Saýda jáne ıntegrasııa mınıstrliginiń Tutynýshylardyń quqyn qorǵaý komıteti men onyń aýmaqtyq departamentterine alǵashqy jartyjyldyqta 5682 ótinish túsken eken. Al byltyr bul kórsetkish 6 myńnan astam bolǵan. Bıylǵy ótinishterdiń ishinde jazbasha – 1874, jedel jelige – 2393, Telegram-bot arqyly – 670, mınıstrdiń blogyna 64 tutynýshy ótinish jazsa, atalǵan komıtet tóraǵasynyń blogyna – 180, al jeke qabyldaýlarda 501 ótinish qaralǵan.
Tutynýshylardyń quqyqtaryn qorǵaý komıtetiniń basqarma basshysy Álıhan Shákenovtiń aıtýynsha, ótinishterdiń basym bóligi bólshek saýdaǵa baılanysty – 1637 ótinish, avıatasymaldar – 1568 shaǵym, kólik qyzmeti – 597, turǵyn úı kommýnaldyq sharýashylyǵy – 350 ótinish, turmystyq qyzmet kórsetý – 318, týrıstik qyzmetter – 275, elektrondyq saýda – 156, qarjylyq qyzmetter – 78, qoǵamdyq tamaqtaný – 58, medısınalyq qyzmetter – 48, baılanys qyzmeti – 45, basqalary – 552.
Azamattardyń ótinish berýiniń negizgi sebepterine toqtalar bolsaq, saýda oryndarynyń taýar satyp alynǵan kúnnen bastap 14 kún ishinde ony aıyrbastaýdan nemese qaıtarýdan bas tartýy, taýardyń sapasyzdyǵy, qyzmetterdiń/jumystardyń sapasyz oryndalýy (avtokólikti, tehnıkany jóndeý, jıhaz jasaý boıynsha sapasyz qyzmetter), tańdaýdyń shektelýi (belgili bir provaıderdiń ınternetine qosylýǵa májbúrleý), alaıaqtyq.
2020 jyldyń birinshi jartyjyldyǵynda Tutynýshylardyń quqyqtaryn qorǵaý komıtetiniń aýmaqtyq departamentteri jalpy somasy 25 229 252 teńgeni quraıtyn (24 659 802 teńge – shetelde demalý úshin, 569 450 teńge el ishinde demalýǵa) kórsetilmegen týrıstik týrlardyń qarjysyn qaıtarý boıynsha kelip túsken 93 ótinishti qarady, onyń ishinde 10 966 581 teńge tutynýshylarǵa qaıtaryldy. Sondaı-aq keıbir ótinishter boıynsha taraptar sapar kúnin aýystyrý týraly kelisimge keldi. Eń kóp suranysqa ıe týrıstik baǵyttar: Túrkııa, Mysyr, Eýroodaq elderi, ishki týrızm boıynsha – Almaty jáne Túrkistan oblysy.
2020 jyldyń 6 aıynda ótkizilmegen is-sharalarǵa baılanysty jalpy somasy 709 620 teńgeni quraıtyn 23 shaǵym kelip tústi, onyń ishinde 449 620 teńge qaıtaryldy. Bıletter Nur-Sultan qalasyndaǵy «Rýkı vverh» tobynyń, L.Ýspenskaıanyń konsertterine, Belgorodtaǵy «Halyq shyǵarmashylyǵy» festıvaline, «Astana Opera» teatrynyń qoıylymdaryna jáne taǵy da basqa is-sharalarǵa ticketon.kz saıty, Iаndeks poshtasy arqyly jáne konsert zaldarynyń kassalarynda satylyp alynǵan.
Meıramhanalarda, dámhanalarda jáne taǵy da basqa tamaqtaný oryndarynda ártúrli otbasylyq merekelerdiń ótkizilmeýine baılanysty 9 304 000 teńgeden astam qarajatty qaıtarý máselesi boıynsha 50 ótinish kelip tústi. Onyń ishinde 7 895 000 teńge qaıtaryldy, qalǵan ótinishter boıynsha jumys júrgizilýde.
Aıta ketý kerek, 2020 jyldyń 6 aıynda ártúrli sala boıynsha tutynýshylarǵa jalpy 85 mln teńgeden astam qarajatty qaıtarýǵa kómek kórsetildi, onyń ishinde jazbasha ótinishter boıynsha – 42 820 370 teńge, jeke qabyldaýlar qorytyndysy boıynsha – 18 710 994 teńge, jedel jelige túsken ótinishter boıynsha 24 427 332 teńge tutynýshylarǵa qaıtaryldy.
