Sýretter Prezıdenttiń baspasóz qyzmetinen alyndy
Kezdesýde Bas prokýror Qazaqstan Prezıdentiniń daǵdarysqa qarsy sharalardy júzege asyrý kezinde zańdylyqty saqtaý jóninde bergen tapsyrmalarynyń oryndalý barysy týraly aqparat berdi.
Ǵızat Nurdáýletov jol jóndeýge jáne áleýmettik ınfraqurylym nysandaryn salýǵa baǵyttalǵan 130 tender ótkizý kezinde zańsyzdyqtar anyqtalǵanyn aıtty. Sonyń arqasynda 16,5 mıllıard teńge kólemindegi bıýdjet somasy saqtalyp qalǵan. Sonymen qatar «Jumyspen qamtýdyń jol kartasy» baǵdarlamasy aıasynda jalǵan jumyspen qamtýdyń 6 myń faktisi belgili bolǵan.
Bas prokýror dári-dármek daıyndaý boıynsha birqatar zań buzýshylyqtardyń joly kesilgeni jaıynda baıandady. Onyń aıtýynsha, dári-dármekterdi óz qunynan joǵary baǵamen satyp alý, memlekettik satyp alý prosedýralarynyń júıeli túrde buzylýy, tıimsiz josparlaý men baǵany burmalaý faktileri anyqtalǵan. Quqyq qorǵaý organdary zańsyz aınalymnan 400 000 býma dári-dármek pen jalpy somasy 1 mıllıard teńgeni quraıtyn 12 mıllıon medısınalyq betperde tárkilegen.
Sondaı-aq Ǵızat Nurdáýletov qylmys deńgeıiniń 35%-ǵa qysqarǵanyn atap ótti. Al urlyq jasaý, tonaý, buzaqylyq jáne zorlaý eki ese azaıǵan.
Prokýrorlar azamattardyń quqyqtaryn qorǵaý maqsatynda bıyl 54 adamǵa qatysty dálelsiz qozǵalǵan qylmystyq isti toqtatqan, sonymen qatar qyzmettik mekemeler men ızolıatorlardan 500 adam bosatylǵan. Prokýrorlardyń naqty jumysynyń nátıjesinde 585 azamatqa qatysty sot sheshimderi zańǵa sáıkestendirilgen.
Memleket basshysy Qasym-Jomart Toqaev tártip buzýshylyqtardyń aldyn alyp, kinálilerdi jazalaýda naqty is-qımyl qabyldaý arqyly daǵdarysqa qarsy sharalardyń júzege asýyn baqylaýdy jalǵastyrý kerek dep tapsyrdy. Budan bólek Prezıdent quqyq qorǵaý organdarynyń qylmyspen kúres qyzmetin úılestirýdi kúsheıtý qajet ekenin atap ótti.
