Uly oıshyldyń bizge málim de beımálim bolmysyn jan-jaqty ashý arqyly oqýshylarǵa qosymsha bilim berýdi kózdeıtin ortalyq birneshe bólimnen turady. Bul týraly Ál-Farabı atyndaǵy oqýshylar saraıynyń dırektory Erbol Islamuly:
– Ortalyǵymyz birneshe baǵytta jumys isteıdi. Sonyń alǵashqysy – «Ál-Farabı jáne grek oıshyldary». Ál-Farabı Arıstotel men Platon sekildi grek oıshyldarynyń eńbekterin taldap, túsinikteme jazdy. XVIII ǵasyrdaǵy fransýz, aǵylshyn, ıtalıan ǵalymdary óz zertteýlerinde Ál-Farabıdiń osy túsiniktemeleri men taldaýlaryn negizge alǵan. Biz óskeleń urpaqqa osyny túsindirýimiz kerek. Ekinshi baǵyt «Ál-Farabı jáne ǵylym» dep atalady. Álemniń ekinshi ustazy astronomııa, matematıka, geometrııa, medısına, logıka, fılosofııa ǵylymyn zerttegen. Onyń osy ǵylymdaǵy orasan zor eńbekteri balalardyń ǵylymǵa degen qyzyǵýshylyǵyn arttyrýǵa septigin tıgizedi. «Ál-Farabı jáne óner» atty bólim ǵulamanyń «Mýzykanyń úlken kitaby» degen eńbegi negizinde mýzykalyq jaǵynan ózin damytyp, jetildirýdi qalaıtyn balalar men jasóspirimderdi ónerge baýlýǵa baǵyttalǵan, – deıdi. Budan bólek jańadan ashylǵan oqý-tárbıe ortalyǵynda óleńge jaqyn balalardy Ál-Farabıdiń qazirgi tańda qazaq tiline aýdarylyp jatqan óleńderimen tereńirek tanystyrýdy kózdeıtin «Ál-Farabı jáne poezııa» bólimi bar. Al «Ál-Farabı jáne sheshendik óner» bóliminde oqýshylar saraıynyń kelýshilerin «Rıtorıka» atty ǵulamanyń eńbegi negizinde debat týrnırine daıyndaıdy. Uıymdastyrýshylardyń aıtýynsha, osylardyń ishindegi eń sońǵy ári mańyzdy bólim «Ál-Farabı jáne tárbıe» degen ataýdy ıelenipti. Bul baǵyt Ál-Farabıdiń ataqty «Tárbıesiz berilgen bilim – adamzattyń qas jaýy» degen ustanymyna saı oqýshylardy izgilikke, rýhanı baı, qaıyrymdy bolýǵa tárbıeleýdi maqsat etedi.
Otyrarda týyp, álemge tanylǵan tulǵanyń shyǵarmashylyq murasy men ómirlik ónegesin zerdelep, urpaq sanasyna sińirýge qurylǵan ortalyqtyń tusaýkeseri aıasynda ǵalymnyń Bıýsti ashyldy. Ǵulamanyń músinin Sýretshiler odaǵynyń múshesi, Astana sýretshiler Odaǵy basqarma tóraǵasynyń orynbasary, grafık, músinshi Baqytjan Jarylqasynuly jasady.
Ortalyqtyń tusaýkeseri Ál-Farabı atyndaǵy Oqýshylar saraıynyń aspaptyq mýzyka bólimi oqytýshylarynyń belgili kompozıtor K.Kúmisbekovtiń «Farabı sazy» shyǵarmasyn oryndaýymen aıaqt
