Baıqaýǵa qatysý oqýshylar men stýdentterdiń shyǵarmashylyq qabiletterin damytýǵa yqpal etedi, olardyń ǵylymı-tehnıkalyq baǵyttaǵy qoldanbaly zertteýlerge qyzyǵýshylyǵyn arttyrady.
Bıyl pandemııalyq shekteý sharalaryna baılanysty baıqaý onlaın-formatta ótti. Biraq soǵan qaramastan, jastar tarapynan baıqaýǵa degen qyzyǵýshylyq tómendemedi. «KazRoboProject-2020» baǵdarlamasyna elimizdiń barlyq óńiriniń ókilderi qatysty. Baıqaýǵa 62 (91 qatysýshy) ótinish tirkeldi, onyń 54-i onlaın qorǵaýǵa jiberildi.
Jobalarmen jumys isteý barysynda qatysýshylar qurylǵylardy jobalaý, syzbalardy oqý, robottardy qurastyrý, ázirlengen modelderdi baǵdarlamalaý negizderin ıgeredi. Olar dızaınerlerdiń negizgi komponentterin jáne olardyń fýnksıonaldylyǵyn zertteıdi. Sonymen qatar balalar shaǵyn marketıngtik zertteýler, qarapaıym qarjylyq esepteýler júrgizedi. Munyń bári, árıne keıingi jobalaý qyzmetinde paıdaly bolady.
«Jobany naqty jaǵdaılarda praktıkalyq qoldanýǵa maqsatty jáne júıeli túrde daıyndaý bilim alýshylardy rasıonalızatorlyq qyzmettiń negizderin túsinýge ári qaraı kásibı ósý úshin negiz bolýy tıis. Bizdiń balalar bolashaqta ǵylymı, ınjenerlik-tehnıkalyq baǵytpen baılanysty mamandyqtardy tańdap, Qazaqstan ekonomıkasynyń damýyn jańa deńgeıge shyǵarady dep oılaımyz», deıdi «KazRobotıks» federasııasynyń prezıdenti Aıjan Jekeeva.
Balalar jasaǵan jobalar – bul naqty máseleni sheshý úshin aıtarlyqtaı paıda ákeletin tehnıkalyq qurylǵyny (robottandyrylǵan qurylǵy, mıkroprosessorlyq júıe) qurýǵa baǵyttalǵan qoldanbaly shyǵarmashylyq jumystar.
Baıqaý eki jas tobynda ótkizildi: 10-15 jas jáne 16-21 jas aralyǵynda, sonymen qatar ár jas tobynda eki nomınasııa: «Konsept» jáne «Prototıp» boldy. Tujyrymdama («Konsept») – bul joba ıdeıasy men prosester logıkasyn kórsetý úshin jınalǵan qurylǵynyń ornalasýy. Prototıp – bul naqty paıdalanýǵa jaqyn, tapsyrmany oryndaıtyn qurylǵynyń «jetilgen» modeli.
Qatysýshy komandalar ǵylymı jetekshisi bar eki adamnan turady. Qazirgi ýaqytta qazylar alqasy onlaın-rejimde tanystyrylǵan úzdik jumystardyń avtorlaryn irikteýde. Baıqaý jeńimpazdaryn marapattaý rásimi qyrkúıek aıynda ótedi.
