Jalpy, bıyl Almaty oblysynda aýyl sharýashylyǵy daqyldarynyń egis alqaby 7 myń gektarǵa ulǵaıyp, 968,6 myń gektardy quraǵan bolatyn. Málim bolǵan derekke sáıkes, dıqandar 263 myń gektarǵa egilgen dándi-masaqty daqyldyń 56 paıyzyn oryp úlgergen. Aldyn ala esepteý boıynsha 438 myń tonna dándi daqyl jınalyp, gektaryna shaqqandaǵy ortasha ónimdilik 16,7 sentnerdi quraýda. Al orylǵan astyqty syıymdylyǵy 771 myń tonna bolatyn 265 astyq qoımasy qabyldap jatyr eken. Onyń ekeýi astyq saqtaý úshin arnaıy lısenzııa alǵan, bul qoımalarǵa 58,6 myń tonna astyq syıady.
Sonymen qatar oblystyń sharýa qojalyqtary kartop daqylyn jınaýǵa da kiristi. Bıyl ortasha ónimdilik 176,1 sentnerdi qurap otyr, bul ótken jylǵa qaraǵanda sál joǵary. Qazirge deıin kartop egilgen 40,3 myń gektar alqaptyń 8,6 myń gektary jınalyp, odan 150,8 myń tonna ónim alynǵan. Munan bólek, egilgen qystyq jáne jazdyq daqyldyń 42,9 myń tonnasy orylyp, qambaǵa quıyldy, ónimniń kólemi oblysqa qajetti mólsherdiń 54,1 paıyzyn quraıdy.
Jalpy Jetisýdyń tól daqyly qant qyzylshasy ekeni aıan. Bıyl 16,1 myń gektar alqapqa tátti túbir tuqymy sebilgen bolatyn. Buıyrsa, budan 500 myń tonna ónim alyp, 48 myń tonnadan astam daıyn qant shyǵarý josparlanǵan. Qazir oblys qyzylsha jınaý naýqanyna tolyq daıyn. Aqsý jáne Kóksý qant zaýyttary ónim qabyldaýǵa kirispek, al qant qyzylshasyn qazý jumysy qyrkúıektiń ekinshi jartysynda bastalady.
Egin oraǵynyń toqtaýsyz júrip, ónimdi der kezinde jınap alýy úshin oblys ákimdigi tarapynan barlyq shara jasalýda. Naýqan bastalǵanǵa deıin barlyq tehnıka jóndelip, astyq jınaýǵa 1409 kombaın, 180 mehanıkalyq qyrman, 260 astyq tıegish, 203 dán ýatqysh, 160 astyq tazalaý mashınalary men 249 avtotarazy jumysqa kirisken eken. Al ónim jınaý naýqanyn der kezinde aıaqtaý úshin Energetıka mınıstrligi bólgen 19,1 myń tonna dızeldik otyn da kezeń kezeńimen sharýashylyqtarǵa jetkizilýde. Dıqandar da jeńildetilgen baǵada beriletin janarmaıǵa qarap otyrmaı, óz qarajattaryna qajetti ónimdi satyp alýda. Búginge deıin 5 myń tonna janar-jaǵarmaı alǵan eken.
Qyrdaǵy eńbekshil qaýym qystyq mal azyǵyn daıyndaýǵa da jantalasyp jatyr. Qazirge deıin 2 mln tonnadan astam shóp jáne 983,7 myń tonna basqa da mal azyǵy jınalǵan. Bul istiń basy-qasynda Qaratal aýdanynyń sharýalary da júr. Aýdanda búginde 97 myń tonna jońyshqa jınalǵan. Jalpy mal azyǵyna qajet 109,5 myń tonna shóp jınaý josparlanǵan. Sondaı-aq 42,3 myń tonna pishendeme, 29,5 myń tonna saban, 13,5 myń tonna jemdik azyq ázirlengen.
– Bes gektar jerge ósken shópti shaýyp, taılap jatyrmyz. Bıyl qyrda qýańshylyq boldy. Jaýyn-shashyn da az tústi. Ázirge 1 myń orama shóp jınadyq. Shabyndyqta áli 500-ge jýyq orama shyǵatyn shóp jatyr. О́zimniń azyn-aýlaq malym bar. Aýylda 5-6 bas jylqy, 2-3 bas sıyr, 30 basqa jýyq qoı-eshki ustaımyn. Artylǵan shópti ketken shyǵyndy jabý úshin satamyn, – deıdi Qaratal aýdanyndaǵy «K.Dúısenbaeva» sharýa qojalyǵynyń basqarýshysy Jandos Gısanov.
Almaty oblysy
