Toqsan saıynǵy saýalnamaǵa taý-ken óndirisi jáne óńdeý ónerkásibiniń, qurylys, saýda, kólik jáne qoımanyń 2,5 myńǵa jýyq kásiporny qatysty.
Saýalnamaǵa sáıkes, ekinshi toqsanda qurylysty qospaǵanda, barlyq sektorlar úshin básekelestiktiń mańyzy artypty. Saýda naryqtyq básekelestiktiń eń kóp zardap shekken salasy bolyp qala bergenmen, onyń úlesi burynǵydaı 39,6% quraıdy, al taý-ken óndirisi salasyndaǵy kórsetkish 12,2%. Qalǵan salalarda kórsetkish 22% men 30% terbelip tur.
Qańtar-maýsymda Qazaqstan ekonomıkasynyń IJО́ 1,8% tómendedi. Tótenshe jaǵdaı jáne shekteýli karantındik sharalardy engizý aıasynda qyzmet kórsetý salasy eń kóp zardap shekti. О́nimge suranystyń tómendeýi bıznesti júrgizýge taǵy bir kedergi bolyp otyr.
"II toqsanda qaralyp jatqan barlyq salalarda osy jyldyń birinshi toqsanynda bastalǵan kásiporyndardyń ónimine suranystyń tómendeý úrdisi jalǵasýda, eń az tómendeý óńdeý ónerkásibinde baıqaldy. III toqsanda suranystyń odan ári tómendeýi múmkin. Biraq ol qalypty jaǵdaıda tómendeıdi", dedi Ulttyq banktiń aqsha-kredıt saıasaty departamentiniń dırektory Jandos Shaımardanov,
Saýalnamaǵa sáıkes, aldaǵy 12 aıda barlyq salalardaǵy qarjylandyrý ózgerissiz qalady. Negizgi aınalym kózi - bul áli de kásiporyndardyń óz qarajaty. Respondentter Reseı rýblin sheteldik seriktestermen esep aıyrysýda qoldanylatyn negizgi valıýta dep atady. Eń aldymen, rýbldi óndiris kásiporyndarynyń 62,1% paıdalanady eken. Saýdada - 56%. Al ken óndirý ónerkásibiniń AQSh dollaryna degen yqylasy joǵary. Paıyzben eseptesek – 61,7%. Ekinshi toqsanda eń kóp teńge taý-ken óndirisi jáne óńdeý kásiporyndary qoldandy (tıisinshe 17,6% jáne 17,3%).
Sonymen birge, saýalnama júrgizgen kompanııalar teńgeniń AQSh dollaryna jáne Reseı rýbline qatysty baǵamynyń ózgerýiniń teris áseriniń tómendegenin atap ótti.
Ekinshi toqsanda qurylys kompanııalary men kólik jáne qoıma ónerkásibi banktik zaemdarǵa qol jetimdiliktiń tómendep ketkeni baıqalady.
Nesıelik sharttary qolaısyz kásiporyndardyń kópshiligi qurylys salasyna qatysty (17,8%). Bul salada teńgemen de, shetel valıýtasymen de alynǵan nesıeler boıynsha eń joǵary paıyzdyq mólsherlemeler bar (tıisinshe 13,4% jáne 8,3%).
Qaryz alýǵa nıet bildirgen kásiporyndardyń eń kóp úlesi 2020 jyldyń úshinshi toqsanynda óńdeý ónerkásibinde jáne saýdada baıqaldy (tıisinshe 20,9% jáne 18,3%), al eń azy taý-ken ónerkásibinde (7,4%).
