Z.Súleımenova L.N.Gýmılev atyndaǵy Eýrazııa ulttyq ýnıversıtetinde halyqaralyq qatynastar mamandyǵy boıynsha bakalavrda, odan soń magıstratýrada bilimin tolyqtyrǵan. Ýnıversıtetten keıin Prezıdent janyndaǵy Qazaqstan strategııalyq zertteý ınstıtýtynda eńbek jolyn bastaǵan.
– Sáti túsip, shetelge jumysqa attandym. Taıland astanasy Bangkogte Birikken Ulttar Uıymynyń Azııa jáne Tynyq muhıty aımaǵy úshin áleýmettik jáne ekonomıkalyq komıssııasynda qorshaǵan ortany qorǵaý jáne damý dıvızıonynda qyzmet atqardym. 2016 jyly halyqaralyq qatynas boıynsha bilimimdi tereńdetý maqsatynda Japonııanyń saıası zertteý ınstıtýyna doktorantýraǵa tústim. Doktorantýrada oqyp júrip BUU-nyń túrli agenttikterinde jumysymdy jalǵastyrdym. Sonyń ishinde BUU-nyń Qazaqstan men Túrikmenstanǵa baǵyttalǵan damý baǵdarlamalarymen jumys istedim. Sonymen birge úkimettik emes uıymdarmen jáne jeke sektorlarmen tyǵyz baılanysta boldym, – deıdi Zýlfııa.
Shetelde júrgeninde elge oralýdy josparlaǵan Zýlfııa Prezıdenttiń jastar kadrlyq rezervi týraly bastamasyn estip, munyń múmkindik ekenin túsinedi.
– Aqparat alǵannan keıin jobaǵa qujat tapsyrdym. Irikteýdiń alǵashqy kezeńderi sıfrly jáne verbaldy testilerden turatyny belgili, kóbi osy kezeńnen ótpeı qalǵanyn estidim. Internetten uqsas testiler taýyp, daıyndaldym, kitaptar oqydym. Alǵashqy kezeń asa qıyn bolmady, degenmen qyzý daıyndyqty qajet etedi. Úshinshi kezeńde ózime jaqyn jobany tanystyrdym. Doktorlyq dıssertasııamnyń taqyryby – Syrdarııa basseınindegi transshekaralyq sý yntymaqtastyǵy máseleleri. Jobamdy Qazaqstandaǵy sý jáne transshekaralyq sý yntymaqtastyǵy máselelerin sheshýge baǵyttadym. Eksperttik komıssııamen suhbatty eń qyzyq kezeń der edim. Janyńa jaqyn, óziń biletin taqyrypty talqylaýdyń qandaı keremet ekenin aıtpasam da túsinikti. Sońǵy kezeń synaq emes, shyn máninde suhbat retinde ótti. О́z oıymdy, josparlarymdy bilimdi, bilikti, joǵary laýazymdaǵy tulǵalarmen bólisý de men úshin mártebe boldy, – deıdi synnan súrinbeı ótken rezervshi.
Búginde Zýlfııa Súleımenova Ekologııa, geologııa jáne tabıǵı resýrstar mınıstrliginiń Klımattyq saıasat jáne jasyl tehnologııalar departamenti dırektorynyń orynbasary bolyp qyzmet etedi. Qurylym elimizdiń klımattyq saıasatyn iske asyrýmen, qalypastyrýmen, ozon qabatyn saqtaýmen, sonymen qosa jasyl tehnologııalardy ilgeriletý máselelerimen aınalysady.
– Qyzmettegi negizgi maqsatym – Qazaqstannyń klımattyq saıasatyn jaqsartý. Bárimiz estip, bilip júrgendeı, ekologııa máseleleri dúnıejúzi boıynsha ózekti. Bul beıjaı qaraıtyn jaıt emes. Klımat máseleleri ekonomıka jáne áleýmetpen tyǵyz baılanysty. Jaqynda Eýropalyq odaq parnıktik gazdardyń shyǵaryndylaryna shekaralyq salyq engizýdi qarastyra bastady. Eger bul saıasat júzege assa, ekonomıkamyzǵa áser etedi, al ol áleýmetke de oń áser etetini sózsiz. Buǵan jaýapty mınıstrlik osy saladaǵy ahýaldy, jahandyq trendterdi jiti qarap, durys taldap, elimizdiń múddesine saı keletin saıasatty qalyptastyrýy kerek. Osy baǵyttaǵy suraqqa jaýap izdeýi mindet. Meniń basty maqsatym – klımat máseleleri boıynsha analıtıkany nyǵaıtý, sonymen birge jańa ári durys ekologııalyq saıasat qalyptastyrýǵa atsalysý. Bizge eń bastysy halyqtyń ómir sapasyn arttyratyn saıasat qajet, – deıdi ol.
Jalpy, Memleket basshysy aıtyp ketkendeı, jastar kadrlyq rezerviniń negizgi maqsaty memlekettik qyzmet salasynda tranzaksııalyq lıder emes, transformasııalyq lıderler qalyptastyrý. Zýlfııa endigi kezekte qalyptasyp jatqan transformasııany júzege asyrýǵa múmkindik berilse degen oıyn da jasyrmady.
– Halyqaralyq uıymdarda jumys istep júrgende saralap, oıyma toqyp júrenderim kóp boldy. Ekologııalyq saıasat pen qorshaǵan ortany qorǵaý maqsatynda shetelder ókilderimen birlesip qyzmet ettik. Keıbir úderisterdiń shetelde qalaı júzege asatynyn baıqadym. Memlekettik qyzmetke kelgeli de júıeni ońtaılandyrýǵa qatysty biraz oı qalyptastyryp úlgerdim. Alda solardy júzege asyra alamyn degen oıdamyn, buǵan deıingi tájirıbemdi, bilimimdi paıdaǵa jaratamyn dep senemin. Memlekettik qyzmettiń basty maqsaty – elimizde ústemdik etetin durys zań men saıasat qalyptastyrý, adamdarǵa ózderiniń múmkindikterin júzege asyra alatyn jaǵdaı jasaý. Sol turǵydan qaraǵanda, ózimniń oqyǵanymdy, tájirıbemdi tıimdi qoldana alamyn degen nıettemin», deıdi jas maman.
Ol qazirgi oı jarystyratyn, armandarǵa qol jetkizýge múmkindik mol zamanda jastardyń óz aldaryna bıik maqsattar qoıa bilýi mańyzdy ekenin jetkizdi.
– Jastar tek baǵa úshin emes, «bilsem» degen yntamen oqýy kerek. Belgili bir taqyrypqa qyzyǵýshylyq bolsa, ony damyta túsken abzal. О́ıtkeni bizdiń qoǵamnyń, memlekettiń taǵy bir máselesi – kadr jetispeýshiligi. Elimizdi aldyńǵy qatarly memleketter arasynan kórigimiz kelse, sapaly kadrlar daıyndaý kerek. Jastar ózderi qalaǵan, erteń meńgerip kete alatyn mamandyqty alýǵa umtylýy tıis. Al odan keıin ózine senýi kerek. О́zine senbegen adamǵa eshkim senbeıdi. «Armansyz adam – qanatsyz qus» degendi jıi estımiz, alaıda onyń mánine úńile bereımiz. Bizdi alys joldarǵa da, bıik asýlardan ótýge de jeteleıtini – arman. Sondyqtan úlken adam bolý úshin úlken armandarǵa qol sozý kerek-aq, – dep túıindedi sózin jas ǵalym.
