Belgilenbegen jerge qoqys tastaý - Petropavl turǵyndarynyń jıi kezdesetin máseleleriniń biri. Narazylyq bildirgen qala turǵyndary áleýmettik jelilerde qoqys tógilgen jerlerdiń sýretteri men vıdeolaryn jarııalaýda.
Jergilikti polısııa qyzmetkerleri tazalyqty saqtaý erejelerin buzǵandardy anyqtaý jáne aldyn alý boıynsha jumys júrgizýde. Petropavl qalasy PB jergilikti polısııa qyzmeti bólimi bastyǵynyń orynbasary Aıdyn Aqmaǵambetovtyń aıtýynsha, negizinen bul problema qala shetinde kóp kezdesedi. Alaıda, keıde jańa salynǵan kóp qabatty úılerdiń turǵyndary da osyndaı "jabaıy" áreket tanytyp jatady.
Jyl basynan Petropavl q. PB polıseıleri QR Ákimshilik quqyq buzýshylyq týraly kodeksiniń 505-baby (Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý) boıynsha 2659 hattama toltyrdy.
Quqyq buzýshylardyń kópshiligine eskertý jasaldy, 82 adamǵa aıyppul salyndy – bul shara óreskel zań buzýshylyqtar jasalǵanda nemese birinshi jazadan keıin bir jyl ishinde qaıtalanǵan jaǵdaıda qoldanylady. Oblysta jeti aıdyń ishinde abattandyrý erejelerin buzǵany úshin 6516 adam jaýapkershilikke tartyldy.
