Jalpy, Almaty oblysy zeınetke shyǵýshylar sany jóninen respýblıka boıynsha kósh bastap tur. Derek boıynsha zeınet jasyna jetken turǵyndardyń úlesi boıynsha ekinshi orynda 4 500 ótinish qabyldaǵan Túrkistan oblysy, úshinshi orynda 3 800 adammen shyǵys Qazaqstan oblysy tur. Al «eń jas turǵyndar» Atyraý oblysynda turady eken, munaıly óńirde jyl basynan beri 1295 adam ǵana zeınetke shyǵýǵa ótinish bergen kórinedi.
Elimizde oryn alǵan epıdemııalyq jaǵdaı zeınet jasyna jetken adamdardyń ótinishin qabyldaýǵa da áser etip otyr. Bul ispen «Azamattarǵa arnalǵan úkimet» memlekettik korporasııasynyń bólimsheleri tyńǵylyqty aınalasyp keledi. Adamdar kóp shoǵyrlanatyn oryn bolǵandyqtan halyqqa qyzmet kórsetý ortalyqtaryndaǵy sanıtarlyq talaptar kúsheıtilip, turǵyndarǵa qajet qyzmet túrlerin qashyqtan kórsetý isi jolǵa qoıyldy. Qazir «Azamattarǵa arnalǵan úkimet» korporasııasynyń front-keńseleri qujattandyrý jumysyn tolyqtaı qalypqa túsirip, turǵyndarǵa qajetti qujatty berý men qabyldaý isin jolǵa qoıdy. Onyń ishinde jasyna baılanysty zeınetke shyǵý boıynsha qujat rásimdeý de bar. Dál osy baǵytta «Azamattarǵa arnalǵan úkimet» korporasııasy Almaty oblystyq fılıalynyń qyzmetkerleri 5253 adamnyń ótinishin qabyldap, tıisti qyzmet kórsetken.
"Jasyna baılanysty zeınetaqy tólemderin taǵaıyndaý týraly ótinishti zeınet jasy tolǵanǵa deıin 10 kún buryn «Azamattarǵa arnalǵan úkimet» memlekettik korporasııasynyń front-ofısi arqyly berý kerek. Sanıtarlyq talapqa sáıkes, qazir halyqqa qyzmet kórsetý ortalyqtaryna kelý úshin aldy nala kezek alý mindetti. Iаǵnı, qujat rásimdeýshi aldymen egov.kz portaly nemese eGovKzBot2.0 telegram-boty arqyly kezek ýaqytyn brondaý qajet. Bul adamdardyń qaýipsizdigin qamtamasyz etý jáne indettiń taralý qaýipin báseńdetý úshin jasalǵan amal. Sondaı-aq, memlekettik korporasııa eGov.kz portalyna elektrondy ótinishti jiberý arqyly qashyqtan zeınetaqy taǵaıyndaý múmkindigin jolǵa qoıdy. Qazir turǵyndar bul qyzmetti úıden shyqpaı-aq paıdalanyp jatyr", - deıdi «Azamattarǵa arnalǵan úkimet» korporasııasy Almaty oblystyq fılıalynyń basshysy Ermek Bekjúnisov.
Jalpy, kez kelgen qujat rásimdeýdi qashyqtan istep úırený pandemııa kezinde indet qaýipin juqtyrý táýekelin azaıtýmen qatar adamnyń ýaqytyn únemdeý úshin asa qolaıly. Ári bul qıyn sharýa emes eken. Mysalǵa, qajet anyqtama men qujatty alý úshin azamat elektrondyq sıfrly qoltańba nemese birjolǵy qupııa sóz arqyly egov.kz portalyna kirýi kerek. Odan arǵy jumystyń bári kórsetilgen nusqaýlyq boıynsha jalǵasa beredi.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
