol kartasynyń aıasynda 13 nysan salynyp, jóndeledi, munda búginge deıin 400-den astam jańa jumys orny ashylǵan. Osy maqsatqa shamamen 2 mlrd teńge bólingen. Bos jumys oryndarynyń jartysynan kóbi qyzmetkerlermen tolyqqan. Munda senator qalalyq máslıhat depýtattarymen de kezdesti. Kezdesý barysynda N.Qylyshbaev Qoǵamdyq keńester men máslıhattar tarapynan memlekettik qarajattyń paıdalanylýyna baqylaýdy kúsheıtý qajettigin atap ótti.
Eskeldi aýdanynda senator 22 bilim berý nysany men 16 turǵyn úı-kommýnaldyq sharýashylyq nysandaryndaǵy jóndeý jumystaryn tekserdi. Ár aýdan men kentte senator azamattardy jeke qabyldady. Jergilikti turǵyndar el halqynyń ómir súrý deńgeıin jaqsartý boıynsha týyndaǵan problemalar men tilekterin jetkizdi. Senator Parlamenttiń aldaǵy jumysynda azamattardyń barlyq ótinish-tilekterin eskerýge ýáde berdi.
* * *
Senat depýtattary N.Beknazarov pen A.Qapbarova Shymkent qalasyndaǵy sıtýasııalyq shtabta bolyp, Densaýlyq saqtaý vıse-mınıstriniń qatysýymen ótken aımaqtaǵy epıdemııalyq ahýal máseleleri jónindegi keńeske qatysty.
Shymkentte KVI juqtyrýdyń 5 myńnan astam jaǵdaıy tirkelgen. Biraq aýrý deńgeıi tómendeýde, búginge deıin 4 285 pasıent emdelip, úılerine oraldy. Qalalyq densaýlyq saqtaý mamandary pnevmonııa týraly málimetterdi de habarlady: jyl basynan beri 15 300-den astam jaǵdaı tirkelgen, 11 620 naýqas saýyǵyp shyqqan. Ákimdik koronavırýspen jáne pnevmonııamen aýyratyn naýqastardy qabyldaý jáne emdeý úshin 3 myńǵa jýyq tósektik oryn jasaqtaǵan.
Shtab otyrysynda senatorlar men densaýlyq saqtaý salasy ókilderi pandemııamen odan ári kúres sharalaryn talqylady. Qalalyq densaýlyq saqtaý mamandary epıdemııa qaıtalanǵan jaǵdaıda Shymkenttiń barlyq medısınalyq mekemeleri eki aılyq dári-dármek qorymen qamtamasyz etilgenin aıtty. Sonymen qatar dárigerlerdiń biliktiligin arttyrý maqsatynda arnaıy semınarlar men basqa da profılaktıkalyq is-sharalar ótkizilip keledi. Qala boıynsha 211 mobıldi brıgada qurylyp, olar qazirdiń ózinde 22 myńnan astam naýqasqa úıde kómek kórsetip úlgergenin aıtqan jón.
Senatorlar jergilikti atqarýshy organdarǵa sanıtarlyq talaptardy saqtaý jáne pandemııamen kúreste aldyńǵy shepte júrgen dárigerlerdi kótermeleý qajettiligi týraly eske saldy. Depýtattar sapar barysynda senatorlar aýrýhanalarǵa, dárihanalarǵa jáne jedel járdem stansasyna bardy.
* * *
Senat depýtaty Ǵ.Dúısembaev Atyraý oblysynyń Qurmanǵazy aýdanynda bolyp, 75 oryndyq jańa aýrýhananyń qurylysymen tanysty. Klınıkada 10 oryndyq ınfeksııalyq bólimshe, 10 oryndyq balalar bólimshesi, sonymen qatar as blogy, kir jýatyn oryn, medısınalyq qaldyqtardy kádege jaratýǵa arnalǵan polıgon bolady. Aýrýhananyń aınalasynda emdelýshilerdiń demalysy men qalpyna kelýine barlyq jaǵdaı jasalǵan. Aýrýhanada tolyqqandy jáne joǵary mamandandyrylǵan medısınalyq kómek kórsetý úshin zamanaýı jabdyqtar ornatylady. Jobanyń quny shamamen 2,5 mlrd teńge. Senator medısına qyzmetkerlerimen kezdesip, pasıentterdiń jaǵdaıy men densaýlyq saqtaý salasynyń problemalyq máselelerin talqylady. Sondaı-aq depýtat Atyraý – Astrahan avtokólik joly, Aqkól aýylyndaǵy 290 oryndyq balabaqsha, Qurmanǵazy – Birlik tas joly qurylysynyń sapasymen, Sharon ózeniniń túbin tereńdetý jumysymen jáne Hıýaz aýylyndaǵy mádenıet úıiniń jobasymen de tanysty.
