Osy másele tóńireginde QR Ishki ister mınıstrligi Ákimshilik polısııa komıtetiniń tóraǵasy Murat Baımuqashev aıtty. "M.Baımuqashev atap ótkendeı, armıan nómirleri bar kólik máselesine erekshe nazar aýdarýǵa birneshe faktor áser etken. «Birinshiden, olardyń sany kóp bolǵany sonshalyqty, jol-kólik oqıǵalary statıstıkasyna jıi ene bastady. 2019 jyly Armenııadan kelgen kólikterdiń qatysýymen 2 myńnan astam jol-kólik oqıǵasy boldy, onyń 130-y adam qazasymen aıaqtaldy. Ekinshiden, kólikti senimhat arqyly satyp alǵan keıbir júrgizýshiler beınebaqylaý júıeleri ózderiniń nómirlik belgilerin anyqtaı almaıtynyn túsinip, jol erejelerin ádeıi buza bastady. Máselen, 3 mıllıon teńgeden astam somaǵa 400 ret zańdy buzǵan júrgizýshi bar", deıdi QR IIM Ákimshilik polısııa komıtetiniń tóraǵasy. Onyń aıtýynsha, Armenııadan ákelingen rýli oń jaqtaǵy kólikter sany – 6,5 myń.
"Onyń 2 myńy Armenııada tirkelgenge deıin qaıta jabdyqtalǵan. Iаǵnı, Armenııada qazirdiń ózinde bul kólikter rýli sol jaqtaǵy kólik retinde tirkelgen. Úkimet sheshimimen bul kólikter arnaıy zerthanalarda synaqtan ótýi kerek. Dıagnostıkadan keıin avtokóliktiń qazaqstandyq joldarda paıdalanýǵa jaramdylyǵy týraly qorytyndy jasalady. Avtokólik ıesine ishki ister organdarynyń osy kólikti tirkeýi úshin negiz bolatyn tekserý aktisi jasalady", deıdi ol.
Spıker atap ótkendeı, rýli oń jaqta ornalasqan 4,5 myń avtokóliktiń máselesi ashyq kúıinde qalyp otyr.
"2008 jyldan bastap Qazaqstanda oń rýldi kólik quraldaryn tirkeýge shekteý engizilgen bolatyn. 2015 jyly Qazaqstan Keden odaǵynyń tehnıkalyq reglamentterin ratıfıkasııalady, onda bul shekteýler naqty kórsetilgen. Armenııadan avtokólik ákelgen Qazaqstan azamattary bul tyıym týraly bildi. Memlekettik organdar kólik ıelerimen kezdesip, qazir ymyraǵa kelýdiń sheshimin qarastyrýda. Oń jaqtan basqarylatyn avtokólikterdi sol jaqtan basqarylatyn avtokólikke aınaldyrýǵa tehnıkalyq jaǵdaı jasaý úshin jergilikti avtokólik óndirýshiler, sheteldik kompanııalardyń resmı dılerleri tartylady. Ishki ister mınıstrliginiń basshylyǵy bul máseleni erekshe baqylaýda ustaıdy. Sondyqtan qazir osy sanattaǵy kólikterge tirkeý merzimin uzartý múmkindigi qarastyrylýda", - deıdi Murat Baımuqashev.
