Taýly, qyratty Ereımentaý óńiri elimizdegi Jońǵar qaqpasy, Shelek, Qordaı tárizdi jel baǵyty únemi uıytqı soǵyp, almasyp otyratyn dálizderdiń biri. Sol sebepti bul jerde jel energetıkasyn óndirý áleýeti óte joǵary. Túptiń túbinde jel energııasy balama energııa kózderiniń arasynda belsendi básekege túsetindeı bolýy kerek. Qazirgi talpynys osy baǵyttaǵy qolǵa alynyp otyrǵan alapat sharýalardyń alǵashqy qarlyǵashtary desek te bolar.
Jel energııasyn arnaıy elektr generatorlarynyń kómegimen túrlendirý arqyly qýat kózin alǵan kezde shıkizatty satyp alý – tasymaldaýdyń, qaldyqtardy shyǵarýdyń qajettiligi bolmaı qalady. Sol sátte elektr qýatyn berýshi kompanııalardan derbestikke qol jetkiziledi jáne bir artyqshylyǵy, ekologııany lastaıtyn qaldyqtardan arylyp, tabıǵı resýrstar únemdeledi. Elge de óte paıdaly. Máselen, otyn elektr qýatynyń shyǵyndary birshama qysqarmaq. Taǵy bir tıimdi jeri, atmosferalyq jylý deńgeıine eshqandaı áser etpeıdi, onyń ústine tabıǵattyń ottegi qoryn saqtaıdy.
Dál osy óńirde alǵashqy jel elektr stansasy 2011 jyly paıdalanýǵa berilip, 45 MVt energııa qýatyn óndire bastaǵanyn aıta ketý kerek. Bul Qazaqstandaǵy eń alǵashqy ónerkásip deńgeıindegi qýat kózderiniń biri bolǵanyn da eske alsaq artyq bolmas. Atalǵan stansa 2019 jyly quny 3,9 mlrd teńge turatyn 169 947 340 kVt elektr qýatyn óndirdi. 2020 jyldyń sáýir aıyna deıin quny 327,1 mln teńgege baǵalanatyn 14 422 000 kVt elektr qýatyn óndirip, halyqtyń kádesine jaratty. Al Ereımenniń etegindegi el osyndaı jaqsylyqtyń sharapatyn birneshe jyldan beri kórip keledi. Keıin qatarǵa qosylǵan «Golden Energy Corp» jaýapkershiligi shekteýli seriktestigi burynǵy qýatqa ústemelep úles qospaq. Jel elektr stansasynyń qýaty – 30 MVt. Joba quny 5,6 mlrd teńgeni quraıdy. Ázirge qurylys jumystarynyń alǵashqy kezeńi aıaqtalyp, úsh týrbına qatarǵa qosylǵan. Ekinshi kezeńde 25 MVt qýat óndiretin 14 týrbına iske qosylmaq. Sol kezde 12 jumys orny ashylady.
«Ereymentau Wind Power» jaýapkershiligi shekteýli seriktestiginiń jel elektr stansasy jalpy qýaty 4,8 MVt bolatyn 11 týrbınanyń qurylysyn júrgizýde. Qazirgi kezde qurylys-montaj jumystary órmek júzinen aýdy. Ústimizdegi jyldyń ekinshi toqsanynda bastalǵan qurylys jumystary 2021 jyly tolyq aıaqtalady. Stansanyń qurylysyna 160 adam tartylǵan. Tolyq paıdalanýǵa berilgen kezde turaqty 8 jumys orny ashylady. О́ńirge quıylǵan ınvestısııa quny 26,6 mlrd teńgeni quraıdy.
Jel elektr stansasy jylyna 180 mln kVt energııa óndirýdi kózdep otyr. Paıdalanýǵa berilgennen keıin óńirdi elektr energııasymen turaqty qamtamasyz etýdiń senimdi kózi bolady ári qala bıýdjetin toltyrýǵa ıgi áser etedi. Az da bolsa jumys oryndary ashylyp, aýdandaǵy jumyssyzdyqty joıýǵa da septigin tıgizedi.
Aqmola oblysy,
Ereımentaý aýdany
