Kezdesýlerde parlamentshilerdiń bastamasy boıynsha ázirlengen «Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» zań jobasy talqylandy. Usynylyp otyrǵan zań jobasy azamattardyń bilikti zań kómegin alý quqyǵyn iske asyrýyna kepildikti arttyrady.
Sýdıalarmen kezdesýde V.Volkov sheshim qabyldaýda sýdıalardyń táýelsizdigi men derbestigin, sot tóreligin júzege asyrý sapasyn arttyrýǵa, sýdıalyqqa kandıdattardy irikteý tásilderin ońtaılandyrýǵa baǵyttalǵan júıeni odan ári jetildirý máselelerin qozǵady. Ákimshilik rásimdik-prosestik kodeksiniń negizgi erejeleri de qaraldy. Qalalyq sot tóraǵasy jańa ákimshilik sottar qoldanystaǵy qyzmetkerler quramynan jáne qoldanystaǵy materıaldyq-tehnıkalyq bazanyń negizinde jasaqtalatynyn habarlady.
«Qazaqstan Respýblıkasynyń Ákimshilik rásimdik-prosestik kodeksin qabyldaý – memleket úshin mańyzdy oqıǵa. Ákimshilik rásimder men sot isin júrgizýdiń jańa qaǵıdattaryn engizý azamattardy bılik sýbektileri tarapynan bolýy múmkin teris qylyqtardan qorǵaýǵa, sondaı-aq memleket pen qoǵam arasynda týyndaıtyn qatynastarǵa tyń serpin beredi», dedi senator.
Senatordyń advokattyq qoǵamdastyqpen kezdesýinde qalalyq advokattar alqasynyń tóralqasy keıbir zańnamalyq normalar boıynsha óziniń saraptamalyq pikirin bildirdi, ony depýtat Senattyń beıindi komıteti zerdeleıtinin atap ótti.
* * *
Májilis depýtattary Sh.О́temisov pen S.Imasheva Oral qalasynda «Nurly jol» baǵdarlamasy aıasynda salynyp jatqan toǵyz qabatty turǵyn úı qurylysy alańynda boldy.
Bul nysandy osy jyldyń sońynda aıaqtaý josparlanǵan. Májilismender jumys qarqyny men sapasyna basa nazar aýdardy. Ásirese turǵyn úı aýmaǵyn kógaldandarý, abattandyrý, áleýmettik ınfraqurylym máselelerine kóńil bóldi. Depýtattar páter bólisi kezinde jergilikti atqarýshy organ ókilderiniń ashyqtyqty qamtamasyz etý jaıyna toqtaldy. Atap aıtqanda, árbir úmitker, óziniń kezegin kúndelikti ǵalamtor arqyly baqylaý múmkindigine ıe bolýy kerek. Bul sybaılastyqtyń aldyn alýǵa jol ashady. Oblys ortalyǵynda bolǵan kezde depýtattar 900 oryndy № 51 mektep qurlysyna bardy. Olar, ásirese pandemııa kezinde balalardyń bilim alýy el basshylyǵynyń aıryqsha nazarynda ekenin alǵa tarta kelip, jańa oqý jylyna daıyndyq barysymen tanysty. Quzyrly oryn ókilderi qashyqtan oqytý úrdisinde sapaly ınternet baılanysy ózekti ekenin aıtty. S.Imasheva barlyq mańyzdy suraqtardy Úkimet nazaryna usynatynyn jetkizdi. Sonymen qatar depýtattar Máskeý jáne Sholohov kóshelerindegi kanalızasııa júıelerin qaıta qalpyna keltirýmen aınalysyp jatqan jumysshylarmen kezdesti. Merdigerlerdiń aıtýynsha, búgingi kúni qajetti qurylys materıaldary tolyq alynǵan. Jumys jospar boıynsha júrgizilýde.
* * *
Senat depýtattary N.Beknazarov pen A.Qapbarova pandemııa jaǵdaıynda Shymkent mektepterin jańa oqý jylynyń bastalýyna daıyndaý máselelerin talqylady.
Qazirgi tańda bilim berýmen 222 myńnan astam oqýshyny qamtý qajet. Ákimdik senatorlarǵa mektepter «Bilim Iand» platformasy arqyly qashyqtan oqytýǵa tolyq daıyn ekenin habarlady. Operator serverlerdi ornatýdy júzege asyratyn bolady. Qalalyq bilim basqarmasy basshysynyń aıtýynsha, Úkimet qarajaty esebinen kópbalaly jáne az qamtylǵan otbasylardyń balalarynyń onlaın-sabaq oqýyna jaǵdaı jasaý úshin jańa oqý jylynda 36 myń kompıýter satyp alynady.
Sonymen qatar 14 940 bastaýysh synyp oqýshysy úshin ata-analarynyń kelisimimen qatań sanıtarlyq talaptardy saqtaı otyryp, 996 kezekshi synyp ashylady. Sondaı-aq depýtattar mektepter dástúrli oqytý formatyna kóshkenge deıin úsh aýysymdy bilim berý máselesin sheshý qajettigin eske saldy. Shymkent qalasynda ornalasqan 19 mektepte sabaq áli de úsh aýysymda júrgizilýde. Senat depýtattary jergilikti organdar atalǵan máseleniń sheshilýin turaqty baqylaýǵa alýy qajet ekenin aıtty.
* * *
Májilis depýtaty I.Ýnjakova Shyǵys Qazaqstan oblysy turǵyndarymen karantın ýaqytynda memlekettik qyzmet kórsetý máseleleri boıynsha talqylaý ótkizdi.
Depýtat О́skemen qalasyndaǵy halyqqa qyzmet kórsetý ortalyǵynyń tynys-tirshiligimen tanysty. Sondaı-aq ortalyq qyzmetine júgingen azamattarmen de tildesti. Olardyń aıtýlarynsha, karantın ýaqytynda da memlkettik qyzmet tıisti deńgeıde qoljetimdi bolǵan. Turǵyndar ýaqytsha shekteýlerge túsinistikpen qarap, jeke suraqtardyń ońtaıly sheshimin tapqanyn alǵa tartty. Depýtat «Azamattarǵa arnalǵan úkimet» jumysyna da basa nazar aýdardy.
О́skemende I.Ýnjakova «Januıa» qurylys alańynda boldy. Nysan «Jumyspen qamtý jol kartasy» baǵdarlamasy aıasynda salynýda. Qıyn jaǵdaıǵa tap bolǵan kez kelgen otbasy bul jerden tegin aqparat, konsýltasııa, bilim baǵyttary boıynsha kómek alýyna bolady.
