"Qazirgi ýaqytta álemdik ekonomıkadaǵy jaǵdaı kúrdeli, bul bizdiń ekonomıkaǵa da áserin tıgizýde. Halyqaralyq qarjy ınstıtýttary koronavırýs indetine qarsy shekteý sharalaryna baılanysty oryn alǵan jahandyq resessııa men iskerlik belsendiliktiń tómendigin atap ótýde. Oǵan qaramastan, Fitch reıtıngtik agenttiginiń tamyzdaǵy derekterine sáıkes, Qazaqstannyń ınvestısııalyq senimdiligi VVV – turaqty deńgeıinde rastaldy. Sonymen birge, bul reıtıng memleketterdiń 60 paıyzynda tómendep otyr. Bul Úkimet jáne Ulttyq Banktiń daǵdarysqa qarsy sharalardyń ýaqytynda qabyldap, naqty júrgizgen jumystyń nátıjesi bolyp tabylady", dedi Asqar Mamın.
Úkimet basshysynyń sózinshe, bul ekonomıkanyń turaqtylyǵyn, memlekettik qaryzdyń tómendigin, aqsha-kredıt saıasatynyń tıimdiligin jáne fıskaldyq rezervterdiń aıtarlyqtaı kólemin kórsetedi.
"2021 jyly Qazaqstanda jalpy ishki ónimniń naqty ósimin 2,8 deńgeıinde boljap otyrmyz. Qazir ekonomıkanyń salalaryn qoldaý jónindegi josparlanǵan sharalardy sapaly iske asyrýymyz kerek, qarqyndy tómendetpeı, úılesimdi jáne jedel sheshimder qabyldaýymyz kerek. Qazirgi jaǵdaıdy eskere otyryp, Úkimet alǵa qoıylǵan maqsattarǵa qol jetkizý úshin bıýdjetiniń jobasyn ázirledi. Respýblıkalyq bıýdjettiń kózdelgen qarajaty memlekettiń barlyq áleýmettik mindettemelerin tolyq kólemde oryndaýǵa múmkindik beredi. Jalpy, aıtylǵan tásilderdi maquldaýdy jáne atalǵan zań jobalary men Jarlyqtyń jobasyna daýys berýdi usynamyn", dedi Premer-Mınıstr.
Osydan keıin Mınıstrler kabınetiniń músheleri atalǵan qujattarǵa biraýyzdan qoldap daýys berdi.
"Ulttyq ekonomıka, Qarjy mınıstrlikteri Premer-Mınıstr keńsesimen birlesip, atalǵan zań jobalaryn jáne áleýmettik-ekonomıkalyq damý boljamyn belgilengen merzimde Parlamentke engizýdi qamtamasyz etsin", - dedi Úkimet basshysy.
