Búgin Nur-Sultan qalasy ákimdiginiń Ál-Farabıdiń 1150 jyldyǵyn merekeleýge arnalǵan is-sharalary aıasynda Ál Farabı atyndaǵy Oqýshylar saraıynda "Ál-Farabı álemi" oqý-tárbıe ortalyǵynyń ashylý saltanaty ótti.
"Ortalyqtyń ashylýy álemdik ǵylym men órkenıettiń damýyna baǵa jetpes úles qosqan orta ǵasyrdyń uly oıshyly, ensıklopedıst jáne fılosof Ábý Nasyr ál-Farabıdiń rýhanı murasyna degen qurmetimizdi kórsetedi. "Ekinshi ustaz" atanǵan Ábý Nasyr ál-Farabıdiń fılosofııaǵa, logıkaǵa, metafızıkaǵa, jaratylystaný ǵylymyna qosqan úlesi orasan", delingen habarlamada.
Oqý-tárbıe ortalyǵyn qurýdaǵy maqsat – jer jahanǵa áıgili oıshyldyń zııatkerlik jáne shyǵarmashylyq murasyn zerdelep, urpaq sanasyna sińirý.
Oqý-tárbıe ortalyǵynda ǵalymnyń san túrli qyryn anyqtaıtyn "Ál-Farabı jáne ǵylym", "Ál-Farabı jáne grek oıshyldary" (Arıstotel, Platon), "Ál-Farabı jáne óner", "Ál-Farabı jáne tárbıe", "Ál-Farabı jáne Poezııa", "Ál-Farabı jáne sheshendik óner" bólimderi bar.
"Bul baǵyttar boıynsha oqýshylar ǵalymnyń medısına, astronomııa, matematıka, geometrııa, logıka, pálsapa, ıaǵnı, barlyq ǵylym salasynda etken eńbekterin jınaqtap, izdenedi. Keleshekte Ál-Farabı týraly derekti fılmder, tanymdyq dúnıeler daıyndap, onyń ómir súrgen kezeńine qatysty tyń derekterdi osy ortalyqqa jınaqtap, áıgili oıshyldyń qaldyrǵan mol murasyn nasıhattaý boıynsha jumysty jalǵastyratyn bolamyz", deıdi Ál-Farabı atyndaǵy Oqýshylar saraıynyń dırektory Erbol Irgebaı.
Tusaýkeser aıasynda ǵalym bıýstiniń ashylý rásimi de ótti. Ál-Farabı atyndaǵy Oqýshylar saraıynyń aspaptyq mýzyka bóliminiń oqytýshylary belgili kompozıtor K.Kúmisbekovtiń "Farabı sazy" týyndysyn oryndady.
